#الفتي_الشرير
#الحلقة_ال28
____________
وقفنا الحلقة اللى فاتت لما كنت راجع انا ومحمد وهدير وفاتن وطلعوا علينا رجالة مازن ابو اليزيد علشان يقتلونى لكن ظهر رجاله تانيه انقذونى بس ماقالوش هما تبع مين ولا بيعملوا كده ليه ... بعد كده رجعنا البيت وبعد ما وصلت البيت جمعت كل الحراسه الموجوده واخدت 20 واحد منهم
محمد : انت هتعمل ايه
انا : حقنا مش لازم يبات ليله واحده بره
محمد : يعنى ايه
انا : يعنى لازم مازن يتقرص ودنه
محمد : وهتعمل ده ازاى
انا : انت مالكش دعوه بالموضوع ده .... خليك انت هنا مع الرجاله واحرس البيت وانا هتصرف
محمد : فهمنى بس هتعمل ايه
انا : احنا لو سكتنا على اللى حصل ده يبقى هنتركب فى البلد ومش هنعرف نرفع راسنا ابدا
محمد : طب فهمنى هتعمل ايه
انا : بعد ما ارجع هفهمك
واخدت الرجاله وطلعت على فيلا جلال ابواليزيد واقتحمناها ومسكنا الحراسه اللى فيها وربطناهم وخرجلنا جلال
جلال : عاوز ايه يا مهيب
انا : جاى اربى ابنك اللى انت ماعرفتش تربيه ... ابنك بعتلى رجاله علشان يقتلونى ويخطفوا مراتى وانت عارف كويس اللى بيتعرض عندنا للحريم بيحصل فيه ايه
جلال : طب استنى وانا هجبلك حقك
انا : انا مش محتاج حد يجيبلى حقى ... انا بعرف اخد حقى بنفسى
جلال : ودى ما اسمهاش اصول ... انت جيتلى وانا هرجعلك حقك .... ودخل جاب ابنه مازن من جوه البيت ووقف قصادى
انا : انت اتعرضت لمراتى وعلمت عليك وكان ممكن وقتها اقتلك ... لكن انك تبعت شويه عيال علشان يقتلونى دى انا مش ممكن اعديها ولولا ان ابوك راجل محترم وبينا عيش وملح كان زمان ليك عندى تصرف تانى وابوك عارف ايه هو التصرف ده
جلال : حقك عليا يا مهيب وليك عندى انا هتصرف مع مازن
انا : خلاص ياجلال باشا انا هسيبك تربيه بمعرفتك وتفهمه ان لو فكر يتعرضلى تانى انا وقتها مش هرجعلك زى دلوقتى وهتصرف بنفسى
جلال : خلاص يا مهيب ... تعالى اتفضل اشرب حاجه وخد واجبك
انا : لا شكرا ياجلال باشا انا لازم امشى
جلال : ماينفعش اللى بتقوله ده ... تعالى معايا
بعد كده دخلت انا وجلال مكتبه وقعدنا
جلال : اللى انت عملته ده غلط يا مهيب بس اللى مانعنى من انى ارد عليك حاجتين اولهم ان ابنى هو اللى بدأ بالغلط
انا : وايه الحاجه التانيه
جلال : الحاجه التانيه دى ماقدرش اقولك عليها دلوقتى بس اكيد هتعرفها فى الوقت المناسب
انا : ده لغز ولا ايه
جلال : ولا لغز ولا اى حاجه ... كل اللى اقدر اقولهولك ان انت محمى من ناس جامده جدا ... واظن انت شوفت ازاى قدروا ينقذوك من شوية العيال اللى بعتهوملك مازن
انا : بعيدا عن الناس اللى انت بتتكلم عليهم دول ... انت عارف كويس ان مهيب صقر مش حاجه ساهله علشان حد يحمينى ... انا بعرف احمى نفسى كويس اووووى وشوية العيال اللى بعتهم ابنك دول مالهمش لازمه اقدر اخلص عليهم فى دقايق ولو كان حصلى اى حاجه كنت هتدفع التمن غالى مش انت بس لا ... ده انت وابنك وعيلتك كلها وانت شوفت بنفسك انى ماهمنيش انت مين ودخلت بيتك من غير ما اعرف مين بيحمينى ... اظن الرساله وصلت
جلال : ماتبقاش عصبى كده زى جدك ... خليك زى ابوك وعمك ناس هاديه وبتتصرف بعقل وحكمه ... لكن انت طالع لجدك صعب ومش بتتفاهم
انا : انا صعب ومش بتفاهم فى الحاجه الواضحه اللى مابتحتملش ملاوعه
جلال : انت برضه لسه صغير والصوره مش واضحه قدامك
انا : طب تعلالى فى الدغرى وقولى الموضوع من الاخر
جلال : صدقنى انا معرفش حاجه ... كل اللى انا بعمله انى بنفذ اوامر ... والاوامر اللى عندى انى احميك من اى خطر لكن ليه معرفش
انا : ومين اللى أمرك بكده
جلال : اعذرنى مش هقدر اقولك اكتر من كده ... بس انت قريب جدا هتعرف كل حاجه
انا : على العموم مسيرى هعرف ... بس عاوزك تبلغهم ان مهيب صقر مش محتاج حماية اى حد ومش بيخاف من حد وهما لو عاوزين منى حاجه انا مكانى معروف ... عن اذنك
أنت تقرأ
رواية ( الفتي الشرير ) كاملة
Tajemnica / Thrillerنتناسى لكننا لا ننسى، احيانا قد نتخلّى عن المحاسبة لكننا لا نسامح.هكذا هي طبيعة الانسان بكل ما فيه من جنون... الخيانة ،الغش ،الاخلاص ،الوفاء لكي نفهم كل انسان يجب علينا فهم ما يدور داخلة من الناحية النفسية، علينا ان نراجع كل الاسس التي تربي عليها كذ...
