الشاعر عبدالحسين الحلفي
تريد اصلاح ؟!
تريد إصلاح ؟ لملم مستحاك و مستحه الوياك
وصّي الگصه گلهه الگطره لا تنلاح
تريد إصلاح ؟ إذا ملاح إنته وأسست تيار
هم سامع رهم تيار وي ملاح ؟!!
و تريد إصلاح ؟ صالح عركة الطلاب و الرحلات
و صير انته المعاون حتى ماكو صياح
و توكل شيل مسحه و دغدغ الگيعان
و صالحلي الفجر و الندى اويه القداح
البرده بمكتبك وصلت سعر مليون
و شچم شيله بسببكم اوشكت تنلاح !!
و إخذ نص راتبك ونص راتب النواب
وزعه اعله الشعب كل الشعب يرتاح !!
هم مثلي عليك بيوم دگوا باب ؟
و رجفة شيلة امي و چن وهج مصباح
و ترسنا الشط كتب خوفاً من التفتيش
خفنا ينعدم وإنعدم تالي وراح !
بنص الليل اطلع و اضحك اعله الليل
و عيون الرفاق گبال عيني اشباح
و عندي صف رصاصي الكتب والاقلام
و چان عگال ابوي ببيتي اقوى سلاح
وانا اتشرف هويتي إنختمت بجرحين
جرح إمي العظيمه و جرح اخوي الراح
اخوي و ربع اخوي إنعدموا يضحكون
ضحكوا ع العدمهم و العدمهم ناح
و صاحوا يا وطن إعذرنه راح نروح
بس وصّي اليجي ليبوكًـ حق الراح !!
تريد إصلاح ؟ عوف الرُبّما و الحَيْثُ و التنظير
أول طيحته التنظير طاح و راح !!
تريد إصلاح؟؟ يا إصلاح !!!
وحدي الواعدتني و ما وفيت وياي
معقوله توافيلك شعب يا صاح.........؟؟؟؟ !!!
