الشاعر نائل مظفر
ماكو غابه
ولا غرابه
والاصناف الي شفتهه حيرتني
شما اگلب بيهه تطلع لو ارانب لو ذيابه
وماكو بالغابه سبع
لا شفت واحد سبع
باوعتله وأبتسملي
ردت اضحك بس بچيت
لن طلع مكسور نابه
ماكو غابه
ولا غرابه
دنيتك اصلاً طلابه
اليفك بابه يطير
ليش واحد للهوه يعرض شبابه
واليسد بابه الف واحد يرصده
عنده حسبه وساد بابه
وكلها اوراق وكتابه
لكن انت تريد تحفظ بابك ومحد يرصده
مسأله كلش بسيطه
لاتفتحه
ولاتسده
ولاتشلعه
ولاترده
شكد خطيه العنده باب
يصير نقمه الباب عنده
لكن الاكثر خطيه
ويستحق نبچي عليه
الباع بابه وخله برده
و موغريبه
كلشي بالدنيه تصادف
رغم فقري
ورغم زغري
وكلشي شايف
وكلهه سهله
ناس ترخص
ناس تغله
ناس تنصه
ناس تعله
شفت جيش بدوله ضاع
وشفت واحد صار دوله
وشفت واحد هو ضاع
وشفت واحد ضيع اهله
وشفت واحد ربه واحد
وشفت واحد ربه ميه
وشفت واحد ربه درهم
وشفت واحد ربه لحيه
وشفت واحد سوه كرسي
وشفت كرسي سوه واحد
وشفت چف زايد اصبع
وشفت چف كلهه زايد
وشفت ميه ابيت كعدوا
وشفت بيت ابحده گاعد
وشفت بيت عيب اكتبه
وشفت بيت ابست قصايد
كلشي شايف
كلشي عايف
مااخاف
لحد يراويني سيفه
ولا يجرده
ولا ينظفه
ولا يصقله
ولا يبرده
لان صدگ من يهده
احسب شچم راس گاطع
ما علي چم مره حده
خلي كل من يحچي قصده
لاتراوغ بالكلام
وياي صير حچايه وحده
انه اعرفهه الي يحبني
ماكو روج تحبه سده
لاتگلي استريح
امبينه كلمة استريح
من تجي ومعناهه طرده
وياك تنغر على واحد
ياجبل لو مهمه تعله
لان بس يصعد عليك
يخلي راسك جوه رجله
وانه گتلك
كل شي شايف
كل شي عايف
مااخاف
انه ابن ذيچ المظايف
انه ابن هاي الصرايف
عمي يا ابن القصور
شبيك ويه اهل الصرايف
يا هضيمه
ويا حسايف
انچفت كل الدلال
وطاحت ضلوع المظايف
عمي كافي لخاطر الله
طفي عودك لا تشعله
احترگت القريه بكبرهه
وانت بالنار اتسله
بس اكلك كلهه سهله
ذلة النمرود
نمله
لو بعوضه
ما علينه
المهم شبعته ذله
المهم شبعته ذله..
