الشاعر محسن الخياط
انا شوگ الغريب الگرب ولاح
انا حسرة هذاك الأيس وراح
تعنيت اليخوف چلمتي سلاح
انا العن الشماته بوجعته ارتاح
انا الكلما تحصده يردله سباح
ذهب من زيج حلو وبالدرب طاح
هوه عذيبي على روحي الشكر فاح
يالمضيعين عمري هنا يالوكاح
اجر بالليل چن مجرار ملاح
يطليعة البعد ماضاگت اللگاح
يفيضه وبحضنه خيار قداح
يسلطان الحباري الفارش جناح
يمتاي الدلع صدره وطفطف وساح
رهم عشگك عليه ارهام مفتاح
وانا وهمي عرايا ثنين بوشاح
گصت روحي على جرحي ولحت اللحاح
اخذني بطيبتك ياريع مسطاح
تعت بيه ومرامي بياكتر داح
ازر وحده على وحده ابميبر انياح
نمت وگفه شگف عن لچم الصفاح
تهت والضيفوني طلعو اشباح
اداور بالمرادي وگيش ماصاح
علت هامة الخوره ولاكو ملواح
يهالتحلب بروحي منيلها مناح
هلب ويدوخ بي قباض الارواح
انا المامش وراها جنازته صياح
محسن الخياط
