#الفتي_الشرير
#الحلقة_ال19
___________
* وعدى اليومين اللى باقين فى الرحله عادى مابين فسح ونزول البحر وشراء هدايا لفاتن وخلصنا الرحله وفاتن ومحمد رجعوا البلد وانا واللى معايا رجعنا القاهره والحياه بقيت ماشيه عادى خالص ومحمد فاتح عمى فى موضوعى انا وفاتن وقدر يقنعه وكمان اقنعنا هدير انها تتجوز هى ومحمد واشترى محمد شقه فى المقطم فى نفس العماره اللى انا ساكن فيها علشان بعد مايتجوز يجى يقعد فيها هو وهدير لكن لما ينزل البلد ترجع تقعد فى شقة خالى... ومن ناحيه تانيه ابراهيم كان شغال فى الكورسات اللى بدأ فيها اول مارجعنا من الرحله وامه وابوه حاولوا معاه اكتر من مره يصلحوا العلاقه بينهم بس ابراهيم كان رافض اى كلام منهم لدرجة ان فى مره امه راحتله الشقه طردها وقفل الباب فى وشها .. ومن ناحيه تانيه عند حسين البواب بطمن على اولاده من وقت للتانى واتفقتلهم مع مدرسين مخصوص يروحولهم البيت ده غير مدرسين تانين علشان يعلموهم لغات وكل حاجه .. وفى وسط كل ده اميره كل ماتشوفنى عند خالى تستنانى اخرج وتقف معايا تسأل عليا وبترن عليا تعاكسنى من ارقام غريبه وانا مش برد عليها وبرضه معاكسات البنت اللى كانت فى الغردقه شغاله لحد ماغيرت رقمى علشان ارتاح منهم
* فى يوم كنت قاعد فى كافتريا الكليه لوحدى لان ماكنتش طالبه معايا احضر المحاضره بس الكافتريا كانت زحمه وانا قاعد سرحت فى وشوش الطلبه اللى حواليا وابتديت افكر فيهم واقول ياترى العيال دى بتفكر ازاى ولا بتفكر فى ايه ليه انا ماعيشش حياتى زيهم اخد مصروفى من ابويا كل شهر ابقى ملزوم من حد انا فى الاول كنت فرحان بدور السيطره اللى انا عملته لنفسى ليه ما اعيشش زى اى واحد فى سنى يبقى كل همى اذاكر وانجح وفى الاجازه اتفسح وبعد ما اخلص دراسه ادور على شغل وابتدى حياتى من الاول اكون نفسى وبعدين اخطب وبعد كده اتجوز لكن ارجع اقول انا كده احسن معايا فلوس وخاطب وكلها كام شهر واتجوز البنت اللى بحبها وفى ناس كتير حواليا بتحبنى بس برضه ارجع افكر الاقى كل الناس اللى حواليا بيحبونى علشان فلوسى يعنى لو كنت على قد حالى ياترى الناس اللى حواليا هيتعاملوا معايا ازاى اكيد هيتعاملوا معايا زى زمان قبل ما اتغير ماكنش ليا صحاب غير محمد والباقى كله كلام اهبل يعنى مثلا شلة الولاد اللى قاعدين على الطرابيزه دى وبيلعبوا PS وضاربين الدنيا صرمه ومش بيفكروا فى بكره هما بس عايشين النهارده ولا الشله دى اللى قاعدين مع بعض بيرغوا فى كلام ياترى هما حابين بعض ولا مضطرين يقعدوا مع بعض ولا الواد اللى قاعد مع البنت هناك فى ركن لوحدهم ايه اخر علاقتهم ببعض ياترى هيتجوزوا ولا هياخدولهم يومين مع بعض وكل واحد هيروح لحاله ولا شلة البنات دى ياترى هما اصحاب وبيحبوا بعض ولا مش طايقين بعض وبيجاملوا بعض وخلاص ياترى انا صح فى حياتى وكل اللى بخططله ولا غلط انا اللى داخل عليه صعب ومحدش يستحمله عامل زى اللى بيلعب بالنار ممكن فى اى وقت تحرقه انا اه عاوز اسيطر على العيله بس اكيد هيبقى فيهم اللى عاوز يبقى مكانى وممكن علشان يوصل للى هو عازه يغدر بيا وقتها هعمل ايه وهتصرف ازاى وفعز مانا سرحان وبفكر سمعت صوت واحده بتقولى لو سمحت ممكن اقعد معاك بس الكافتريا زحمه ومفيش مكان اقعد فيه
انا : ايه
البنت : بقولك ممكن اقعد معاك بس الكافتريا زحمه و مفيش مكان اقعد فيه وانت قاعد وحدك
انا : اه اكيد اتفضل اقعدى .. وبعد ماقعدت رجعت سرحت تانى ومخى شغال تفكير
البنت : ايه يابنى انت سرحان فى ايه انا بكلمك وانت مابتردش
انا : معلش اسف دماغى بس مشغوله شويه .. كنتى بتقولى ايه
البنت : لا كنت بعرفك بنفسى .. انا اسمى سلمى
انا : وانا مهيب
سلمى : انا عارفاك
انا : تعرفينى من فين
سلمى : انا معاك فى الدفعه فى نفس الجروب بس مش نفس السيكشن وبعدين هو فى حد فى الجامعه كلها مايعرفش مهيب صقر
انا : ياستى ماتدقيش
سلمى : ايه كنت سرحان فى ايه
انا : لا شوية مشاكل فى الشغل
سلمى : انت بتشتغل ايه
انا : بشتغل نفسى
سلمى : ازاى ده
انا : اصلى مابشتغلش بس بحب اوهم نفسى انى بشتغل واعمل مشاكل فى الشغل وارجع احلها واكافئ نفسى علشان حليتها وحوار كبير كده
سلمى : انت مجنون ولا حاحه
انا : يعنى هو فى حد عاقل دلوقتى كلنا مجانين بس بدرجات متفاوته كل واحد على حسب حياته
سلمى : ايه ده انت فيلسوف بقى
انا : بالعكس ده انا اكتر حاجه بكرهها الفلسفه حتى فى اولى ثانوى يادوب جبت فيها درجة النجاح
سلمى : بالعكس انا كنت بحبها جدا ودايما بحب كتب الفلسفه
انا : انا عمرى ماحبيتها لسبب ان كلها مبادئ واهداف خياليه صعب تتحقق فى عالمنا دلوقتى العالم اللى مابقاش يحكموا اى قانون تيجى تقوليلى فلسفه .. الفلسفه دى تطبيقها فى اليوتبيا اللى هى اصلا خياليه ومش موجوده العالم دلوقتى مابيحكمهوش غير قانون واحد بس وهو قانون المصلحه يعنى طالما انت وراك مصلحه تبقى حبيبى مفيش منك فايده ارميك فى اقرب صفيحة زباله
سلمى : ايه يابنى ليه انت متشائم كده .. مع انى بسمع عنك كلام تانى خالص
انا : ايه بتسمعى ايه
سلمى : بسمع انك فرفوش وبتحب الهزار والضحك ليه كده قالبها هم ونكد
انا : معلش اصلك جيتيلى فى يوم انا فيه مش فى المود حتى علشان كده مادخلتش الحاضره
سلمى : ولا يهمك انا بحب اسمع الناس فضفض
انا : انا عمرى ماعرفت افضفض لحد ابدا طول عمرى بفضفض لنفسى
سلمى : فين اصحابك اللى دايما بيقعدوا معاك
انا: كلهم فى المحاضرات ... وانا قاعد مع سلمى تليفونى رن وكان محمد
انا : معلش هرد على المكالمه
سلمى : اتفضل
أنت تقرأ
رواية ( الفتي الشرير ) كاملة
Mystère / Thrillerنتناسى لكننا لا ننسى، احيانا قد نتخلّى عن المحاسبة لكننا لا نسامح.هكذا هي طبيعة الانسان بكل ما فيه من جنون... الخيانة ،الغش ،الاخلاص ،الوفاء لكي نفهم كل انسان يجب علينا فهم ما يدور داخلة من الناحية النفسية، علينا ان نراجع كل الاسس التي تربي عليها كذ...
