اسكريبتات ❤🖤

أنت تقدر

"و كأن الكل كان مستني فشلي ، كانوا مستنين اللحظه اللي هقع فيها عشان يواسوني ، بس بفضل الله و يقيني فيه أنا واقفه قدامكوا انهارده ، و كل اللي حابه أقوله "مدام هناك رب قدير ، قادر علي التدبير ، فإن حلمك سيصير ، واقع يسير " و السلام عليكم ورحمه الله وبركاته "
كنت مبسوطه اوي في اللحظه دي ، كان نفسي فيها من زمان ، و جه الوقت اللي اتحقق فيه حلمي ، رجعت بالذاكرة لورا ، حوالي 10 سنين ، في المدرسه الثانويه ، بالضبط من بعد موت والدي و والدتي بشهرين
_ دي صحبتكوا وعد ، عملوها كويس و حبوها ، هتكون معاكوا باذن الله من انهارده ، ادخلي يا وعد اقعدي هناك جمب عهود
كان بنت جميله جدا و ملامحها هاديه بس كان شكلها غريب شويه ، كانت عيونها ضيقه و كلامها فيه تلعثم شويه ، بس أول ما شوفتها حبيتها جدا ، و عاهدت ربنا إني احبها و خصوصا من بعد ما الابله وصت عليها و لاني معنديش صحاب
*انا وعد
_عاشت الاسامي يا وعد ، انا عهود
* اسمك جميل
_ انت اجمل ، انا حبيتك اوي
*انا كمان حبيتك
مع أنها كانت بتعاني من التلعثم بس كنت بحب كلامها اوي ، كانت بتقدر تخرجني من حزني بكل سهوله ، كانت صحبتي الوحيده ، بس كل اللي كان بيضايقني هو نظره الطلاب ليها ، كانوا بيستهزؤا بيها كتير ، عرفت بعد كدا أنها بتعاني من شئ اسمه متلازمه داون ، و أنها كانت في مدرسه دمج بس المدرسين لحظوا ذكائها و طريقه تعاملها مع اللي حواليها فحولت مدرستنا بعد ما باباها جاله شغل في نفس المنطقه ، كانت اطيب واحده حقيقي ، لحد اليوم اللي ... اليوم اللي طلعت لقلوب تحبها بعيد عن قسوه العالم ، من جملها الأرض مشلتهاش فحبت تخبيها جواها ، اليوم اللي رجعت فيه وحيده من اول و جديد ، و قررت إني أخلي العالم كله يعرف وعد زي ما كانت بتتمني
_نفسك في ايه يا وعدي
*بحب اسمي منك يا عهود ، نفسي اخلي الناس تعرف إني مش غريبه عنهم ، و اني زيهم ، عندي عيون و ايدين و رجلين و قلب ، هو صحيح تعبان شويه بس عندي قلب زيهم و بحس
بدموع _ هي ليه الناس بتعاملني كدا ، انا مبأذيش حد ابدا ، و لا عمري زعلت اي حد ، هو انا وحشه يا عهود
حضنتها *اوعي تقولي كدا تاني ابدا ، امسحي دموعك دي يا وعدي ، انت احسن من كل الناس دي ، قلبك اللي بتقولي تعبان شويه دا اطيب قلب في العالم ، كفايه بس الواحد يشوف ابتسامتك الجميله دي ، اضحكي بقا ، احبك يا ذات النظارات
بضحك_ انا كمان بحبك اوي ، ممكن اطلب منك طلب
*اطلبي يا وعدي
_ ممكن تحضري معايا العمليه الجايه ، باقي عليها اسبوعين و خايفه اوي ، عايزكِ تكوني اول حد اشوفه بعد ما اطلع
* من غير ما تقولي انا مش هسيبك لوحدك اصلا ، انا هاجي معاكي و ابات معاكي كمان
_ ربنا ميحرمنيش منك ابدا
* و لا يحرمني منك يا وعدي
فات الاسبوعين و دخلت العمليات بس مطلعتش ، كنت علي امل إني اشوفها تاني ، كان نفسي اقولها أنها عوضتني عن فقدان أهلي ، كنت عايزه أقولها قد ايه حبيتها و قررت اسمي بنتي وعد علي اسمها ، كنت عايزه أفضل شيفاها قدامي ، بس يشاء ربنا أنها متبقاش في الدنيا ، و أنها ترجع من مكان ما نزلت ، ترجع الجنه مره تانيه ، كل كلمه قالتها لي كانت بترن في ودني ، فضلت مع والدتها لحد ما العزا خلص ، و مره و انا مروحه من عندها
_عايزه حاجه يا خاله ، انا ماشيه
*تسلمي يا بنتي ، بس اقعدي كدا عايزاكي في حاجه
_اتفضلي يا خاله
*الصندوق دا وعد سبتهولي قبل ما تموت باسبوع و قالت لي اخليه معايا عشان ادهولك بعد ما تفوق
بدموع _ الله يرحمها ، متعرفيش فيه ايه يا خاله
*مفتحتوش يا بنتي ، افتحيه لما تروحي
روحت و بمجرد ما فتحته و انا دموع عيني اتفتح معاه ، كان فيه صور لينا سوا ، كانت راسمه اتنين صحاب مع بعض و حاطه اسمينا ، كانت حطه لي برطمان رسايل سعاده هي اللي عملاه ، كانت سيبه رساله ليا ، "و قد يأخذ الله منا أشياء ليعوضنا باجمل منها ، لم أتخيل أن الله سيرزقني يوما صديقه مثلك ، أحبك حقا يا عهود قلبي ، كنت أماني و مأمني و الركن الهادئ في حياتي ، اتمني لك السعاده في حياتك و أن نلتقي في الجنه " يومها عيطت كتير اوي و دعتلها اكتر ، عزمت على إني هكون السبب في أن الناس كلها تعرف وعد ، اجتهدت و عملت كل ما في وسعي عشان احقق حلمها ، و بفضل ربنا و توفيقه ليا دخلت كليه الطب ، و بعد ٧ سنين بقيت الدكتوره عهود محمود ، دكتوره نفسيه ، أخدت اسم كبير بفضل ربنا و بسبب نجاحي الدائم في الدراسه و إني الاوله ٧ سنين ، و أخدت تحدي علي اسمي و شهرتي و إما إني اعرف العالم كله علي وعد و اللي زيها ، و إما إني اخسر كل شئ
_دكتوره عهود ، في شخص عايز حضرتك برا
*مين هو
_بيقول أنه عم حضرتك
*طيب ثواني و طلعه له
كل انسان عنده أداه تحطيم ليه ، و الاداه دي كانت عمي ، طول عمره بيقول إني فاشله و مش هنفع في أي شئ ، بعد موت اهلي كان أكبر محطم ليا ، و بعد ما وعد انتشلتني من اليأس والإحباط اللي كنت فيه ، هو كان عايز يرجعني تاني لنفس الطريق و الدايره المقفوله اللي مقدرش اطلع منها إلا و انا فاقده روحي ، بس طول ما ربنا معايا اكيد محدش هيقدر يمسني بسوء
*اهلا يا عمي ، خير ، ايه سر الزيارة دي
_ازيك يا عهود ، حبيت اسلم علي بنت اخويا و اشوفها قبل ما تقع
*أنا كويسه ، و احب اطمن حضرتك إني مش هقع طول ما ربنا معايا
_ابعدي عن الايڨنت اللي عايزه تعمليه ، هتندمي بعد كدا
*و لو قولت لا
_هتقعي و تنكسري و محدش هيقدر يطلعك تاني ، هتخسري كل شئ
*انا عارفه دا كله ليه ، عشان بس ابنك يكون اكتر دكتور مشهور ، عشان لو فشلت اسمه ما يتشوهش ، عشان اسم العيله، بس احب اطمنك إن أي أن كان اللي مستنيني فأنا هخلص و هسافر برا مصر ، و مش هتشوف وشي تاني ، عن اذنك ورايا شغل
الانسان اوقات بيبان قوي ، بس من جواه بيكون ضعيف جدا في اللحظه دي ، الفشل و اليأس محاوط الشخص من كل مكان ، بس إيمانه و يقينه هو السبيل الوحيد للنجاه ، كلامه مش جديد بس خوفت ، حسيت إني هنا في الدنيا لوحدي ، محدش معايا ، مفيش حد يطبطب عليا و لا يقولي انا معاكي ، رجلي ما شلتنيش وقعت علي الارض بعد ما قفلت الباب ، و خوفت ليتكرر نفس المشهد بس بعد الايڨنت
_عهود متعيطيش بالله عليكِ
"هي بتعيط
_ايوه
"خدي ايدي يا ملك لحد عندها
=هو حد زعلك مننا
+دموعك غاليه عندي ، خلاص بقا ، قولي مين زعلك و اطلع اضربه
*بالله يا مريم انت و ملك و روان و مالك بحبكوا اوي ، انتوا اللي بتهونوا عليا كتير ، يلا نكمل اللي كنا بنعمله
+طيب كنت بتعيطي ليه
"ايوه قولي لنا
*خايفه افشل و ابقي ضيعت حقكوا
+احنا واثقين فيكِ
_مش ممكن هتعملي كدا
"اكيد ربنا هيوفقك و هيكرمك عشان انت عايزه توعي الناس بحقنا
*انا مش عارفه اقولكوا ايه ، انتوا بجد نعمه كبيره اوي في حياه البشر ، قلوبكوا مفيهاش اي حقد و لا غل ، ياريت الكل يبقي كدا ، المهم يلا كل واحد علي شغله ، روان يلا اقرأي ، و انت يا مريم ابدأي في الرسم عشان تكوني سريعه ، مالك عايزه اشوف الشعر اللي هتقولوا ، ملك الديكور اخباره ايه و تقديم الايڨنت ، عايزه كل شئ يكون كويس ، باذن الله الدعوات هتوصل انهارده و هتتوزع ، يادوب الشهر دا نقدر نوزع فيه عشان عدد كبير يجي ، باذن الله كله هيكون تمام انا واثقه في ربنا ثم في قدرتكوا..........
"بسم الله الرحمن الرحيم ، اهلا بيكوا في ايڨنت «أنت تقدر » ، اتشرفنا بحضور سيادتكم و تلبيه دعوتنا ، نبدأ بأحسن كلام ، و هو كلام الله عز و جل ، هتتلوا علينا القارئه روان .... "
شوفت نظره الانبهار في عيون الحضور لما قرأت و عرفوا إنها صماء و مع ذلك متقنه للقرآن ، روان اتعرضت لحادث و هي صغيره و أثر علي عظام الاذن الوسطي و طبله الاذن ، و دا خلها مش بتسمع ، بس مع ذلك بتقدر تقرأ الشفايف كويس اوي ، بعد ما أنهت فقره القرآن بدأت مريم في الرسم ، رسمت مجموعه من الأشخاص بيوزعوا الورود و العالم كله محاوطهم بسور من الشوك ، كانوا الاشخاص دي منهم الأصم و الكفيف و العاجز و متلازمه داون ، بعد ما خلصت كل الحضور انبهروا لما شافوا طريقه تعبيرها بالالوان و تداخل الالوان مع بعضها ، واللي زاد الانبهار دا لما مريم شالت النضاره و عرفوا إنها كفيفه ، مالك قال الشعر مع إنه غير قادر علي المشي و بيعاني من التلعثم شويه ، لانه كان بيعاني من نقص اكسجين بسبب حادث و هو صغير و دا أثر على كلامه ، و طبعا قبل ما الكل يبدأ كانت الناس مبهوره بالمكان و الديكور و تقديم ملك ، و اللي هيا و وعد بيعانوا من نفس المتلازمة ، كنت واقفه بعيد ورا الستاير لحد ما خلصوا و جه الدور عليا عشان اقول كلمتي
"اتشرفت بحضور سيادتكم ، الايڨنت انهارده بسبب شخص عزيز عليا ، و هو اللي كان صاحب الفكره ، الشخص دا هو صحبتي وعد ، و اللي مش موجوده معايا دلوقتي بس هيا عايشه جوايا و مفرقتنيش لحظه ، اللي كان من أسباب موتها التنمر علي شكلها ، لأنها مكنتش زينا ، كانت بقلب ملائكي ، و اللي كتير زيها بيعانوا بنفس الطريقه ، حبيت اعرف كل الناس أنهم عندهم مواهب أكتر مننا بكتير ، يمكن احنا اللي نتمني نكون في نفس صدق قلوبهم ، يمكن وعد مش موجوده بس بسببها ناس كتير هتعيش حياه من غير تنمر ، وجهت كتير عشان اكون هنا و كأن الكل كان مستني فشلي ، كانوا مستنين اللحظه اللي هقع فيها عشان يواسوني ، بس بفضل الله و يقيني فيه أنا واقفه قدامكوا انهارده ، و كل اللي حابه أقوله "مدام هناك رب قدير ، قادر علي التدبير ، فإن حلمك سيصير ، واقع يسير " و السلام عليكم ورحمه الله وبركاته " فوقت من ذكرياتي علي صوت تصفيق الحضور ، و شوفت الدموع في عيون بعض الناس ، شوفت نظره شكر و حب في عيون مالك و مريم و ملك و روان ، شوفت نظره فخر مختلطه بدموع في عيون والده وعد ، حسيت إني دلوقتي أقدر اقابل وعد و انا قلبي مرتاح ، كدا وفيت بوعدي لوعد قلبي
_عايزه حاجه يا خاله
*رايحه فين يا بنتي ، مش كل حاجه بقت كويسه ، ليه هتسفري بقا
_عشان وعد في العالم كله مش هنا بس ، لازم الكل يعرفها يا خاله
*لو كنت خلفت بنت تانيه مكنتش هتكون في حنيتك يا عهود ، ربنا يوفقك يا بنتي و يفرح قلبك و يسعدك في حياتك
..............
_وبعدين يا ماما ايه اللي حصل
* باباكي اتقدملي بعد ما جيت من السفر ، و اتجوزنا و خلفناكي يا وعدي
_طيب مش زعلانه عشان بابا مش بيمشي زينا
*بابا ربنا بيحبه عشان كدا عايز يديه حسنات كتير اوي ، فمبقاش بيمشي
_بس انت قولتي أن بابا كان كلامه بسيط شويه
*ما هو اتعالج يا وعدي و بقا كويس اوي
+سايباني من ساعتها و قولتي هتنيميها ، دا كله و لسه صاحيه
* اصل كنت بحكلها ليه سمتها وعد
_بابا هو انت قابلت ماما ازاي
+تعالي يا ستي و انا هحكيلك كل حاجه
.............
*رأيكوا يهمني جدا
#استغفروا
#لا_للتنمر
#أنت_تقدر
#دعاء_سمير