حنين الدم للدم لهجة عراقية وتتوفر فصحى على مكتبة نور

الفصل الخامس

اشتركوا بالصفحة حتى توصلكم كل الفصول والقصص 

صوتوا حبايب للفصل 

حنين الدم للدم

كتابة رؤى صباح مهدي

الفصل الخامس

كلما مشت الايام ورة دفنة راهي قل احتقان مسعود ناحية رحمة وظلت الايام تجيب اله ذكريات من وكفتها وية ابوه وظل قلبه يأذي على لوم بنية صغيرة كل الي سوته الاهتمام بابوه وحس بتسرعه باتهامها بقضاء الله وقدرة وشوية شوية بدة بحتقر فكرة اتهامها بموت ابوه. وبالذات ورة ما حجة ورة فرحة الي جانت كاعدة بالغرفة سادة باب الغرفة عليها تبجي بالظلمة وما حس بغربة بالظلام لان هو يحبه بس الي خوفه هو شكل اخته من شافها عيونها مورمة من البجي حاول يصبرها وحجة وياها بهدوء وصبر بس ببساطة ما كدر يصبرها ولا يهديها لان هو مو متعود يواسي احد ولا حتى يكدر يواسي نفسه سالته تباوع عليه بحزن:

-شفت ابوية بالحلم البارحة وكلي ما ابجي عليه. الحجي سهل بس شلون نفهم القلب

لزم جتفها وقال:

-ما الومج فرحة رغم اريدج تطلعين من هاي الغرفة الظلمة

رجفت شفايفها ونزلت دمعه من عيونها وقالت:

-وانت مسعود شوت راح تطلع من الظلمة الي انت بيها

بحلق بيها فكملت:

-بعدك مصر رحمة المسكينة مسئولة عن وفاة ابوية

مارد عليها فكملت:

-رحمة هي حبيبة ابوية جان يصيح الها رحمتي دتفهم؟ بالاوقات الي جنت بيها تحبس نفسك بالمكتب هي جانت تسلي وتخفف عنه

رد عليها :

-رعايته جانت مسئوليتها وصلني التقرير الاولي لوفاة ابوية مثل ما كال الطبيب قلبه فجأة وكف

قاطعته:

-مو كلت ما خليتهم يفتحون جسمة؟

هز راسه ورد:

-وكفته بس صار فحص للجثمان بس اني لسة ما فتحت التقرير ولا قريته...

كالت:

-ومراح تفتحه. الله يخليك مسعود خلينا نعيش حياتنا وسواء موته جان مسئولية رحمة او لا فهذا مراح يغير اي شئ ابوية راح ومراح يرجع اتهاماتك لرحمة يجوز يخليها تروح للسجن كول مسعود تريد بنت عمك تفوت السجن وهي بريئة عبالك عمي معصوم لو رزاق راح يخلوك ببساطة تلمس شعره من شعر رحمة وبرايك راح يرتاح ابوية بقبرة اذا تأذت رحمة الي جانت عيونه تضحك بشوفتها

سد عيونه ورد:

-بس فرحة...

كالت وهي تبجي:

-مستجيل يكون لرحمة ايد بالي صار وخلص كافي مسعود الله يخليكهي ممرضة واذا الطبيب غلط يجوز يقتل مريض او اكثر وميروح للسجن ورحمة استحالة تكون الها ايد بموت ابوية. هاي رحمة يا مسعود لو جنت نسيت ايام الطفولة من جنة صغار اني ما نسيتها رحمة هي اكثر انسانة بريئة شفتها بحياتي