#الفتي_الشرير
#الحلقة_ال42
__________________
وقفنا الحلقة اللى فاتت لما كنت قاعد فى الشقه لوحدى بعد ما خلصت كلامى مع يمنى كنت قاعد بتفرج على التليفزيون باب الشقه خبط فتحت الباب كان واقف عل الباب اتنين معاهم سلاح اول ما فتحت الباب زقونى جوه الشقه وثبتونى بالسلاح
انا : انتوا مين وعاوزين ايه
واحد منهم رد : انا سالم العاصى
التانى : وانا حسين العاصى
انا : طب عاوزين منى ايه مش كفايه اللى عملتوه فيا عاوزين ايه تانى
سالم : عاوزين حقنا والارض بتاعتنا
انا : انا قولت لعمكم انى مش عاوز حاجه ولا يلزمنى حاجه منها
سالم : وايه الدليل عل الكلام ده
انا : روحوا لعمكم واسألوه
سالم : عارف لو كنت بتكدب ساعتها انا هقتلك بايدى
انا : انت ما تقدرش تعملى حاجه والا هتروح فى داهيه .... انت مش عارف بتكلم مين
سالم : كده طب اتشاهد على روحك .... ورفع سلاحه عليا
من ناحيه تانيه فى العربيه عند عمر ومحمد
عمر : سوق بسرعه يا محمد خلينا نلحق المصيبه قبل ما تحصل
محمد : انا سايق با اقصى سرعه
عمر : انت متاكد من اللى الاغبياء دول هيعملوه
محمد : ايوه متاكد مراتى سمعت امينه وسميحه هما وبيتكلموا مع سالم فى التليفون وبيقولوا انهم هينفذوا الليله .... بعدها اتصلت بيا وقالتلى وانا جيتلك على طول
عمر : كويس انى مانزلتش البلد
محمد : انا خايف نكون اتاخرنا
عمر : طب اتصل بيهم وحاول تمنعهم
محمد : بتصل بيهم وقافلين تليفوناتهم
عمر : طب ابلغ الشرطه
محمد : احنا مش ناقصين شوشره صعب نلمها وخصوصا فى الظروف اللى احنا فيها
عمر : طب اتصل بدياب احذره
محمد : بتصل بيه تليفونه مشغول باستمرار وبعد كده اتقفل
عمر : طب يلا بسرعه
نرجع عندى انا فجأه اقتحم الشقه رجالة الشرطه ومندوب من السفاره وقبضوا عليهم
الظابط : حضرتك كويس
انا : اه تمام يافندم انا كويس
مندوب السفاره : لازم يتعمل تحقيق يا حضرة الظابط ونعرف مين دول
انا : مالهاش لازمه يافندم
الظابط : ازاى دول كانوا عاوزين يقتلوك
انا : يقتلونى ايه يا فندم ... دول اعمامى وكانوا بيزورونى عادى .... صح ولا ايه يا عمى
سالم : صح يا ابن اخويا
الظابط : طب والسلاح اللى معاهم ده
سالم : السلاح ده للحمايه الشخصيه ومرخص يا فندم
مندوب السفاره : يعنى مفيش اى خطر على حياتك يا بشمهندس
انا : لا يافندم مفيش اى خطر
مندوب السفاره : خلاص تمام كده .... وعلشان امنك احنا اتفقنا مع الشرطه المصريه وهيوفرولك حراسه شخصيه الفتره دى
انا : مفيش لازمه للحراسه دى يا فندم
مندوب السفاره : لا لازم لحد ما نطمن عليك .... يا اما ترجع امريكا تانى وهناك مش هيبقى فى خطر على حياتك
انا : خلاص يا فندم سيب الحراسه مؤقتا
وخلص الموقف وخرج مندوب السفاره والشرطه وسابوا الحراسه تحت البيت وسابوا اعمامى معايا فى الشقه
انا : انتوا كده عرفتوا انا ممكن اعمل ايه فيكم .... ولو حد فيكم فكر يتعرضلى انا ممكن اوديكم ورا الشمس
سالم : احنا عاوزين ارضنا وفلوسنا
انا : وانا قولتلكم انى مش عاوز حاجه منكم
واحنا بنتكلم الباب خبط وكان عمر ومحمد وظابط من الحراسه
انا : خير يافندم فى حاجه
الظابط : الناس دول بيقولوا انهم قرايب حضرتك
انا : ايوه يا فندم دول عمى وابن عمى
الظابط : انا اسف يافندم .... اتفضلوا ولو احتجت اى حاجه كلمنى فورا
انا : حاضر يا فندم اتفضل
ودخل عمر ومحمد الشقه وقعدنا كلنا
انا : انتوا عاوزين منى ايه تانى .... سبتلكم البلد وقطعت علاقتى بيكم مع ان ده كان ضد رغبه ابويا وقولت ان كده اريحلكم واريحلى .... لكن يوصل بيكم الحال انكم تقتلونى
عمر : ماتقولش كده يا ابنى انا اول ماعرفت باللى هيعملوه جيت جرى علشان الحقك وقبلها جيتلك علشان اديلك ورثك وانت يعتبر طردتنى
انا : وانا قولتلك مش عاوز حاجه منكم .... وكمان هسيبلكم مصر كلها واسافر مع ان ده ضد رغبة ابويا بس الظاهر مفيش حل قدامى غير كده .... والغلطه اللى بتحاسبونى بسببها بتعملوا الالعن منها وانا ساكت ومش بتكلم .... والدى الله يرحمه كان عاوزنى اعيش فى بلدى وسط اهلى .... لكن اكتشفت ان لا دى بلدى ولا انتوا اهلى
عمر : ماتقولش كده يا بنى
انا : لا اقول اكتر من كده .... انا من يوم ما رجعت من امريكا وانا عايش لوحدى وساكت ومستحمل علشان اسمع كلام ابويا .... ابويا اللى حاول طول سنين يعلمنى ان دى بلدى وطلب منى ما اقولش لاى حد على الجنسيه بتاعتى واعيش زيى زى اى انسان طبيعى عايش فى بلده وميبقاش غريب فى ارضه ... لكن برضه طلع غلطان فى رائيه ده واللى حمانى فى البلد دى هى الجنسيه بتاعتى اللى يوم ماكلمتهم وقولتلهم انى حاسس بخطر على حياتى وحاسس ان فى ناس بتراقبنى اتحركوا زى ما انتو شايفين
عمر : احنا برضه لما حسينا بخطر على حياتك اتحركنا على طول وجينالك
انا : وهو الخطر ده بسبب مين مش بسببكم .... يعنى اللى بتقولوا عليه جدى ده اذانى وهو عايش ولسه بياذينى وهو ميت ....ارجوكم سيبونى فى حالى نفسى اعيش زيي زى اى حد فى سنى .... ابوس ايديكم سبونى فى حالى
عمر : خلاص يا ابنى زى ما انت عاوز .... احنا مش هنتعرضلك تانى بس ارجوك اسمع كلام والدك وماتسبش بلدك
انا : عاوز كمان اخلص من موضوع الارض والفلوس بتاعتكم
عمر : قصدك ايه
انا : انا مش عاوز الارض والفلوس بتاعتكم وعاوز اخلص الموضوع بشكل رسمى
عمر : اذا كنت مش عاوز تعرفنا دى حاجه ترجعلك لكن الأرض والفلوس دى حاجه ماتخصكش لوحدك ... ده تعويض عن اللى احنا عملناه فيك وفى ابوك ... انا عارف ان الغضب ماليك وعندك حق فى حاجات كتير لكن ارضك وفلوسك هتبقى امانه عندى زى ما وعدت جدك ... ويوم ما تحتاجها هتلاقيها
انا : اللى انت شايفه اعمله .... بس انا قولتلك قبل كده ميلزمنيش منكم اى حاجه
عمر : احنا هنمشى دلوقتى ومسير الايام تبينلك انك ملكش غيرنا ومحدش هيحبك غيرنا واذا كان اعمامك دول ليهم رأى تانى فحسابى معاهم كبير بس مش هنا
انا : انت حر
عمر : مع السلامه يا بنى ..... وانتوا الاتنين يلا قدامى وحسابى معاكم عسير بس فى بلدنا
أنت تقرأ
رواية ( الفتي الشرير ) كاملة
Misteri / Thrillerنتناسى لكننا لا ننسى، احيانا قد نتخلّى عن المحاسبة لكننا لا نسامح.هكذا هي طبيعة الانسان بكل ما فيه من جنون... الخيانة ،الغش ،الاخلاص ،الوفاء لكي نفهم كل انسان يجب علينا فهم ما يدور داخلة من الناحية النفسية، علينا ان نراجع كل الاسس التي تربي عليها كذ...
