Marmalade [Own Creation]

11

Unicode

ညဘက်လူခြေတိတ်နေသည့်အချိန်တွင် အခန်းတစ်ခု၏ Lock Code ပွင့်သွား၏။ တိတ်ဆိတ်သည့် အချိန်တွင်မို့ တီခနဲအသံတစ်ချက်သည် လူသူမရှိသည့် လျှောက်လမ်းတွင် ပျံ့လွင့်သွားသည်။ အခန်းအားလုံးက အသံလုံအခန်းဖြစ်သည်မို့ မည်သူတစ်ယောက်ကမျှ ထိုအသံကို မကြားလိုက်။ တစ်စုံတစ်ယောက်သည် ပွင့်သွားသည့် အခန်းထဲသို့ ခိုးကြောင်ခိုးဝှက်ဖြင့် ဝင်သွားကာ တံခါးကို အထဲမှနေ လောခ့်ပြန်ချလိုက်၏။

ညအိပ်မီးသာဖွင့်ထားသည့် အခန်းတွင် အလင်းရောင်သည် ပျပျသာ ရှိသည်။ အခန်းတွင်းရှိလေထု ဖိအားသည် အပြင်ကထက် လေးလံနေ၏။ အခန်းထဲသို့ ပိုင်ရှင်မသိအောင် ခိုးဝင်ခဲ့သူသည် အကြောက်အလန့် မရှိစွာဖြင့် အခန်းအတွင်းပိုင်းသို့ လျှောက်လာခဲ့သည်။ ကျောင်းသားအဆောင်၏ အခန်းဖွဲ့စည်းပုံသည် ရိုးရိုးရှင်းရှင်းသာ အခန်းကျယ်တစ်ခုနှင့် ရေချိုးခန်းအိမ်သာအတွက် အခန်းငယ်တစ်ခုသာ ရှိသည်မို့ အားလုံးကို ဝင်လာကတည်းက ရှင်းရှင်းလင်းလင်း မြင်နိုင်ပေ၏။

ထိုအခန်းတွင်နေထိုင်သူသည် တတိယနှစ်ကျောင်းသားတစ်ဦးဖြစ်ပြီး ထိုကျောင်းသားသည် လွန်ခဲ့သည့် နှစ်ရက်က နာမကျန်းဖြစ်သည်ဟူသည့် အကြောင်းပြချက်ဖြင့် ပျောက်ချင်းမလှပျောက်နေသည့် လေ့ကျင့်ရေး အဖွဲ့ခေါင်းဆောင်လည်းဖြစ်သည်။

အခန်းတွင်းသို့ ဝင်ရောက်လာသူသည် ခုတင်ထက်ဆီသို့ လှမ်းကြည့်၏။ နေမကောင်းသည့် သူသည် ခုတင်ပေါ်တွင် ရှိနေသင့်သည့် နာမကျန်းဖြစ်နေသူသည် ခုထင်ထက်တွင် မရှိနေ။ ရေချိုးခန်း၊အိမ်သာ၏ ခပ်ဟဟဖြစ်နေသည့် တံခါးကြားမှ အလင်းရောင်ကို မြင်လိုက်သည်မို့ အခန်းပိုင်ရှင်သည် ရေချိုးခန်းထဲတွင် ရှိနေမည်ဟု ခိုးဝင်လာသူကောင်လေးသည် တွက်ဆလိုက်သည်။

မည်သည့်စိုးထိတ်မှုမှ ရှိမနေဘဲ စာကြည့်စားပွဲရှိ ခုံကိုယူပြီး ဝင်လာသူသည် ထိုင်နေလိုက်၏။ ရေချိုးခန်းထဲရှိ ရေသံကို အပြင်တွင် ထိုင်နေသူသည် နားစွင့်နေခဲ့သည်။

နေမကောင်းတဲ့လူက ညဘက်ကြီးတော့ ရေချိုးစရာမလိုဘူးမဟုတ်လား။