#الفتي_الشرير
#الحلقة_ال29
______________
وقفنا الجزء اللى فات لما كنت قاعد انا وابويا وعمى بنتكلم فى موضوع جواز ابويا من ابتسام
واحنا قاعدين مع بعض دخلت علينا الشغاله وقالت ان فى واحد عايزنى بره وطلعت اشوف مين ده ولقيت اغرب حد ممكن اشوفه دلوقتى ... كان الراجل اللى انقذنى من رجالة مازن ابن جلال ابواليزيد ... ووقتها ماقاليش اى حاجه عن نفسه او عن اللى مشغله ... وقتها قولت فى بالى يادى اليوم اللى مش هيخلص ده هى الحكايه ناقصه ده كمان
وخرجتله ومعايا ابويا وعمى
الراجل : ممكن يابشمهندس نتكلم كلمتين على انفراد
انا : ليه يعنى هو فى حد غريب ده ابويا وعمى
الراجل : معلش يابشمهندس انا مش هاخد من وقتك اكتر من خمس دقايق
انا : طب تعالى اتفضل فى المكتب ... واخدت الراجل المكتب وقعدنا ... تشرب ايه
الراجل : مفيش داعى انا زى ماقولت لحضرتك مش هاخد من وقتك كتير
انا : طب ممكن فى الاول اعرف انا بكلم مين
الراجل : جاسر ... اسمى جاسر
انا : تشرفنا ياسيدى .... ممكن بقى اعرف انت ايه حكايتك بالظبط وجاى عاوز منى ايه
جاسر : انا مجرد مرسال ... ومبعوت معايا هديه بمناسبة فرحك
انا : مرسال من مين وايه هى الهديه دى
جاسر : مرسال من مين دى اسف مش مسموحلى اقول لكن بالنسبه للهديه اتفضل ... وطلع علبه كبيره
انا : ايه العلبه دى
جاسر : افتحها وانت تعرف
واخدت العلبه وفتحتها وكان فيها ساعه مكتب قديمه جدا وكبيره
انا : ايه الساعه دى
جاسر : حضرتك دى هديه بمناسبة فرح حضرتك
انا : طب وايه مقابل الهديه دى
جاسر : اجابة السؤال ده مش عندى ... وصدقنى انا بجد معرفش اجابه لاى سؤال ممكن تسأله انا مجرد مرسال مش أكتر
انا : ماشى ياجاسر
جاسر : عن اذن حضرتك ممكن استاذن
انا : اتفضل مع السلامه
* وقام جاسر مشى وانا قعدت افكر فى اللى بيحصل ومش عارف اعمل ايه الدنيا متلخبطه خالص معايا يعنى هلاقيها من فين ولامن فين ... مشكلة ابويا ولا حكاية جوز خالتى ومريم اللى مش فاهم بيعملوا ايه ولا الناس اللى كل شويه يبعتولى حاجه هتقلب دماغى اكتر ماهى مقلوبه ولا الشك اللى دخل جوايا من ناحية كل واحد من اللى حواليا ... انا خلاص مابقتش فاهم حاجه ولا عارف اى حاجه .... وفى عز تفكيرى دخل عليا ابويا وعمى ومحمد
ابويا : مين الراجل ده يا مهيب
انا : ده الراجل اللى انقذنا من رجالة ابن جلال
ابويا : طب عرفت هو تبع مين
انا : لا معرفتش ... وهو مارضيش يقول حاجه
محمد : طب ايه اللى جابه
انا : جايبلى هديه بمناسبة فرحى
عمى : هدية ايه
انا : الساعه دى هى الهديه
بصوا فى الساعه واستغربوا
ابويا : الساعه دى ازاي وصلت للناس دى
انا : انت تعرف الساعه دى ياحج
ابويا : انا مش متاكد اذا كانت هى اللى فى بالى ولا لا
عمى : مستحيل تكون اللى فى بالك
انا : ماتفهمونى ايه فى بالظبط
ابويا : مفيش يا ابنى دى ساعه قديمه وكان عندنا زمان ساعه تشبهلها بس اتكسرت وجدك اخدها يصلحها بس بعد كده ماشوفنهاش تانى ولا اهتمينا بيها
انا : طب ولنفرض ان الساعه دى هى اللى انت بتتكلم عليها ايه بقى اللى وصلها للناس دى
عمى : ماهو علشان كده اما بقول انها تشبهلها
انا : حتى لو كانت تشبهلها انتوا شايفين ان ده منطقى
أنت تقرأ
رواية ( الفتي الشرير ) كاملة
Misteri / Thrillerنتناسى لكننا لا ننسى، احيانا قد نتخلّى عن المحاسبة لكننا لا نسامح.هكذا هي طبيعة الانسان بكل ما فيه من جنون... الخيانة ،الغش ،الاخلاص ،الوفاء لكي نفهم كل انسان يجب علينا فهم ما يدور داخلة من الناحية النفسية، علينا ان نراجع كل الاسس التي تربي عليها كذ...
