الشاعرة وفاء الخفاجي
شحجيلك وعني السوالف تنشد
من الهموم براسي شيب منكد
موبيدي حارمني الوكت..مثل الناس
لابيه امشي ولا احلامي التكعد
بعكازة اطب لسنيني والموسم ريح
جا هي هيج الدنيه من تستوحد
عشت بحزن طفل ال خطية اتأذيه
هيج بعذاب النظرة من ماتقصد
حفظت الشوارع كلها من كد ما اطيح
كل عثرة وجهي وموش ثوبي اليجرد
حتى اليكول بنادم تعيبه الروح
يخجل خضاره بصف خضاري يورد
بوكت الجنت ومكيفه اكود بعكاز
عندي اويه جف الحنة فايت موعد
شمدريني يترس حضني طيف الدخان
حضني اليلوك اجم طفل بيه يكعد
ياجرح كلبي .. العافية التحسد بيك
ياكحل عيني الغاث حضن المرود
تعيرني بالموعيب .. وانه يصح جان
شباج خلكي سوالفك بيه تنشد
يضحك وجه عكازتي من اتلكاك
واضحك نهر والكاك متخوصر سد
مابيه امشي .. وركضت شوكي وياك
القوس واكف والسهم يمشي شكد
شمدريني تستنكف عيونك ممشاي
وميلات روحك بوسة اتجيهه بخد
اغفه اعله واهس نومته الشوك البيك
واشبع ركض باحلامي حد ما تنهد
مو من غوه .. اليعرج جروحه تعت بيه
لو بيده طرفه الخيط ما يتفرهد
اشلون ما احط راسي يلجمني الليل
ومنين مايندار يمشي المعضد
غير اشبه الناس ابواجيهم كون
غير اقتنع مشلولة حتى اتعود
وماتاني كمت ابنادم .. ايصح مرات
يشاقي طرف عكازتة الماله احد
