قولتله:- بعتها كيفن يعني..وين الحوجه البتخليك تبيعها..قال لي:- بعتها عشان مصاريف جامعتك.نحنا ح نقعد هنا ستة شهور تانية ومحتاجين مصاريف...كفاية دهبك البعتي وزدنا بيهو الارض...قولتله:- هيي ده كلام شنو يا عبد السلام..م تقول كدي ما ياهو مالك...اني شن عندي وشن بسوى بلاك❤..قال لي :- العربية كده كده كنت ح أبيعها..ما فرقت كتييير..بكرة ح استلم القروش..قولتله:- سمح ماك جعان؟؟..أسويلك غداء..اني أتغديت مع نسوان الفريق..قال لي:- انا شبعان والله..عاوز انوم بس..قولتله:- سمح افرشلك الحوش ارقد نوم..فرشت الحوش...بعلي رقد رقده واااحده لنص الليل..صحى مخلوع لقاني مصنقرة ومولعة اللمبة براجع في دروسي..عبد السلام قال لي:- المصحيك الوقت ده شنو؟؟ قولتله:- براجع..دايرني اجي التانية تاني ولا كيفن؟؟ ضحك وقال لي :- لالا..شافعتي شاطرة وح تجي الاولى..قام من محلو وجاا رقد جنبي قفل لي دفتري وغطاني بالتوب..قال لي:- خلينا ننوم طيب..ما إلا تراجعي اسي..بعدين ده يداااب اول السمستر..ما تكوني جادة كده...قالولكم فتحت خشمي بري والله نمت بصمة خشمي للدغش❤...
"في البلد"
_اسيل اليوم والتاني تبكي بتدور ترجع الخرتوم بس ما ف طريقة...خالتها دقت لأبوها حنسته بس رفض قال :- بتي بتقعد محل انا قاعد..وبعدين الفلهمه شنوو..انا من قمتا قمتا في بلد..الخرطوم دي عرفتها اخر كم وعشرين سنة من حياتي...تقعد هنا بس لمن ألملم حالي بعدين نرجع الخرطوم...البكى شرطا لاسيل إلا سعاد لقتها بتبكي في قعر الحيطة..ساقتها من يدها بالغصب وقعدن تحت شدرة البلولة...اسيل قالت:- ياخ انتي عايزة مني شنو يا مخلوقة..المرة الفاتت عملتي نفس الحركه وجبتيني غصباً عني..في شنوو..خليني في حالي..سعاد قالت:- يا بت عايني للطبيعة دي والوادي والترعه وصوت الديوك والجداد ونسواين البلد وهن جايات من الزراعه والله نفسك تفتح❤أتي بس لسة ما متعوده لكن والله تقعدي هني شهراً زيادة ما بترجعي الخرتوم...عندنا حلات قعدات قهوة ومرقة العصرية بتياب الهزاز ويوم كلنا البنيات نتفق نمش نتمشط عند حاجه التاية❤..م تحرمي نفسك من السماحه دي كلها...قبل أسيل تفتح خشمها..البلولة شافها..باقي هو مشوطن وفيهو حبة طرطشةة بس قلبو أبيض متل اللبن...قال لسعاد:- ااا بنية دي منو قريعه العسل المعاكِ دي..قالتلو:- دي حماتها لإيناس بتو لحاج الطاهر..اخت عبد السلام بنادوها أسيل...قال ليها:- كوووو ررري كروورووك "اصوات بتدل على الحماس" جمالها متلو في بلدنا مافي...يمين لو أبوها بديها لي بعرسا الليلة قبل باكر ومهرهااا قطية وغنمايتين وبقرة خالتي حليمة اشتريها ليها عشان خاطر حباب عينيهاا🌻❤...!
_أني مشيت في السمستر التاني كويس ولو شيتاً غلبني عبد السلام بشرحلي وتقووى ما قعد تقصر مني تب❤...بعدها جات فترة الامتحانات...قولتله لعبد السلام:- أني أزعاج ما بدور تقعد بأدبك وتخليني في حالي المرة الفاتت بسببك جيت التانية..قعد يضحك وقال لي:- خلاااص عملتيني السبب😂😂طيب يا استاذة ما بجي جنبك..براااك بتجيني...قولتله:- في الاحلام يا اللخو يلا احلم بعيد...اها قعدتا قعدةواااحدي خلصتا شيتً كااامل..جا هبوباً قوووي وبعده مطرررة تقيلة..أني كنت في اللوضة التانية والرعدة خوفتني..شلت نعلاتي وجريت لعبد السلام...ما أنجمت إلا في حضنه قولته في قلبي أتي قلتدب والله يا إيناس..اسي بتسوي شنو في حضن اللخو ده..دايره أقوم إلا مسكني ورجعني قبلي وضحك..قال لي:- خليك خليك أنا كده رااايق ومبسوووط❤
امتحنت امتحاناتي كلها سمحهه وكل ما اجي من امتحان ازغرد في نص الحوش وعبد السلام يضحك فوقي ساااكت❤..اها اخر يوم للامتحانات عبدو🙈❤ "اي عبدو مالكم" فسحني وقعدنا في حته جبنة كدي قبل نرجع بيتنا قال لي :- عندي ليك خبر ح يعجبك..قولتله:- قووول سريع..قال لي:- امممم..بعد بكرة ح نسافر البلد...زغردتاا في نص الناس قولتله:- خبر السروووور يمة..اايوووويوووي..قعدني في البنبر وقال لي:- ياخ انتي مجنونة والله😂😂😂...
راجعه لحاج الطاهر جدي وحبوبتي الجنها نقة ولسعاد الحوااامة لحياة الريف من تاني❤🌻
#يتبع
