عرس شعبي

الحلقة الثالثة:نتي من نقافات؟

💃عرس شعبي💃

بقلمي: أريا ستارك

الحلقة الثالثة:نتي من نقافات؟

دخلو نقافات للبيت ومعاهم لبيسات ديالهم اما نوال واقفة قدام وجه امينة: تزيديك كعب غزالة؟!!
▪︎وابعدي مني فيا لخلعة مافياش جوع!!
▪︎راه غايبقاو شادينك ليل كامل غتيقهروك بجوع
▪︎راه غانديرو ديك لبركة ديال عروسة وعريس مع عائلاتهم فطبلة...
▪︎إنه فخ اصبيحتي!!! شكون غايخليك تاكلي بماكياجك راه غير ديكور للتصاور
أمينة دورات عينيها فنقافات هازة حاجبها: بصح؟؟ من لي غانبكر فطابلة مغانكلش؟؟
نقافة: غير دغمة ولا زوج على قبل تصاور...
خرجات عينيها وضوراتهم لعند نوال: ناري غانموت بجوع وانا من لي كنجوع كنخسر...
▪︎واعارفاك أصبيحتي دكشي علاش من قبيلة وانا دايرة لط طيارة تاكلي
▪︎واش انا ديال حلوة وأتاي ديري فختك بليزير وسيري جيبي ليا شس نص خبزة فيها دجاج ناكل قبل مانلبس

هبطات نوال عينيها لراسها باقة بشورط كولون لاسق واصل نص لفخضها وتريكو كم، رجعات عينيها للنقافة لي قلبات عينيها بملل من صداعهم عرفاتها اش باغة مطات ليها تحتية صفرة لبساتها دغيا وضمرات كمامها:
▪︎هاني غانمشي نتحارب مع طيابات ونجيب لك ماتاكلي واعقلي عليها هاديك لعوجة...إلا مارجعتش عرفي مينة طيابة كلاتني ولا دارتني ديسير...
▪︎ولهيلا حشومة علك ديما كتعصبيها
حلات لباب خارجة وكتهضر:
▪︎واهي لي كايلة خيرنا وخير ولاد درب كلنا مسلوتين وهي كافية وموفية وراه لحكرة هادي ...

خرجات من دار وشالها فوق راسها مغطي شعرها لي باقي فرولوات باش يبقى مبوكلي حتى لآخر لحضة، تحتية طويلة عليها هزاتها من لتحت وشدات جلايلها بيدها وهي كتسلت حتى ضربات فدري لابس سروال دجين وتيشورط..

▪︎سمحليا ماشفتكش مزروبة
▪︎لا راه سيفطوني عندك نتي من نقاقات ياك عفاك فين نقدر نلقى شي حلاق؟؟

هزات راسها فدري طويل وشعرو هابط على عينيه لحيتو نايضة بشكل عشوائي دجين ديالو كيبان متسخ شوية، طلعاتو وهبطاتو وقرنات حجبانها...
▪︎بنت لك كنشبه للنقافة ولا شنو؟؟ حايد اخويا من قدامي تابعني شلا شغالات
▪︎مالكي غاتفرقعي سولناك باحترام جاوبينا باحترام
▪︎بكل احترام أخويا قلب على اصل حباب مي (بقات تكمكم بوحدها) يخزيت بنادم كيخرج فك يزعزعك ومزال كيخرج فعينيه قالك نقافة...
▪︎حتارمي راسك راني كنسمعك
▪︎مزيان باقي عندك حاسة سمع ان شاء الله تولي تفهم دغيا قريب غير صبر
▪︎برهوشة مع راسك ... بفف جابنا للفحال هاد لحي اش كيتسنى من ناسو
▪︎حطات يدها على جنابها: مالهم ناس الحي كيجاوك؟؟ ها؟؟ شوف غير حالتك لمجرتلة وحوايجك موسخين وتعاير فبنادم ولهيلا جمل كيشوف غير حدبته
بكل غضب هز صبعع غايشرح ليها: ▪︎انا راه وقع ..
▪︎أخويا مامسالياش للقصص سير شوف لك حلاق فغوغل ماب ولا مانعرف