Marmalade [Own Creation]

9

Unicode

အပိုင်း - ၉

အခန်းထဲရောက်သည်နှင့် ကျီးကန်းတောင်းမှောက်ကြည့်နေသည့် ခန့်ညီကို အားသစ် စူးစမ်းသည့် မျက်လုံးများဖြင့် ကြည့်နေ၏။

'သူက ဘာလို့ဒီလောက်ပျော်နေရတာလဲ'

အားသစ်၏ အတွေးကိုကြားနေရသည်မို့ အိန္ဒြေတစ်ချက်မှ မရသည့် ခန့်ညီကို နိုင်းချင်း ချောင်းဟန့်၏။

"အဟမ်း"

မိမိ Idol အိမ်သို့ အလည်သွားခွင့်ရသည့် မိန်းကလေးပရိသတ်တစ်ယောက်လို စိတ်လှုပ်ရှားကာ အကုန်လိုက်ကြည့်နေသည့် ခန့်ညီတစ်ယောက် နိုင်းချင်းချောင်းဟန့်သံ ကြားမှသာ ကိုယ်ရှိန်သတ်တော့၏။ သူ့ကို မျက်ခုံးများတွန့်ချိုးပြီး နားမလည်သလိုကြည့်နေသည့် အားသစ်ကို သွားဖြူဖြူများ ပေါ်အောင် ရယ်ပြကာ...

"အဟီး... စီနီယာအဆောင်ကို ဝင်လာရတာကို ကျွန်တော် စိတ်လှုပ်ရှားနေလို့ ပြီးတော့ လေ့ကျင့်ရေး အဖွဲ့ခေါင်းဆောင်ရဲ့ အခန်းကို ဝင်ရတာကလည်း စိတ်လှုပ်ရှားစရာကောင်းတယ်လေ"

ထိုစကားကို အားသစ် မည်သို့တုံ့ပြန်ရမှန်းမသိ။ အားသစ်၏ အနေရခက်နေသည့် ဟန်ကြောင့် ခန့်ညီရယ်ကာ...

"နိုင်းချင်းက ကံကောင်းလိုက်တာ... အစ်ကိုနဲ့ဘေးချင်းကပ်အခန်းမှာ နေနေရတယ်"

'အာ... သူတို့က မရှင်းမရှင်းပဲ တစ်ချိန်လုံး နိုင်းချင်းကခန့်ညီကို မထိတထိ လုပ်ဖို့ စဉ်းစားနေသလို ခန့်ညီကလည်း နိုင်းချင်းကို သဝန်တိုနေတာပဲ'

"အဟွတ်"

အားသစ်၏ အတွေးကိုကြားနေရသည့် နိုင်းချင်းတစ်ယောက် တံတွေးသီးသွားတော့သည်။ အလိုမကျ သည့် မျက်နှာဖြင့် အားသစ်ကို နိုင်းချင်းလှည့်ကြည့်၏။ ရုတ်တရက်ကြီး ချောင်းထဆိုးသည့် သူ့ကို အားသစ် နားလည်ပုံမရ။

"ကျွန်တော်တို့ အခုအရေးကြီးတဲ့ဟာကိုပဲ အရင်ပြောတာပေါ့ အစ်ကို့သူငယ်ချင်းရဲ့အကြောင်းကို ဖိုရမ်မှာ ဇာတ်လမ်းအနေနဲ့ရေးပြီး ရေးတဲ့လူက Stalker လိုတောင် ဖြစ်နေတယ်လို့ အစ်ကိုပြောတဲ့အတိုင်း ငခန့်ကို ကျွန်တော် ပြောပြထားလိုက်တယ်"