الشاعر كاظم اسماعيل كاطع
جربت مره .. وبعدها زنجر بكلبي القفل ...
يوم حب بارد جمعنه وعرفت مانشتعل ...
ردت اجيب الروح كوه لبيتك المسكون
لكن مارضت دكت رجل
كالت الشرفة كمين
وخوفي من عدها يطل ..
كلشي بيها مو حقيقي
حتى هذه الكمر لعبة من خلص دوره وطلعنه نزلو اهله بحبل ..
الساجيه البيتك عليها مو مثل باقي السواجي
شگد عجيبة الساجية البيتك عليها
ميها كل كطرة شكل ..
اه يل كلك تناقض
خدك وكلبك عجايب
صوره مو طبق الاصل ...
خدك بلون الوفر ليلة ضباب
وكلبك بلون الكحل ...
وجان همك تستغلني
وغصن المكابر بروحي اترشه ذل ...
وصرت باعيادك مغني
وصرت باعراسك طبل ...
والف هنيالك عليه
الفصل الاول جان تعذيبه سهل ...
هسه انه وياك والبر سفرة مجانين حره وانتهى دور العقل ...
نمشي ومغمضين نمشي بالرمل غرز جدمنه
ردنه نطلع ماكدرنه
واه من يلتف على الساك الرمل ...
وبعد شيفيد اعتذارك ينقبل ماينقبل
بالسمه الغربان باعتنه وشرتنه
وقسمتنه انصير جم وجبة اكل
كاظم اسماعيل كاطع
