Marmalade [Own Creation]

26

Unicode

"ဝင်လေ..."

အိမ်အပေါက်ဝတွင် ခြေစုံရပ်နေသည့် အားသစ်ကို သောမတ်စ်လှည့်ကြည့်ပြော၏။ အိမ်အထဲဘက်သို့ ဝင်နေရင်း အပေါ်ကြယ်သီးချွတ်ကာ သူ့ကိုပြောလာသည့် သောမတ်စ်ကို ကြည့်ပြီး အားသစ် တံတွေးတစ်ချက် မြိုချသည်။

ခြင်္သေ့ဂူထဲဝင်ရမှာကို ဘယ်သူက မကြောက်ဘဲနေပါလိမ့်မလဲ။ ဒါပေမဲ့ ...

စိတ်တင်းပြီးနောက် အားတင်းကာအထဲသို့ ဝင်လိုက်လာသည်။ အိမ်အတွင်းပိုင်းကို မြင်ရချိန်တွင် အားသစ်စကားမဲ့သွား၏။

"ဘာလဲ..."

"ဟင့်အင်း ဘာမှမဟုတ်ပါဘူး"

သူ ထင်ထားသလို မဟုတ်ဘဲ အိမ်အတွင်းပိုင်းသည် အလွန်ကို သာမန်ဆန်နေခဲ့၏။ လူလတ်ပိုင်း အရွယ် အမျိုးသားတစ်ဦး နေနေသည့် အိမ်တစ်အိမ်လိုသာ။ ရှုပ်ပွနေသည့် ဧည့်ခန်းကို အားသစ်ကြည့်သည်။

သေချာတယ်...။ ဒီလူမှာ Partner တစ်ယောက်မရှိဘူး။ မဟုတ်ရင် သူ့အိမ်က အခုလိုမျိုး ရှုပ်ပွနေမှာ မဟုတ်ဘူး။

သောမတ်စ်သည် မီးဖိုခန်းဘက်သို့သွားပြီးနောက် ရေတစ်ခွက်သွားခပ်ကာ အပြင်သို့ ပြန်လျှောက် လာသည်။ ဧည့်ခန်းအဝတွင် ရပ်နေသေးဆဲဖြစ်သော အားသစ်ကို တစ်ချက်ဝေ့ကြည့်ပြီး ဧည့်ခန်းရှိ ဆိုဖာတွင် ခပ်တည်တည်ဝင်ထိုင်၏။ မလျှော်ရသေးသည့် အဝတ်များပုံထားသည့် ဆိုဖာပေါ်သို့ ထိုင်ချလိုက်သည့် သောမတ်စ်ကို အားသစ်ကြည့်သည်။

"......"

"မင်း စိတ်ထဲ ရှုပ်ပွနေတယ်ထင်ရင် ဧည့်ခန်းရှင်းလိုက်လေ..."

အခိုင်းခံလိုက်ရသည့် ကောင်ကလေးသည် ခိုင်းသူအမျိုးကိုသားကို မျက်လုံးစွေကြည့်သည်။ စာအုပ်များ ပလဲပွနေသလို တစ်အိမ်လုံးရှိသမျှ ပန်းကန်အကုန်ထုတ်စားထားသည့်အလား စားပွဲပေါ်တွင် ဒီအတိုင်း တင်ထားသည့် ပန်းကန်များနှင့်ကော်ဖီခွက်များကို ကြည့်၏။

"ကိုယ့်ဘာသာရှင်းလေ..."

ခုံတစ်လုံးလိုက်ရှာပြီးနောက် ထိုအမျိုးသားနှင့်မလှမ်းမကမ်းတွင် အားသစ်ထိုင်လိုက်၏။ သောမတ်စ်က အန္တရာယ်ရှိသည့် လူတစ်ယောက်နှင့်မတူ။ သူ့ကိုကြည့်ရသည်မှာ အရွယ်အစားအလွန်ကြီးမားသော ကျားသစ်နက်တစ်ကောင်နှင့်တူသည်။ ထိုကျားသစ်နက်သည် အလွန်ပင် ပျင်းရိတတ်ပုံရသည်။