رواية ( الفتي الشرير ) كاملة

#الحلقة_الاولي#البداية

#الفتي_الشرير
#الحلقة_الاولي
#البداية
_______
اول حاجة حابب اوضحها ان دي هتكون اخر رواية انشرها من النوعية دي اللي هي البطل المنفرد .
ثانيا الرواية كبيرة زي رواية اعداء بالدم بس هنا هنبدا مع البطل من وقت ما كان ف ثانوي هتبقي كلها دراما اجتماعية من الواقع واكشن زي انتم متعودين علية ف رواياتي وكل حاجة هتبقي واضحة دي هتبقي رحلة حياة هنبداها سوا
ثالثا هيبقي في شخصيات كتيرة فالبداية بس مع الوقت انت هتحفظ وتفهم كل حاجة ف اتمني متحكمش عليها من البداية
اخر حاجة هوضحها الرواية ل اصحاب النفس الطويل يعني. علي مراحل كل مرحلة بتمثل جزء ف حياة وشخصية البطل لحد ما نوصل لنهاية الرحلة اللي هتكون مفاجاة صادمة .
______
#يلا_نبدا
________
انا  مهيب  27 سنه ، خريج هندسه خاصه
حكايتى تبتدى فى 2010 كنت فى تانيه ثانوى انا من الصعيد من الأقصر ومعنديش اى ميزه جسمى تخين ملامحى اصلا حلوه بس التخن كان مغطى عليها حالتى الماديه عاديه جدا والدى موظف على قده وامى ست بيت بس امى وارثه حته ارض كبيره من جدى بس كان مسيطر على الارض دى اخو جدى وكان بيرميلنا ملاليم كل سنه بحجه ان الزرع مابيجبش فلوس عندى اخين ولاد و 3 اخوات بنات انا اكبرهم فى الدراسه ماشى كويس بس فيا ميزه بشهاده الجميع انى بحب كل الناس وكل الناس بتحبنى ماعنديش مشاكل مع اى حد او بالتحديد لحد الوقت ده ماكانش عندى مشاكل مع اى حد بساعد اى حد محتاجنى باى طريقه ولو ماقدرش بحاول ادل اللى محتاجنى باللى يقدر يساعده بس المشكله الوحيده اللى كانت عندى فى الوقت ده علاقتى بالبنات كل البنات الى حواليا سواء جيران او قرايب او حتى بياخدوا معايا دروس شايفنى اخوهم كل واحده احاول ارتبط بيها تقولى انا مش شايفاك غير اخويا ده بسبب شكلى التخين بزياده وحالتى الماديه العاديه زى ماقولت واللى كان بيخلينى ماحولش اغير من نفسى انى ملاقتش الدافع او الحب اللى يخلينى اتغير
دى مقدمه عنى بس مهمه علشان نقدر نعرف الشخصيه بتاعتى وندخل بقى فى القصه
انا دلوقتى فى تانيه ثانوى فى اخر شهر 11 وطبعا تانيه ثانوى وتالته ثانوى شهاده يعنى سنه كامله وانا كنت علمى رياضه لان كان حلمى ادخل هندسه ، عندى اصحاب كتير بس اقرب شخص ليا كان ابن عمى هو اكبر منى ب 5 سنين فى كليه حقوق كنا متربيين مع بعض و احنا صغيرين بس ابويا بعد عن البلد بسبب وظيفته واحنا طبعا معاه بس المسافه بينا وبين بلدنا مش بعيده ساعه بالعربيه فى يوم وانا راجع من درس الرياضه على بعد العصر تقريبا لقيت عربيه نقل كبيره بتنزل عفش قدام عمارتنا انا ساكن فى الدور الخامس والشقه اللى قدامنا فاضيه بس احنا ساكنين سكن ادارى تبع الشركه اللى بيشتغل فيها والدى ولقيت والدى واقف مع واحد انا حاسس انى شوفته قبل كده بس مش قادر افتكر فين وكان فى عمال بتنزل العفش وتدخل بيه العماره دخلت سلمت عليهم والراجل اول ماشافنى اخدنى بالحضن وبيقولى كبرت يا مهيب وانا مستغرب راح ابويا عرفنا على بعض وافتكرته ده كان جارنا زمان ايام ما والدى كان بيشتغل فى المنيا المهم قعدنا مع بعض لحد ما العمال خلصو تنزيل العفش ودخلوه الشقه وانا طلعت شقتنا ولسه بفتح الباب شوفت ست اية ف الجمال بمعنى الكلمه قاعده مع امى دخلت وسلمت عليها وعرفت انها مرات جارنا الجديد بس ايه ست زى مابيقول الكتاب مهتمه بشكلها ولبسها ومن اول ما قعدت وانا مركز معاها لدرجه ان امى اخدت بالها وقالتلى قوم اعمل حاجه نشربها واول ما دخلت المطبخ امى دخلت ورايا وقالتلى لم نفسك عيب كده
المهم خلصت القعده والست مشيت وعلى الساعه 9 كده كنت بذاكر وامى دخلت عليا الاوضه وقالتلى قوم خد الاكل ده واديه لجيرانا علشان اكيد مش عاملين حسابهم فى اكل وانا قمت جرى علي امل انى اشوف الست دى تانى * ( راعي يا زوز ان دة لسة مراهق يعني تفكيرة كدة طبيعي ) * واخدت صنيه الاكل حطيتها فوق دماغى ورنيت الجرس فتحتلى الباب ملاك دى اققل حاجه ممكن تتقال لدرجه ان من جمالها انا كنت هقع بالصنيه قالتلى انت مين ؟؟
انا : ها
هى : انت مين
انا : انا جاركم وامى باعته معايا الحاجه دى ليكم
فتحت الضلفه التانيه واخدت مني الحاجه ودخلتها وقالتى شكرا وقفلت الباب انا دخلت بيتنا بسرعه وحكيت لامى وسالتها مين البت دى قالتلى دى بنتهم ياسمين معايا فى تانيه ثانوى انا فرحت جدا ولمعت عينى وقمت دخلت اوضتى تانى يوم وانا راجع من الدرس قابلت جارنا عند مدخل العماره وقعد يتكلم معايا وبعدين قالى ان بنته معايا فى ثانوى وكان عايز يتفقلها مع مدرسين علشان الدروس والمدرسين الشطار قفلو مجموعاتهم ومش بيدخلو حد قولتلو مالكش دعوه انت انا هتصرف وادخلها معايا فى مجموعاتى الراجل فرح قوووى وقالى خلاص هعتمد عليك سبته ودخلت شقتنا وطلعت تليفونى واتصلت بكل المدرسين اللى باخد عندهم واتحايلت عليهم وبالعافيه وافقو انهم يقبلوها وبعد ماخلصت اتفاق روحت جرى خبطت على جارنا وفتحلى هو الباب وقالى
جارنا : خير يا  مهيب  فى حاجه
انا : اه انا كلمت كل المدرسين وبالعافيه وافقوا على ياسمين انها تدخل معايا المجموعه واديتله جدول بمواعيد المدرسين
جارنا : انا مش عارف اقولك ايه شكرا جدا ليك على اللى انت عملته ده
انا : لا يا عمى مافيش حاجه ده واجب عليا على العموم بكره فى درس رياضه الساعه 5 والعنوان ........ ولو حبت تيجى معايا ماعنديش مشكله
جارنا : اكيد طبعا هى هتروح معاك كل الدروس لحد ماتحفظ هى الطريق لوحدها معلش يا مهيب هتعبك معايا
انا : لا مافيش اي تعب ياعمى سلام دلوقتى وبكره الساعه 4.30 هعدى على ياسمين علشان نروح مع بعض
جارنا : سلام يا مهيب
تانى يوم فى معاد الدرس خبطت الباب وفتحتلى ياسمين وسلمت عليا بس المره دى مختلفه مبتسمه فى وشى غير المره اللى فاتت خالص وقالتلى
ياسمين : ازيك يا  مهيب  اخبارك ايه
انا : تمام بخير يلا بينا الدرس اتاخرنا
ياسمين : يلا يا هوبا
انا : ايه الرضا ده كله اللى يشوفك دلوقتى مايشوفكيش المره اللى فاتت كنتى قافشه عليا
ياسمين : معلش اصل يومها كنت تعبانه من النقل والعفش زى مانت شايف
انا : ولا يهمك ياستى يلا بينا
ونزلنا وقعدنا نمشى علشان نوصل الدرس واحنا فى الطريق سالتنى
ياسمين : انت ازاى قدرت تدخلنى فى الدروس مع المدرسين دول مع ان منه (ومنه دى كانت جارتها فى البلد اللى كانت فيها واتنقلت هنا من سنتين بس بنت غلبانه ومابتعرفش تتصرف ) لما كلمتها حاولت مع المدرسين ورفضو تيجى انت بسهوله بعد ماكلمك بابا بنص ساعه تجبلى جدول مواعيد الدروس لدرجه ان انا قولت لبابا انك بتستهبل
انا: هههههه ليه كده بس
ياسمين : ماهو بالعقل كده منه فضلت تتحايل على المدرسين اسبوع كامل وبرضه مافيش فايده تيجى انت بسهوله تقنعهم
انا : ما انا عارف
ياسمين : عارف ايه
انا : اصل منه معايا فى كل الدروس وشوفتها هى وبتكلم المدرسين عليكى بس مكنتش اعرف انه انتى
ياسمين : هى منه معانا
انا : ايوه معانا بس منه شخصيتها ضعيفه شويه ومش بتعرف تتعامل مع الناس لكن انا المدرسين بيحبونى لكذا سبب اولا انا اللى منظم المجموعه بتاعه الدروس وهى هى مع كل المدرسين وانا مختار الطلبه المحترمين والكويسين ومابنعملش اى مشاكل غير ان المدرسين بتوعى واثقين فيا
ياسمين ''بانبهار'' : ازاى يعنى
انا : عادى هتشوفى بنفسك
وقعدنا نرغى لحد ماوصلنا مكان الدرس وهناك قابلنا " منه "
منه 'باستغراب' : ياسمين ؟؟ انتى جايه ليه مانا قولتلك المدرسين رفضو انك تدخلى المجموعه
ياسمين : لا انا دخلت والبركه فى  مهيب
منه : انت عملتها ازاى يا  مهيب
انا : عيب عليكى تسالى سؤال زى ده وانتى معايا فى الدروس للسنه التانيه
منه : بس مش للدرجه دى
انا : واكتر من كدا
جيه معاد الدرس ودخلنا كلنا واول مادخلنا الاستاذ نده على ياسمين وقالها انتى مين ؟
ياسمين ' بخضه ' : انا ياسمين اللى كلمك عليا  مهيب  امبارح
الاستاذ : اه ،، اهلا وسهلا يا ياسمين انا وافقت بس علشان خاطر  مهيب بس مع انى عمرى ما عملتها قبل كده
ياسمين : شكرا جدا يامستر
الاستاذ : انتى فاهمه الحاجات القديمه لحد ماوقفنا ولا ايه الدنيا
ياسمين : ايو طبعا انا كنت بذاكر وباخد دروس فى البلد اللى كنت فيها
الاستاذ : طب تمام وخدى المذكره دى هديه منى علشان انتى من طرف مهيب
ياسمين : شكرا اووى يامستر
كل ده بيحصل ومنه حسيت انها هتنفجر من اللى بيحصل وقالت للاستاذ : اشمعنا يا مستر لما انا كلمتك على ياسمين ماوافقتش ولما مهيب  كلمك وافقت وكمان اديتها مذكره هديه
الاستاذ : علشان انتى لما كلمتينى قولتيلى انها جديده ومنقوله ولما قولتلك اكيد مش فاهمه القديم وهتعطلنا وتعطل المجموعه احسنلها تشوفلها مدرس تانى يلحق يلملها المنهج ومايعطلهاش انتى ماتناقشتيش معايا لكن  مهيب  لما قولتله الكلام ده قالى اكيد كانت بتذاكر واللى هيوقف معاها هو ملتزم بيه هيشرحهولها لانها ساكنه معاه فى نفس العماره وشايل مسؤليتها وقدر يقنعنى
منه : مانا ماكنتش اعرف الكلام ده
الاستاذ : خلاص مش مشكله
المهم عدت الحصه وعدى شهرين واحنا بنروح الدروس مع بعض وبنذاكر مع بعض يعنى تقريبا معظم اليوم مع بعض وفى خلال الشهرين دول كنت لميتلها كل المنهج القديم لحد ماوصلنا وبقينا ماشين مع المدرسين لحد مافيوم حصلت حاله وفاه فى البلد عندنا وكنا فى اجازه نص السنه ابويا وامى واخواتى راحو البلد وقالو هياخدوا 10 ايام انا روحت معاهم اول يوم عزيت ورجعت تانى علشان الدروس والمذاكره . المهم اول مارجعت دخلت الشقه كنت تعبان لانى اخدت اليوم كله فى العزاء وبالليل سهرت مع ابن عمى للصبح وماكنتش نمت . دخلت بيتنا الساعه 10 الصبح نمت وصحيت الساعه 10 بالليل دخلت المطبخ جهزتلى لقمه وكلمت امى اطمنت عليهم ودخلت عملتلى كبايه شاى واخدت علبه السجاير كنت وقتها بشرب بس على خفيف ممكن سيجاره كل فترة * ( بردو يا زوز دة مراهق وبيجرب عادي مع العلم انا عمري ما جريت بس صوابعك مش زي بعضها )*المهم دخلت البلكونه اشرب السيجارة وحصل اللى غير حياتى وانا واقف فى البلكونه