قولته:- عشررررة..متأكده يا بت..كيفن عشرة يعني كلو شنيطة فيها توبً واحد؟؟..ضحكت وقالتلي:- أتي متخلفه في شنيطة الهدوم وشنيطة الريحه وشنيطة التياب والنعلات والمسوحات والمكباب...قولته:- مكباب ده شنو مني خابراهو..قالت:- البجلبطوا ناس كوشي في وشوشهن...لبعتها طاخ وقولتله:- الميكب اب ها الجاهلة..قالت لي:- وعرفتي اسمو من وين!؟ قولته:- من التلَفزيون اخر مرة شاهدنا فيها المسلسل في بيت ناس نورة البنية ديك قالت ميك اااب..قالت لي:- هااا سمح..بعد شوية العربات وقفت قدام البيت..نزلن منها سمحات نسوان وبنات عقدني عقدني..جرريت دخلت أوضه حبوبة وقنبتا في العنقريب حقها...النسوان زغردتن قدرتن واتكلمن مع حبوبة مسااافة قريب ساعتين بعدها طلعت..حبوبة جات قالت لي:- ها الغبيانة المقعدك هنا شنو..جابن ليك حلات شيلة..للحلاووة. السمحه ديك جابوها..خالاتك وامك واخواتك جاين باكر..خلاص ح نبدا نحبسك..هييي نسيت..امسكي النصيب ده..قالو عبد السلام رسلو ليك مع الحاجات..قولته :- تلفون..زي حق أرناڤ..قالت لي:- منوو وده منو كمان؟؟ قولته ليها:- ااا..كدي ارح يا حبوبة وريني جابن لي شنوو!؟؟...مرقنا على الحوش والشنط مفتحات...اشيل واعاين بعيون كبار حاجات زي دي بشوفا في المسلسلات بس..شي شنط يد وشي فساتين ملونة وشي وشويات...زغردتاا.."اي ما تستغربوا والله زغردتاااا "..سعاد جات جارية شافت معاي باقي الحاجات وحلفت إلا تشيل ليها فِستيين كدي لونه اسود..قولته :- شيلي..من عاداتي بعطف على المساكين والفقراء..بقت تضحك وشالتو معدومة الاحساس والكرامة...
اها اليوم التاني يمة واخواتي وخالاتي كلهن جن..اي واحده تشوف الحاجات وتعاين لي..واحده من خالات ساقتني بالطرف وقالت:- أتي يا ايناس لو كتبتي الولد ده قولي..النلحق الموضوع بدري بدري قبل يطور..قولته :- حرام عليك يا خالتي...يعني أني لاحقة اكتب دروسي لمن اكتب لي اسمر ملتحي..حرام عليك إن بعد الظن اثم..وقعدتا اجعر...يمة لمن سألتني ما خبرتها..خفت اعمل مشاكل..اها قعدوني في حفرة الدخان..وانا الشكية لله يقعدوني بجاي بقوم بطفيها بجاي..حبوبة بقت تقيف لي بالمسواط ساعة حتن اقوم...وعبد السلام كلو ما يضرب بفتح الخط وبختو في ضهر البقرة وبفوووت أغني مع البنيات تحت الشدرة...
يوم الجمعه الصباح جات الحنانة شخبطتني شخبطة شديد وسعاد مارقة وداخلة..قالت لي:- والله جات أمو ومعاها واحده كدي لابسة استغفر الله....البت رافعه نخرينا في السماا..دي بتكون اخته الله يكون في عونك..قولته ليها:- م عندي معاها شغله..أكان قلت ادبها بادبها..قالت لي:- بِس عليك لسانك سليط...حبوبة جات مع يمة جابن لي فستان كدي احمر قصير..حلفت ما البسو..بس حبوبة عصرتني تحت أباطها وقرصتني قرصة حااارة..قالت لي:- تلبسي غصب..بعد شوية بعقدوا..وعريسك بجي تتجرتقوا وتسافري..بقيت أجعر اصلي ما سكتاا..يمة قالت لي:- أتي هبلة مش؟؟..زولاً مسافر للخرتوم ببكي..افرحي..ااسي أكان ابوك عرسلك هارون كنتي فرحتي مش؟؟..قولته ليها:- يمة اتي زعلانة مني ولا شنوو..هارون شنو البعرسوو..شوية وسامعه بقولوا :-زغردتن يا حريم..عقدنا..عقدنا...
#يتبع
