عرس شعبي

💃عرس شعبي💃

بقلمي: أريا ستارك

الحلقة العشرون: مانمشيش فحالي

وفحال كيما موالفين فأعراسنا أننا نتباهاو بجمال عروسة بكل لبسة ونفرحو بيها فنهارها، داخلة بلبسة أخرى والفرحة من عينيها باينة، ضايرين بيها نقافات وقبل منهم أمها بطبيعة وسط حشد من ناس كتقلب على نصفها لآخر ولإبتسامة نابعة من لقلب كتخلي كاع لمعروضين مبتاسمين وفرحانين لفرحتها فليلتها...
تسمع صوتو من لمكبرات مع لموسيقى وفلحضات من ابتسامة فرح رجعات لإبتسامة استغراب وشوية عينيها كيقلبو عليه فالمنصة حتى لقاوه... كيغني ليها...

🎵وهيا خويا عثمان ديماري طوموبيل وديني نشوف أمينة
نلعبها فوق لعمارية، ونوريها رومنسية، باش تعقل شويا عليا...
ياومن لي وصلنا للحومة مابقيت نعرف لاحشومة...🎵

منير حيد لافيست ديال كوستيم لاحها لعثمان وتبعهت كرافاطا بطريقة مجنونة للدرجة ناس كضحك، وأمينة عينيها مدمعين كضحك وتبكي جات لعندها نوال بسرعها جراتها وقفو قدام لمنصة كيتمايلو مع لإقاعات...

🎵مابقيت نعرف لاحشومة مانمشيش فحالي تايعطيوني الزين ديالي🎵

نوال كتغوت: 🎵ليلة غاتزوج واميمتي غانتعوج هههههههههههه
امينة: سكتي نتي خليني نسمع صوت رااااااااجلي
ماحسات امينة حتى قرصاتها مها من جنبها وعضت على شفايفها طريقة متفق عليها وطنيا من طرف الأمهات المغربيات لولادهم باش يعرفو راسهم قفروها لامجمعوش راسهم بلا مايرجعو للدار ههه
فجو كل مرح وشطيح عيط منير على خوه عثمان طلع حدا حاوط دراعو على عنق لعريس مبتاسم وكل مرة عينو كتمشي ليها وكيحاول يتحكم فراسو ورجع عينيه لبلاصة أخرى هادشي داز تحت عيون لي مراقباهم هاد ليلة كاملة.
حتى من قاسم وقف حداهم وأبائهم كلهم كيشطحو على أنغام لأغنية اما نوال شافت فعينين عثمان لي كان مقابلها من لي حصلاتو كيشوف فيها رجعها تخنزيرة، لموريات ديال دماغها بداو كيفكرو فشي خطة من دابة عقلها فحال هاكة كيخدم *لي كيجبدني كيلقاني*..
تحركات بخطاوي سراع كتمايل مع لموسيقى حتى وصلات لعند منير علقات ليه 100، ضارت عند قاسم دارت ليه اشارة وحركات كتعني شطيحك لاعلاقة، ورجعات عينيها على عثمان لي ماكيشطح ماوالو عينيه مراقبينها وحجبانو مقرونين كيحاول يقرا تصرفاتها ويفهمها أش باغة دير، بتاسمات بشر حتى جات عينيها على سعاد قربات لولدها وعينيها عليها خلاتها بتاسمات ورجعات بزربة لبلاصتها بجنب صاحبتها وختها أمينة...