الشاعر ايهاب المالكي
آنه من الجرح ياصاحبي تعافيت
عبرتني المنيه ويومها تبدل
لگطت السنين ولحگت عالظال
واحييت المصوفر گبل لايذبل
تانيت امنياتي المامنعسه تنام
حتى اگدر بسكته من القيود افتل
عفت بيت ابوذيه على العش مكتوب
گلبي بفركة الخلان وجناح
وبديت انحاز للشمات وجناح
صدگ خليتني ريشات وجناح
لكن صفگ جنحي لمن ردت ارحل
صفگ جنحي لحت غيمه
عفت ذاك الغصن هيمه
عمر وياك ادور حل
چبيره السما وين اسأل
اخاف اشرد وما اندل
الى ان قررت حسيت عمري الضاع
شفته الطير ثاري من يطير اسهل
اثاري العش عذر للما يعرف يطير
اگول شبيه الشامت مايريد ارحل
حرگني الظن مثل لعبة الغميضان
ورى حايط الشوك ب لوعتي اتختل
جنت لخاطرك تحلف بخلگي الناس
انازع واليمر يشوفني مدلل
حكت لغلاطك بنصين گلبي اعذار
ترفه تغار منها حياكت المغزل
اضوگك بالجفن واستطعمك بالروح
واتجمد ابعدك وبهواك انحل
مدينة ظني تشبه دولة افلاطون
شفتك بيها فكره استبعدت تفشل
طين تغلب بقوه علنار ابليس
تغلط وانه اشوفك بس اگول اغفل
وتلمس جفونك لمسة المكفوف
اريد الگالي دمعه لو جفن مبتل
واتركك واسمع بعزتك تصهل خيل
خطوه تگلك امشي خطوه لاتنذل
وانا غيمت برد مابيها بس فياي
انطي الشمس ظهري وانچوي اتحمل
مرات اختنگ لمن يجيني الليل
افك شباج صدك واوكف اتأمل
صياد احس روحي والنهر وشل
اشوفك جاي ليه واركض اتخيل
اوصل للنهايه وابتدي من اول
اذا رفضت ظنوني جيتك عالبال
اغافلهن واگلك ماعليك اقبل
اغافلهن مغافل روج بالراس
علنيتي وثاري طبع الذيب بالراس
العگل شيفيدني ومتروك بالراس
والگلب ليه الراي...والشور... والحل
يومٍ بدونك كنت اكضيه مكسور
تبطي الدگايگ فيه والوكت يثكل
روحي بجنبك مثلت شاهد الزور
والحگ من مهر الاماني ترجل
عفتك ...
بس احس مدري شنسيت وياك
واطمئنان روحي والامان اختل
اخاف من الندى والورد ماثق بي
اذا بلبل يغرد نار يمي اشعل
وراك الماي صافن والنجوم حجار
خصر الشمس منه شفت ليل انسل
نسيتك ...وأتعض چفي اليفك الباب
احس لوحة حياتي بفرگتك تكمل
وانا وصيت گلبي وگتله كلشي يهون
نوط جروحك عللروح شكله
يگلبي وسببب ذل الطير شكله
منو يعرف النوم شلون شكله؟
لان لا شايفه ولامار بيه
