حنين الدم للدم لهجة عراقية وتتوفر فصحى على مكتبة نور

الفصل 15

لا تنسون التصويت حبايب

حنين الدم للدم

كتابة رؤى صباح مهدي

الفصل ال15

حست رحمة بالراحة للي سمعته من مسعود بينما بنفس الوقت ضاجت وهد كلش لان هي جتي حتى تكعد وياهم وتسمع الي يكولوه وتنطي رأيها مثل ما تسوي دائما بالامور التي تخص ابوها وما حست بيوم ان اكو فرق بينها وبين اي رجال بالعكس تحس نفسها تفتهم اكثر من اي رجال ممكن تتفاهم وياه وهي دائما الي تسوي الخطط وتنطي رأيها بالاجتماعات ومتخاف من اي شئ رادت ترفض تروح وية رحمة بس ابوها اشر الها بالسر حتى تسوي الي كاله مسعود فطلعت مجبورة. حس سامر هم بخيبة امل لان جان يتمنى لو تكعد هاي البنية البسيطة الحلوة يمهم حتى يكدر يراقبها من قريب. قالت رحمة بلطافة لوهد الي ضامة ضوجتها:

-خلينا نكعد بالغرفة اللخ هسة اصيح لفرح بنت عمي

غابت رحمة ثواني ورجعت بيدها فرحة الي ظلت تسلم على وهد زيادة عن اللزوم وراحت النسوان تلاثتهم لغرفة جلوس ثانية مرتبة وحلوة وكعدن يسولفن بامور وهد ما تحب تسولف بيها. قالت رحمة لوهد:

-هدومج كلش مرتبة وحلوة وانيقة تشتريها من محلات العاصمة؟

ضحكت وهد وردت على سؤال رحمة الي جان واضح ان هي سألته تريد تكسر بي الجليد وتبدي محادثة وية وهد:

-شوية من العاصمة وشوية من الاماكن الي اسافر لها

بعدين التفتت وهد لفرح وسألتها:

-شلونها العروس ياترى تعانين هواي من القيود والشروط؟

تغير وجه فرح وبين الحزن على عيونها وردت بدون ما تحجي عن طلاقها السريع:

-يتبع الثقة والتفاهم

وهد بنظرتها الثاقبة شافت وجه فرح تغير وظهر الحزن عليه وعرفت اكو شئ صار بالعائلة ويجوز ابوها يكدر يستفاد منه حتى يضغط على مسعود سوت نفسها متعاطفة وية فرح وسألتها بصوت حزين مهتم:

-اشوف اكو دموع مضمومة بعيونج؟

ماردت فرح اعتذرت بس وطلعت من الغرفة وعافت وهد ورحمة وحدهم فانتقلت وهد لرحمة وقالت:

-اسفة ما قصدي اضوجها هي عروسة لازم تكون فرحانة مو حزينة ومكسورة علمود هيج ثار فضولي اعرف السبب

ابتسمت رحمة وهي تعاين بين وهد وبين الكاع وما نطت وهد جواب مريح فبدت ود تستجوب رحمة وسألتها:

-انت مخطوبة؟

ردت عليها رحمة بخجل:

-لا

صرخت وهد متعجبة رغم هي تعرف ان رحمة ما مخطوبة رسميا وقالت:

-بنية بجمالج وما مخطوبة؟ بنت عشاير؟ ماأصدك ابد!