عنوان القصيدة
(تجارة كحل)
تجارة كحل حبنه بسوك عميان
بدينه و نعرف المشروع خاسر
بدينه و راس مال احلامنه الشوك
و تشاركنه المحبه بكلب طاهر
بدينه بنيه بيضه بعالم الوان
و وادم ما تهم بس بالمضاهر
وكت مو وكت للحب والعلاقات
و صراع الماده ويه المشاعر
اتفقنه نعيش بس بفراكنه نموت
اذا لا سامح الله و صار باجر
عشنه ايام كلش مرن اثكال
و شلناهن مثل جنطة مسافر
تبادلنه المتون الشيل الحمول
اليتعب متنه لثاني و يداور
متعوب و يعاون كمنه متعوب
ومثابر خلصت يحفز مثابر
تعبنه و ما دره البيناتنه يعيش
بكثر مـا جـنه نتـقـوه و نكابر
صبرنه و صعبه مرت ذيج الايام
وعشنه و صابر يصبر بصابر
جنه نكول تفرج والله موجود
و باجر يدبر المو هسه دابر
توجهنه و دعينه بأربع اجفوف
وطبكناها الاظافر ع الاظافر
دعينه الله يديم الي يحبون
مثلنه وحبهم يضل كون عامر
دعينه من الكلب ما نفترك كون
بعبرتنه ودمعنه جان حاضر
نزلنه الجفوف و خرت ادموع
حمر توشالت اعزاز النواضر
وضل بخدودنه ونراقب نريد
نشوف اليمسح خدوده يبادر
خفت من فشلته وبجفي سويت
على خده ودمعته بجفي ساتر
وقبل لا جفي يوصل خده حسيت
سابك جفي جفه واليه عابر
الله يا عشكنه المثل الاحلام
قارب بيه ركبنه وبينه غامر
غامرنه بدرب ما نعرف ـــ الوين
ــــــ يودي المهم حبينه نسافر
مشينه و بالسلامه نشدت انذور
لرجعتنه الكمر جم نجمه ناذر
ورانه الماي يشمر طاست الماي
ونده فوكانه جف الغيم شامر
الكمر كل ضنه لمن شافنه ورود
بكثر ما نحجي جنه بأمل زاهر
سـر جـان بحجينه يركص الروج
و على الشاطي رسمنه اجمل مناضر
بحيث الوان جنه انداين الطيف
اذا حس لون من الوانه فاتر
احنه العلمينه العاشك شلون
سهم و گلوب يرسم بدفاتر
وعلمنه السهر للما سهر يوم
وكلنه اليحب كون يعيش ثائر
العاشك من يموت يموت سهران
اذا بفراشه مات يموت كافر
الكمر لو مـات من يموت مرتاح
لان كضه العمر ع اليحب ساهر
انه لو خيروني بين الاثنين
اموت اليوم لو فركاك باجر
اموت اليوم و رجع وعدل انوب
واموت ولايضلي ذكر ذاكر
اهون عندي من فركاك لو يوم
يمر و ما اشوفك يمي حاضر
فتركنه ومات واحد من الثنين
مدري ثنينه متنه و نكابر
مدري ومدري حدما صاحنه الموت
ولكينه ارواحنه بنص المكابر
متنه وعاشه حبنه المارضه يموت
القصيده تعيش من يموت شاعر
انه ردتك صدك بس القدر جان
قدر كلش ضعيف وموش قادر
قدر ما يكدر يقدر معانات
قدر مو قدر جان بضهر غادر
قدر خله الاقدره و جايه بطيب
غدرني و كلي من الباب غادر
ردتك بس احس اهلك يدورون
موش الكلبه طاهر جيبه تاجر
من الباب اجيت و منه رديت
خاسر و شثكل خطوة الخاسر
مو اكسر الخاطر راد للبيت
اكسر خاطر اليكسر الخاطر
ابين احلامنه نحط حاجز الجيب
رجعت و كلي مو بس دمي فاير
شكو فلوس لعرسنه اجمعن عود
وعلي بجفاك خلصت ع الجكاير
وعلي رديت الوجن لوجت الطير
من ينصاب جنحه و هوه طاير
والحلام البعيني جانت اللوان
وصـارت لـونـها بلون الضفاير
اسود كلشي اسود ما عده الراس
بليله ويوم ابيض شفته صاير
ينشاف الخريف بوجهي رديت
من گـد ما هذيـج الساعه حاير
حرت والحيره حطت بالوجه لون
مـثـل ذاك الصفـار البلـ مناير
مثل كضت لجام اصفاحي كضيت
مـن بـ مـعـركـه والـمـهـر غـايـر
مبين مـن مشـيته الـراد مكسور
عله صفاحه تشوفه جفوفه داير
تجارة كحل حبنه بسوك عميان
بـدينـه ومـا حسبنـاها الخساير
