عرس شعبي

💃عرس شعبي💃

بقلمي: أريا ستارك

الحلقة العشرون: نتمنى يكون كيستاهل

عرس شعبي بكل طقوسه نوال بالها مع سربايا حاضياهم وعاد أمينة بطبيعة لحال كرشها هي لولة، كتموت على ماكلة لعراس غير وصل وقت لعشا وهي تمشي تقول لأمينة **تهلاي غانمشي نشد بلاصتي** مشات بركات مع طابلة مخلطة لي مالقى فين يبرك جا ليها، لعروسة ولعريس باركين مع كبار لعائلات بزوج فطابلة وحدة هزات تيليفونها لي توحشات ليل كامل تجر لكرسي لي حداها ماهزاتش راسها، لقات تصويرة لي حطات ليها هي وأمينة وصلات خمسين لايك بتاسمات..

تفاصيلها كيعصبوه لامبالاتها كتستفزو ولكن علاش هي بالذات؟؟
لوقت انعادم وتفكيرو غير فيها وفكل جزء من ملامحها من لي وقفات قدامه من لي كانو كيغنيو، وهو حاس بيها باغة دير شي حاجة ولكن وجود أمو حداه خلاها تراجع....
بلا مايحس لقا رجليه غتدين بيه لوجهتها، برك فطبلة وبالضبط لكرسي لي حداها، وبطرف عينو كيشوف فيها وفعينيها لي على تيليفون...ومن لي بتاسمات حس بالتحكم لي كان شاد أعصابو بيه فلت، من غير مايفكر قبل مايترحك قرب حدا ودنها غير شوية محتارم مساحتها لخاصة ولكن أعصابو خلاوها قال لي مبرزطو ومخليه فحال ثور هايج.
بلا أي مقدمات قال: نتمنى يكون يستاهل!!
نوال هزات راسها وغير شافتو ضورات عينيها فلبلاصة للطوابل لآخرين لقاتهم كلهم عامرين، قرنات حجبانها بغضب ورجعات عينيها للشخص لي قدامها ابتسامتو مستفزة وفنفس لوقت سيكسي...
نوال: نعام؟؟!
عثمان قرب ليها شوية: قلت ليه نتمنى يكون يستاهل
نوال هزات كتافها بلا مبالات : وراه خوك نتا لي تعرف حسن مني
عثمان جمع يدو على شكل قبضة: ماكنهضرش على خويا مامحتاجش رأي شي حد.آخر فيه
نوال رجعات عينيها لتيليفونها: مممم مزيان الله يسهل
عثمان: كنطلب حدا جامع؟؟ الله يسهل؟
نوال بكل برائة هزات راسها فيه: لاحول ولاقوة إلا بالله علاه ياخويا كنقول الله يسهل غير للطلابة؟؟ واهادا غير جبدانو بعيدانو عينك فيا باغي تجبدني؟؟ نعام أخاي أشنو ضارك؟