حنين الدم للدم لهجة عراقية وتتوفر فصحى على مكتبة نور

الفصل الاول

السلام عليكم جميعا رمضان مبارك

اتمنى يعجبكم الفصل وراح احاول انزل كل يوم فصل بس تعرفون هالشي صعب اذا ماكو تفاعل فرجاء لا تنسون تصوتون للقصة وتعلقون وشوفوا بقية القصص المنشورة على الصفحة ان شاء الله تعجبكم

ملاحظة كلش مهمة: القصة متوفرة بنسخة فصحى كتاب الكتروني او ابحثو عنها في النت ستجدوها بالتأكيد فصحى.

حنين الدم للدم باللهجة العراقية

كتابة رؤى صباح مهدي

الفصل الاول

مشت من جوة شتلة عنب جذورها منبتة بالكاع واوراقها الخضرة بريحتها الحلوة صاعدة على ساند خشبي مصنوع بمهارة يغطي سقف الحديقة الخضرة اليانعة. رحمة بنت الشيوخ قادتها رجلها لغرفة عمها النايم على سرير فخم من الخشب العراقي الاصلي مصنوع حتى يوالم شيخ الغشيرة من جان بايام عزه المنتهية. ما صادفها اي احد من عائلة عمها بس المرة الجبيرة الي تدير بالها على شؤؤن البيت فتحت الها الباب ورجعت بسرعة تراقب القدر على النار لا يحترك الاكل. تنهدت رحمة بحزن على عمها شيخ راهي وهي تشوفة على فراش المرض ضعيف تعبان اذاه المرض هواي وتسائلت بينها وبين نفسها وهي دتغيرلة الحلول الملحي "حال الدنيا شلون تغير الانسان من شيخ عشيرة والكل يخاف منه الى رجال مريض تعبان بالكوة يتحرك"

كلش ضاجت لخاطر عمها وهو جان يحبها ومدللها مثل ما يدلل بنته الضغيرة الي عمرها قريب من عمر رحمة ولهذا جانت رحمة حيل تداري وتدير بالها عليه مثل المي بالصينية وحست ان هي سوت الصحيح من دخلت معهد تمريض وقت الي نصحها بي راهي وما جانت تعرف ان هي راح تكون الملاك الي يسهر على راحته. فتح راهي عيونه التعبانة يباوع على وجهها الحنطاوي وخدودها المحمرة بسبب الحر وكال بصوت خامل:

-رحمتي؟!

فرحت كلش من سمعت صوته وظهرت على شفايفها ابتسامة رحيمة وساعدته حتى يكعد بارتياح وخلت وراه مخاديد وقالت دتجاملة:

--عمي اليوم قررت ادورلك عروس ما شاء الله راجع شباب

ضحك وعينه عليها تحطلة حبات الدوة بكوب بلاستيكي صغير وتصبلة مي عذب بكلاص:

-ورة الحجية الله يرحمها ما عندي اي حاجة بالنسوان لان قلبي ورة موتها ماعندة شغل غير يترحم عليها ويتذكر محاسنها

هزت رحمة راسها بالايجاب وهي تتذكر شغلات بسيطة عن ذيج المرة الطيبة الودودة. انطت الحبوب لعمها فبلعها بسرعة وشرب كوب المي وقالتلة رحمة:

-عمي تريد نطلع نفتر شوية بالبستان نشتم هوة واذا الدنيا حارة نكعد جوة شتلة العنب ونرش مي على التراب ونسترجع احلى ذكريات

تعرف رحمة ريحة التراب المرشوش بالمي اله اثر حلو كلش على النفس وتتفهم ولاء عمها لزوجته الي ماتت من سنين لان هي نفسها عدها ولاء للشخص الي شاغل بالها وريحة التراب تربطها بهذا الولاء