عرس شعبي

بقلمي: أريا ستارك

الحلقة السابعة عشر:لكداب يحصل يحصل

امينة حابسة ضحكة غمزات للبنات يعاونو نوال فتزغريت وتلفو عكوزتها على لهضرة، ولكن حتى من سعاد عارفة وفاطهحمممة اش كيحاولو يديرو ماراهاش صغيرة باش يقولبوها بنيتات صغار.
هزات يديها بمعنى وقفو صلاة على نبي، تسناتهم حتى سكتو عينيها على نوال ولكن كلامها مع امينة: بنتي امينة خرجي خلاص عند منير صدعنا داير لك شي مفاجئة ولا منعرف ليكم (رجعات كلامها لنوال) أبنتي تكايسي على ولاد ناس راه واليديهم ماجابهمش هكاك بلا محاين.. عثمان ولدي لبكر وكبيدتنا واخة متعصب راه قلبو بيض وماعزيزش عليه لبسالة بزاف واقلة دكشي علاش عصبك...
نوال قربات منها ولإبتسامة مافارقاتش وجهها: أخالتي نتي على لعين وراس ولكن راه ولدك عايرني بكلمة نقافة ومن لي قلت ليه مال تانقافت ماشي خدمة بعرق كتافهم علاش ينقص منهم؟؟ حشومة والله وغير لقاني معصبة واستفزني  بطريقة كلامو
سعاد طلعات حجبانها وحطات يدها على خصرها: واش متأكدة هادا عثمان؟؟ مايمكنش يعاير شي حد وهو براسو ناس كيصحبوه بناي، وعاد هايا مو لي قدامك راه كانت نكافة وتزوجات بباباه غير من عرس فحال هادا..... واش متأكدة هادشي لي وقع؟؟
نوال بدات كتبقلل فعينيها عرفات راسها تزمطات وكرد فعل انعكاسي عندها ديما كتغمق على واليديها بحال هاد طرق، تهزات على صباع رجليها وحبات للسعاد على راسها: غير سمحي ليا اخالتي أنا اصلا ماكيصحابليش غاتجي فيه لمغرفة، مانياشتش عليه حيت عارفة راسي ماكنعرفش نجيبها فشي حد، ولكن من زهرو جاتو ديريكت فراس واقلة حيت راسو كبير؟!! كنتي كتغمطيه من لي كان صغير؟؟ مهم يالالة من لي ماشيرتش باش تجي فيه من زهري جاتو ديريكت فالراس، من لي شفتو هكاك وعرفتو غايتعصب عليا وانا نهرب...  والله ياخالتي راه يدي وفمي مبرين مني هادشي لي عطى الله
سعاد بقات واقفة شحال وهي حابسة ضحكة من كلام هاد لبنت واخة عارفاها كدير فحال هاكة بلعاني، سمعاتها قبل كيفاش كتهضر وفعلا من ناس لي كتسيف كل مرة تهضر بطريقة...
سعاد حطات يدها على حنك نوال وابتسامة خفيفة قالت ليها: ديري عقاك أبنتي!! راك فسن زواج ماتعرفي يطون نصيبك كيتسناك هاد ليلة..؟!!
نوال: أخالتي كون عرفتو شكون نمشي نوضرو فالدرب عمرو يلقاني ههههههه ماباغاش نتزوج اخالتي والله ماكيهمش لواحد يقرا وحقق مستقبلو وهز دارهم راسو ماشي واحد يعاوني وكل مرة يعايرني بيهم راه نفلق مو لاهوما تيساع ههههههه
شداتها سعاد من ودنها: شويطينة نتي زيدي معايا بعدا هضري مع لوركيسترا يبعدو لي من ولدي راه شوية ويتخطب مامرة مازوج.. فينما يعيطو عليه يجيوني لعيالات..
نوال:واشتي هاني نفعتك وغاتزوجيه وتهناي منو ورتاح بالك..
امينة دفعات صاحبتها: سيري يالمصيبة مع ماما سعاد خلاص خليني نخرج خلاص نشوف كادو ديال منير