حنين الدم للدم لهجة عراقية وتتوفر فصحى على مكتبة نور

الفصل 16

تصويت يابة لا تنسون 

حنين الدم للدم

كتابة رؤى صباح مهدي

الفصل 16

غسل رزاق راسه بالمي البارد عسى ولعل يخف الصداع الي ديحس بي. رغم الجو بارد بالغرفة القديمة الي ماجرها هو غسل راسه بالمي البارد وانتظر شوية يخف الصداع بعدين بدل هدومة ولف على راسه كوفية بيضة وطلع حتى يشتري اكل بالشارع المقابل جان اكو رجال يبيع لحم مشوي يشوي على الفحم وويا مقبلات وخبز كعد على وحدة من الكراسي البلاستيك المطكعة وطلب بعدين ظل صافن على الميز الي عليه بقايا اكل صافن بدون ما يتحرك اي حركة ورة 10 دقايق انتبه على صوت العجوز الي قابلها الليلة السابقة تصيح هنا وهناك دار راسه يمنة ويسرة يدور عليها فشافها من بعيد دتمشي على كيفها على ظهرها الجيس الاسود مالتها وتكدي فلوس من الناس بعضهم ينطوها وبعضهم يطردوها هي وحظها ركض الها وحاجاها:

-خالة تذكريني

ظلت عاين عليه بعدين قالت له:

-تذكرتك!

ما عرف اذا صدك تذكرته لو جانت هيج تكول بس حتى ميكول عليها خرفانة. عزنها على العشا فتبسمت فرحانة ومشت وياه بخطوات سريعه ورة ما شال جيسها عنها وكعدها على الميز مالته وجان الاكل مالته جاهزفنطاه الها وطلب بعد وقال الها:

-اطلبي اي شئ تشتهي واني اشتريه الج

باوعتله بعيون راضية ومرتاحة وخدودها انتفخت من كد الاكل الي حطته بحلكها وبعدين رجعت تلوك الاكل الي بداخل حلكها وهوظل ينتظر الاكل الي طلبة مرة لخ ورة ما اكلت طلبت بعد مرتين وختمت اكلها بالجاي وابتسامة شبع وراحة على وجهها وسالها رزاق:

-ماعندج اقارب تروحين تعيشين يمهم؟

ردت عليه:

-ما اروح حتى لو عندي احد بنتي ضايعة لازم الكاها

سألها يريد يسولف وياها اكثر:

-كوليلي خالة شلون اختفت بنتج

اخذت نفس طويل وبعدين بدت تحجي كانما جانت تنتظر احد يسألها حتى تحجي:

-جانت بلقيس كلش حلوة بيضة بلون الحليب شعرها اسود عيونها سودة جبيرة مثل عيون الغزلان مثل كل بنية عدها احلام جبيرة ماجان سهل تحققها مارضت بالقليل الي عدنا مثل اخوها واختها جانت دائما تقول القليل للضعفاء ورغم احنة فقرة بس بلقيس دائما جانت تلكة شغل وتجيب النا فلوس بشغلها بهذا الفندق تنظف وتشتغل بكل اجتهاد بس فجاة اختفت. الفندق الي جان ذاك الخنزير يطردني منه هو بيتها هم.

بليلة الي اختفت بيها جتي تشوفني وجانت فرحانة كلش فرحانة كالت لي اكو دين يم ناس راح يندفع الها واكو عملية تنظيف جبيرة يم مرة غنية راح تحصل من وراها هواي فلوس وراها طلعت ومارجعت اختفت ببساطة رحت لمكان شغلها اسال عليها لان ظل بالي يمها كلولي ما اجت بذاك اليوم سالتهم اذا يعرفون المرة الي راحت دتنظف بيتها ضحك الاصلع عليه ورد عليه بحقارة بلقيس متكول لاي احد وين تروح ومنين تجي وهاي اني كدامك صارلي سنين ادور عليها بدون فائدة.