Marmalade [Own Creation]

22

Unicode

အပိုင်း - ၂၂

"မင်းနဲ့ အဲ့ဒီကောင်လေးကြား တစ်ခုခုဖြစ်ထားလား"

လီမွန်တီးသောက်နေရင်းက ဖြိုးဝေကိုကျော်ပြီး အပြင်ဘက်သို့ အားသစ်ကြည့်သည်။ အတန်းအပြင် တွင် သူ့ကို လာရှာနေသည့် ကောင်ကလေးကြောင့် အားသစ် ပြုံးပြ၏။

"နည်းနည်း..."

"ရှောင်နေတာက ဖြေရှင်းနည်းတော့ မဟုတ်ဘူးနော်"

ဝေဖြိုးကပါဝင်ပြောလာသဖြင့် အားသစ်သည် အမြွှာနှစ်ယောက်ကို ပြုံး၍ကြည့်၏။

"ဒီညနေ ငါတို့သွားသောက်ကြမလို့ မင်းလိုက်ဦးမလား"

နေကောင်းကာစ အားသစ်ကို တစ်ဖွဲ့လုံးက မေးကြ၏။ အားသစ် အနည်းငယ်စဉ်းစားပြီးနောက်...

"ဟင့်အင်း... မလိုက်တော့ပါဘူး... ငါနေလို့ သိပ်မကောင်းသေးဘူး"

"အင်း... မင်း မြန်မြန်နေကောင်းသွားဖို့လိုပါတယ်"

အရိုးခံသူငယ်ချင်းများကို အားသစ်ကြည့်နေလိုက်သည်။ မည်သူက သူက ယခင်အားသစ် မဟုတ်ဘူး ဆိုသည်ကို မရိပ်မိခဲ့။ အားသစ်၏ ခန္ဓာကိုယ်ထဲတွင် တစ်လျှောက်လုံးအတူ နေထိုင်ခဲ့ပြီးသားမို့ အားသစ်၏ အမူအကျင့်များကို သူ ကောင်းကောင်းနားလည်ပြီးသားပင်။ အားသစ်စားတတ်သည့် အရာများ၊ သောက်တတ်သည့် အရာများကို သူ သိပြီးသား။

"ဒါနဲ့မင်းရဲ့နို့တီးကို မသောက်တော့ဘူးလား"

အားသစ်သောက်နေသည့် လီမွန်တီးကို ကြည့်ပြီး ဉာဏ်လင်းမေး၏။

"ငါကြည့်နေတာ တစ်ရက်နှစ်ရက်ရှိပြီ မင်း လီမွန်တီး သောက်နေတာလားလို့"

အားသစ် ခြောက်ကပ်စွာရယ်ကာ...

"ဘာလဲ ငါက Milk Tea ပဲ သောက်နေရမှာလား"

ဉာဏ်လင်း၏ မျက်ခုံးများတွန့်ချိုးသွား၏။ အားသစ်သည် Milk Tea ကို ဘယ်သူဘာပြောပြော နို့တီးဟုသာ ခေါ်လေ့ရှိသောသူပင်။ အားသစ်ပြောင်းလဲနေသည်ဟု ထင်နေသည်က သူတစ်ယောက်တည်း လား။ အားသစ်နှင့် တစ်ဖွဲ့လုံးစကားပြောနေသည်ကို ကြည့်ပြီး ဉာဏ်လင်းတွေးနေ၏။