Marmalade [Own Creation]

4

Unicode

အပိုင်း - ၄

"မင်္ဂလာပါ ဒီနေ့ လူသစ်လေ့ကျင့်ရေးအစီစဉ်ကို လာရောက်ပေးတဲ့အတွက် ကျေးဇူးတင်ပါတယ်!"

Cross University ၏ ခရမ်းပြာနှင့်အဖြူစပ် အားကစားဝတ်စုံကို ဝတ်ဆင်ထားသည့် တတိယနှစ် ကျောင်းသားသည် ဘောလုံးကွင်းထဲတွင် ညီညီညာညာ တန်းစီရပ်နေသည့် ပထမနှစ်များဘက် မျက်နှာမူကာ ပြောလေ၏။

အရပ်ရှည်သည့် ကျောင်းသားထဲတွင် ပါဝင်သည်မို့ နိုင်းချင်းသည် အနောက်ဘက် ယောကျာ်းလေး များတန်းတွင် ရပ်နေရသည့်အပြင် သူ့ထက်အရပ်နိမ့်သော ယောကျာ်းလေးများ၏ နောက်တွင်ပင် ရှိနေရသေး သည်။ သူ့မျက်လုံးများသည် သူတို့လို အားကစားဝတ်စုံဆင်တူဝတ်ဆင်ထားပြီး ကြက်သွေးရောင်ရင်ထိုးများ ဝတ်ဆင်ထားသည့် လေ့ကျင့်ရေးအဖွဲ့ထံတွင် ရှိနေ၏။ မနေ့က အားကစားခန်းတွင်ရပ်သည့် ပုံစံအတိုင်း လေ့ကျင့်ရေးအဖွဲ့ဝင်များသည် သူတို့နှင့်မျက်နှာချင်းဆိုင်တွင် တညီတညာ မျဉ်းတဖြောင့်တည်း စီတန်းရပ် နေပြီး အားသစ်ကလျှင် ခေါင်းဆောင်ဖြစ်သည်မို့ အရှေ့သို့ထွက်ကာ အမိန့်ပေးနေခြင်းဖြစ်သည်။

"မင်းတို့ ဘောလုံးကွင်း ၁၀ ပတ်ပြေးရမှာဖြစ်ပြီး တစ်ခုခုအဆင်မပြေလာရင် ဆေးဘက်အကူအညီ အဖွဲ့ကို ခေါ်လို့ရပါတယ်"

သူတို့လိုပင် အားကစားဝတ်စုံများဝတ်ထားပြီး အနက်ရောင်တွင် အဖြူရောင်ကွပ်ထားသော ရင်ထိုးများတပ်ထားသည့် ကျောင်းသားများကို ပထမနှစ်များလှမ်းကြည့်၏။

"ကျွန်တော်တို့ကတော့ မင်းတို့နဲ့အတူ လိုက်ပါပြေးသွားမှာဖြစ်ပါတယ် နားမလည်တာရှိပါသလား!"

"မရှိပါဘူး!"

"မင်းတို့အသံ ဒါအကုန်ပဲလား!"

"မရှိပါဘူး!!!"

"ဒါဆို စကြတော့!"

အမိန့်သံအဆုံးတွင် တတိယနှစ်များသည် ပထမနှစ်များရှေ့မှ အနှေးပြေးသည့် အနေအထားဖြင့် ထွက်သွားကြ၏။ ပထမနှစ်များသည် တတိယနှစ်တို့ ပြေးသည့်ပုံစံအတိုင်း ခပ်ဖြည်းဖြည်းသာ လိုက်၍ ပြေးလာကြသည်။ ပုံမှန်အားကစားလုပ်လေ့မရှိသူအတွက် ဘောလုံးကွင်း (၁၀)ပတ် ဟူသည့် ပမာဏသည် မနည်းပေ။ အမြဲတမ်း အလေ့အကျင့်ရှိနေသည့် လူများအတွက်သာ အဆင်ပြေသည့် ပမာဏတစ်ခုဖြစ်သည်။