اسكريبتات ❤🖤

جبر قلبي💚

_ماما هو ليه بابا مش بيكلم عمو
- عشان في مشاكل بينهم يا حبيبتي
_يعني كدا مش هيتكلموا خالص
- للاسف لا ، إلا لما الحق يرجع لصحابه و عمو يرجع فلوس بابا
- و هو عمو واخد فلوس بابا ليه
_ لما تكبري هتفهمي كل حاجه يا نقاء
***
" ويا ريتني ما فهمت حاجه ، ياريت كنت فضلت صغيره زي ما انا و معرفتش قد ايه الناس مش كويسه ، ناس بيخسروا بعض عشان شويه فلوس و املاك و في الآخر الورثه هي اللي هتاخدها و مش هيتبقي ليهم غير الذكري السيئه "

*انا نقاء ، في سنه تالته في كليه صيدله ، بابا و ماما ماتوا و انا في ابتدائي ، و بمجرد موتهم عرفت حقيقه الدنيا و عرفت أن مش كل الناس حلوين و ملايكه ، و عرفت كمان قد ايه كنت نقيه و مقدرتش اشوف غل و حقد اقرب الناس ليا .

_عمو ، استني يا عمو
- ايه ، بتزعقي ليه يا بت انتي و ايه اللي جايبك هنا
_ اا ، انا كنت جايه اقول لحضرتك حاجه بس و همشي ، انا جيت لوحدي
- قولي اللي انتي عايزه ، اخلصي لاني مش فاضي
_ اتفضل
- ايه دا ؟!
_ دي كل الفلوس اللي حوشتها في الحصاله بتاعتي و بعت عروستي كمان ، خد الفلوس دي و رجع حق بابا و ارجعوا اتكلموا تاني عشان خاطري
- انتي جايه عشان تضيعي وقتي ، ارجعي البيت يا نقاء عشان مش فاضي للعب العيال دا
" اخدت كل اللي كنت شيلاه في الحصاله و رحت لعمي عشان يرجعوا يتكلموا ، انا عارفه ان بابا بيحبه ، بس مش عارفه ليه بحس ان عمو شرير و مش طيب ، مش المفروض ان كل الناس طيبين و اننا نزلنا الارض عشان نعيش فيها شويه صغيرين و هنرجع الجنه تاني ، اومال ليه في ناس شريره و مش بتضحك و بتزعل غيرها "
* في يوم و انا رجعه من المدرسه شوفت ناس كتير عند البيت و سمعتوهم بيقولوا ياعيني دي لسه صغيره ، ماتوا و سابوها لوحدها ، كنت صغيره مكنتش مستوعبه حاجه ، كل اللي فكراه ان جه ناس كتير عندنا و لبست اسود و قالوا ان بابا و ماما ماتوا و مش هشوفهم تاني ، كانت الناس كلها بتعيط إلا عمو و مراته ، بس انا كنت بضحك لان ماما قالتلي مره ان احنا هنتقابل في الجنه و هناك هيكون احسن من هنا بكتير عشان كدا كنت فرحانه ان بابا و ماما في الجنه و مبسوطين بس عيط عشان سابوني لوحدي و مشيوا ، مكنش عندي صحاب خالص الا نيار ، ابن عمي ، هو أكبر مني بشويه سنين ، حوالي ٦ سنين ، كنا بنذاكر سوا لما سكنت عند عمو بعد موت اهلي ، و في يوم عمو جه و قالي ان في ورق و لازم اكتب اسمي عليه عشان محدش ياخد فلوسي ، كنت في اعدادي ساعتها ، و بعد كدا لقيته بيقولي اطلعي برا بيتي و من يومها و انا عايشه مع تيته ام مامتي في شقتنا الصغيره ، بابا كان كاتبها باسم ماما و سابلي فلوس باسمي في البنك ، دول اللي قدرنا نعيش منهم .

" و نسعي في هذه الدنيا لنحقق المكاسب و الأموال و ننسي ان نعمل ليوم كثير الاهوال "

_صباح الورد يا تيته
- صباح الفل يا نقاء
_ يلا عشان تفطري ، انا ماشيه
- مش هتفطري معايا
_لا ، يادوب اوصل الجامعه ، لان الدكتور القديم اخد اجازه وجي دكتور جديد ، و مش عايزه اتاخر من اول محاضره
- ربنا يعينك يا حبيبتي و يريح قلبك
_ ربنا ميحرمنيش منك و لا من دعائك ليا