#الفتي_الشرير
#الحلقة_الثامنة_والتاسعة
________________
محمد : تعالى يا مهيب نتمشى شويه فى البلد
انا : يلا بينا
خرجنا انا ومحمد نتمشى
محمد : ممكن بقى تفهمنى ايه اللى بيحصل بالظبط
انا : ايه اللى بيحصل ما كل حاجه قدامك
محمد : ايوه كل حاجه قدامى بس مش فاهم اللى بيحصل فى الكواليس وانت عارفنى لازم ابقى عارف كل حاجه
انا : كل اللى حصل انى كلمت ابو سيف علشان يساعدنى ارجع ارضى وهو اللى حط معايا خطه القبض على الحيوانات دول وتهديهم علشان نرجع الارض بس كده
محمد : مش ده قصدى
انا : امال تقصد ايه
محمد : عارف يا مهيب احنا معاشرين بعض قد ايه من يوم مانت اتولدت بالرغم من انك اصغر منى بخمس سنين لكن انا اعتبرتك صاحبى وانا وانت مالناش غير بعض انت صاحبى الوحيد وانا صاحبك الوحيد يعنى ماتلفش وتدور عليا وهاتها صريحه
انا : مش لما تبقى انت صريح معايا ابقى انا صريح معاك
محمد : وانا من امتى ماكنتش صريح معاك
انا : بص يامحمد انا هجبهالك من الاخر زى ما اتعودت معاك طول عمرى انا بحب اختك زى مانت بتحب هدير بنت خالتى بس الفرق بينى وبينك ان انا بحاول اخد الخطوه ومش عايز اتعداك علشان كده التلميح كان قدام الكل لانك امنتنى على بيتك وانا ماينفعش اخون الامانه لكن انت بتحب هدير ومش متحرك ولا حتى بتلمح لكن انا علشان عارفك كويس عارف انك بتحبها بس اللى مش قادر افهمه انت ليه مش عاوز تاخد الخطوه
محمد : خايف اخسرها
انا : وانت بتصرفك ده ما انت اكيد هتخسرها تقدر تقولى هتفضل ساكت لحد امتى مش جايز يجى واحد مناسب وياخدها منك ساعتها هتعمل ايه ... انا يوم ماحسيت انى بحب ياسمين قولتهالها صريحه ما خوفتش من حاجه مع ان وقتها كانت كل الظروف ضدى لا شكل ولا فلوس ولاى اى حاجه ماكانش حيلتى غير قلبى كنت مستعد اقدمهولها بس هى خسرتنى بس اللى اكتشفته بعدها انى ماحبتهاش اصلا بس اتعودت عليها جمبى ولما زعلت واتاثرت فى الاول علشان الاهانه مش الرفض ما انا ياما حاولت ارتبط ببنات بس كل مره كان الرد انت زى اخويا كنت ازعل شويه بس بعد كده الحياه كانت تمشى عارف لو ياسمين قالتلى انت زى اخويا كان زمانى زى ما انا هزعل يومين وتعدى لكن زى ماقولتلك اللى اثر فيا الاهانه لكن مع اختك انا اكتشفت انى بحبها من زمان بس انت العقبه اللى كانت قدامى كنت بعاملك انك اخويا واختك تبقى اختى لكن اللى اكتشفته ان انت اخويا بس هى مش اختى هى حبيبتى ومستعد احارب علشان اوصلها مش عاوز اخسرها علشان كده لازم كل خطوه تبقى مدروسه كويس .. وعلى فكره هدير بتحبك وسبب رفضها للعرسان انها بتحبك بس كسوفها مانعها انها تصارحك بحبها لان المفروض انت الراجل وانت اللى تاخد الخطوه الاول زى ما انا عملت كده وقولتلك
محمد : ايه الكلام ده كله
انا : مش قولتلك مابحبش اللف والدوران انا صريح وصارحتك بكل اللى جوايا
محمد : يعنى هدير بتحبنى
انا : ايوه
محمد : زى مانت كنت صريح معايا انا هبقى صريح معاك فاتن بتحبك ومستنيه منك الخطوه مش من دلوقتى لا من زمان وياما حكتلى انها قد ايه بتحبك ومستياك بس برضه كسوفها مانعها
انا : انت بتتكلم بجد
محمد : هو انا امتى كدبت عليك
انا : طب احنا مستنيين ايه
محمد : قصدك ايه
انا : يالا بينا ناخد الخطوه
محمد : ازاى
انا : العيله كلها متجمعه عندك فى البيت يلا نفاتحهم
محمد : صعب
انا : ولا صعب ولا حاجه يفوز باللذات كل مغامر انا رايح دلوقتى اطلب ايد اختك هتيجى ولا ايه ظروفك
محمد : ضربو الاعور على عينه قالك خربانه خربانه يلا بينا
رجعنا البيت تانى وكانو كلهم متجمعين وبيرغو
انا : احضرونا يا جماعه عايزنكم فى موضوع مهم
كلهم فى صوت واحد : خير
انا : ياعمى انت وابويا انا بحب فاتن وعايز اتجوزها
محمد : ياعم ابراهيم انت وابويا انا بحب هدير وعايز اتجوزها
فجأه هدير وفاتن قامو جرى ودخلو الاوضه
انا : قولتوا ايه
كل الستات اشتغلوا زغاريد من الخبر
ابويا : انتو بتزغردوا ليه مش نعرف رأى البنات الاول
خالى : يعنى الكسوف والجرى ده مستنى رأى يلا على البركه
انا : طب هنعمل امتى حفلة الخطوبه
عمى : خلوها على العيد علشان نكون جهزنا نفسنا وعزمنا الناس
ابويا : تمام اللى تشوفه
جوز خالتى : وانا كمان موافق
أنت تقرأ
رواية ( الفتي الشرير ) كاملة
Misterio / Suspensoنتناسى لكننا لا ننسى، احيانا قد نتخلّى عن المحاسبة لكننا لا نسامح.هكذا هي طبيعة الانسان بكل ما فيه من جنون... الخيانة ،الغش ،الاخلاص ،الوفاء لكي نفهم كل انسان يجب علينا فهم ما يدور داخلة من الناحية النفسية، علينا ان نراجع كل الاسس التي تربي عليها كذ...
