#الفتي_الشرير
#الحلقة_ال39
_______________
• نرجع عندى بعد المغرب كنت بتفرج على التليفزيون والباب خبط روحت افتح لقيت واحد انا معرفهوش بس حاسس ان شكله مش غريب عنى وبشبه عليه
انا : ايوه عاوز مين حضرتك
الشخص : انت دياب عبدالرحمن العاصى
انا : ايوه
الشخص : انا محمد ابن عم ابوك .... ويعتبر ابن عمك برضه
انا : هههههه ضحكتنى وانا مليش نفس
محمد : لو سمحت يا دياب ممكن نتكلم جوه علشان الناس متتفرجش علينا
انا : ليه عاوز تقول ايه
محمد : ارجوك متفرجش السكان علينا .... خلينا ندخل نتكلم جوه
طلع باسم على كلامنا يشوف فى ايه
باسم : فى ايه يا دياب .... مين حضرتك
محمد : انا محمد ابن عم دياب
باسم : اهلا وسهلا اتفضل
انا : اتفضل اتفضل لما اشوف اخرتها معاك ايه
دخلنا الشقه وقعدنا
انا : بعد اذنك يا باسم سيبنا شويه لما اشوف الباشا عاوز ايه
باسم : انا هدخل اعملكم حاجه تشربوها
انا : ملهاش لازمه هو هيقول الكلمتين اللى جاى فيهم وهيمشى على طول
باسم : لا ازاى ميصحش لازم يتعشى ويبات كمان
انا : طب روح انت دلوقتى شوف هتعمل ايه
باسم : انا هدخل اجهز عشاء
انا : خير يا ههههه ابن عمى
محمد : انا عارف ان انت زعلان مننا وده حقك ومفيش مخلوق يقدر يلومك
انا : هاه وبعدين .... اظن ان انت مش خابط المشوار ده من البلد لحد هنا علشان خايف على زعلى
محمد : جدك عيان جدا وحالته خطيره ونفسه يشوفك
انا : هههههههه مايولع ولايغور فى ستين داهيه انا مالى
محمد : جدك بقاله شهور بيتعذب بسبب اللى عمله فيك وفى ابوك ومش بيدوق طعم النوم
انا : اهئ اهئ اهئ ترانى تاثرت لحظه ابكى
محمد : يا دياب متهرجش
انا : هو مين اللى بيهرج بالظبط
محمد : انا عارف ان اللى انت شوفته كتير بس ارحم جدك العيان
انا : انت تعرف من فين اللى انا شوفته .... عارف يعنى ايه تعيش فى بلد غريب انت وابوك وامك لوحدكم وانت ليك عيله كبيره فى بلدك .... تعرف يعنى ايه يعدى عليك ايام ابنك عيان فيها وانت مش معاك حق العلاج مع ان ليك عيله كبيره وبتلعب بالفلوس لعب .... عارف يعنى ايه ابوك يموت وعيلتك مترضاش حتى تدفنه عندهم فى مقابرهم .... عارف يعنى ايه تبقى يتيم الاب والام والدنيا بتضرب فيك علشان ملكش ضهر يسندك مع ان عيلتك تسد عين الشمس وكلها رتب فى البلد .... عارف يعنى ايه يعدى عليك رمضان والعيد وانت بتقضيهم لوحدك فى شقتك ملكش حد يونسك ولا يعيد عليك مع ان عيلتك طول رمضان مقضياها عزومات وزيارات لبعضهم وانت ولا فى دماغهم .... لكن انت هتعرف ده كله من فين وانت عايش طول عمرك وسط ابوك وامك وجدك .... اه معلش اذا كنت قولت امك كده من غير ما اقول الهانم والدتك بس هتقول ايه هى دى تربية الخدامه بتاعتكم مع ان ربنا يشهد ان امى عمرها ماخدمت غير فى بيتها .... لكن انتوا صنف نمرود فاكرين نفسكم الاسياد واحنا عبيد عندكم وفاكر انك مجرد ماتيجى تقولى جدك عاوز يشوفك هروحله جرى وابوس ايده ليه انتوا فاكرين نفسكم مين .... عارف يوم ما عمك يموت انا عندى استعداد انزل البلد واوزع على روحه شربات بس للاسف ابويا اللى انتوا اتبريتوا منه ماعلمنيش انى اشمت فى المرض او الموت
محمد : خلصت كل كلامك ولا لسه فى كلام تانى عاوز تقوله
انا : اه فى
محمد : خير فى ايه
انا : عاوزك تقول لعمك ان دياب بيقولك لو كنت بتموت وشوفتى هتخفف عنك انا مش هنولهالك
محمد : براحتك .... انا كدا عملت اللى عليا
انا : طالما عملت اللى عليك يبقى اتفضل اطلع بره
أنت تقرأ
رواية ( الفتي الشرير ) كاملة
Misterio / Suspensoنتناسى لكننا لا ننسى، احيانا قد نتخلّى عن المحاسبة لكننا لا نسامح.هكذا هي طبيعة الانسان بكل ما فيه من جنون... الخيانة ،الغش ،الاخلاص ،الوفاء لكي نفهم كل انسان يجب علينا فهم ما يدور داخلة من الناحية النفسية، علينا ان نراجع كل الاسس التي تربي عليها كذ...
