الشاعر نوفل الصافي
(رب عراقي)
الخوف يعدي...
وللفرح بيبان عشره منين ماردنه نفوت..!
"توضيح"
(جربة العباس لسكينه قصيده)
وكلها وصلت
ومن قرينها لكينها وصيه!
الخوف يعدي...
وللفرح بيبان عشره منين ماردنه نفوت..!
ننحصد بالأربعاء..
نخضر بشاطي الخميس..
نترس الجمعه لعب..!
ونكلب الدنيا هلاهل من تمر زفة شلب...!
ذيچ حاصوده بحضن حاصودها الجانت تريده
ذاك عاشك من زمان !
وعدنه يتمرن يحب
مانموت فراش مانرهم نصير..!
غطه عشنه اعمارنه
انبلط ادروب الجفن للآتي من اعمارنه
ونرسم الدنيه قراشات وضوه
ينثر محبه
ونفلش التابوت من نعتاز خشبه
مانموت!!
واحنه ندري
زين ندري التحدي قائم بهذي الحياة
وكش ملك بين قراصة ضفيرة بلبل وشفة فراشه
وبين سيف وصوت بيبان القفص
وحاضرين شوكت مادگ الجرس
شما شربنه البحر
بعده الروج عالي
مانقص
انه اريدن رب عراقي
رب عراقي يحبني حيل
وياي يلعب مثل مايلعب علي ويه اليتامه
رب عراقي اله بكل شارع علامه.....
طفل يحضنله حمامه .....
شفه مرسومه ابتسامه....
...................
رب عراقي،،،،،
يترس اجيوب الفقير
وگلبه عالمحروم جامه
انه اريدن رب عراقي
ونبي خاص
ينزل بقرآن شعبي
ينقره بطور الونين
طور اهلنه يداوي جرحي
لأن قرأن الفصيح من قراه
طور الحجاز أتأول وأفتى بذبحي
.....................
وآنه ماجاي بجديد
الك رب وألي رب
المثل واضح صريح
أرد اعيش
لااأصير بيوم سياف الرشيد
وكافي أمثل دور عبد الله الرضيع
................
أرد اعيش
وأبني بعيوني مدارس للزغار
الكبرت ابستان خوف
وأرد أغني للحبيبه حاسبينك
وادنه أدنه
وعاالحواجب يلعب الشعر الحرير
وعالشواطي شلون تتلاگه الچفوف
آرد اغني بلايه أه
بلايه ليش بلايه أوف
للحبيبه أرد أغني
وشلون اغني
للحبيبه التفرز ال بي كي سي
عن الصوت من السمنوف..
