اسكريبتات ❤🖤

قلبي لك

_بتبصيله كدا ليه اروح اجيب لك رقمه
بصيت في الارض بتوتر *ها هو مين
_باين اوي انك بتحبيه
*قصدك مين
_قصدي اللي عينك عليه من اول ما دخل الكليه ، اجبلك رقم محمد
بتلقائية *لا معايا
بضحك_و تقولي قصدك مين
*هدير بطلي هزار رخم بقا
_اي حد هيشوفك هيعرف علي طول انك بتحبيه و دا باين اوي في عيونك ، مدام كدا الفتي انتباهه ، طول ما انت بالخمار و من غير ميكاب مش هيبصلك ، انت شايفه البنات حواليكِ عامله ازاي، فكرك هيسيب دول كلهم و يجيلك أنت ... كان واضح اوي السخريه في آخر جمله ، يمكن اللي بتقوله صح ، ازاي هيسيب دا كله و هيشوفني في الاخر ، بالاضافه اننا مش نفس الكليه اصلا ، بس اللي انا مقتنعه بيه إني جميله زي ما انا ، انا خلقت ربنا ، فهل يعقل ان خلقت ربنا وحشه و اللي يحليها شويه الوان صنعها الإنسان ، و بعدين الخمار دا هو اللي ساترني عن عيون كل الناس بقا عشان الفت انتباه واحد اكون مكشوفه قدام الكل و اولهم نفسي ، صحيح يمكن بحبه بس عمري ما اغضب ربنا عشانه ، مشيت معها لحد البيت ، دخلت اوضتي و كالعاده صليت و دعيت كتير أنه يبقي من نصيبي "يا رب لو هو خير ليا ارزقني بيه و لو مش خير اجعل فيه الخير و اصلحه لي " عارفه ان شمس فيه عيوب كتير ، بس انا متقبله دا ، هو محمد بس بالنسبه لي شمس ، بحب الاسم دا اوي و ملقتش غيره ينفع اناديله بيه ، هو شمس حياتي و ايامي ، معرفش حبيته ليه و ازاي ، حبه ملوش مبرر ، انا مش طايشه و لا بيلفت انتباهي الشباب ابدا ، بس هو غير ، اكبر مني ب ٥ سنين و مش نفس كليتي بس شوفته مره صدفه كان جي لواحد صحبه لاني شوفتهم سوا كذا مره ، حبيته من غير ما اقصد و كأن الايام بتعاقبني علي أخطائي بحبه ، عارفه أن دا كله غلطي من الاول و إني مغضتش بصري و دي كانت النتيجه   ، يا رب لا تعلق قلبي بما ليس لي ....

_السلام عليكم ورحمه الله وبركاته ، عامله ايه دلوقتي
=الحمد لله يا آيه ، انت اخبارك ايه
_كويسه يا حبيبتي ، اخبار المذاكره ايه
=مش طيقاها، انا زهقت من المذاكره و الدروس ، بجد تعبت
_مالك بس يا رحمه ، في ايه
=بشمهندس محمد عاملنا امتحان كمان يومين ،و انا مش عارفه اذاكر خالص و الدنيا ملخبطه ، ادعي لي يا آيه بالله عليكِ
_بدعيلك يا حبيبتي ، ربنا ييسر لك امرك باذن الله شدي حيلك كدا ، عايزه اشوفك مهندسه كبيره
=ربنا ميحرمنيش منك ابدا ، كلامك بيخليني اتفائل ، ربنا يرزقك باللي بتتمنيه
_و لا يحرمني منك يا رحومه ، ذاكري بقا و طمنيني
   رحمه دي الجزء الحلو في حياتي ، اتعرفت عليها من السوشيال بالصدفه ، بنت جميله اوي و طلعت قريبه مني ، اتقابلنا و عرفت انها بتاخد كورس عنده ، و كأن القدر مصمم يجيبه في سكتي
_مساء الورد ، عامله ايه
بعدت المسچ لهدير و نمت صحيت حوالي بعد العشا ، صليت و أكلت و فتحت الفون ، ها باعتلي رساله ازاي ، فتحت الشات بسرعه و لقيت اني بعت المسچ ليه ، مش عارفه حصل ازاي ، يا دي الوقعه
*آيه ، ردي يا بنتي
_عايزه ايه يا هدير ، سيبني دلوقتي
*في ايه مالك
_بعت مسچ لمحمد بالغلط و هو رد اعمل ايه بقا
*و لا حاجه كلميه و قوليله اتبعتت غلط و اتعرفوا
_انت بتقولي ايه لا طبعا
*تمام ، خليكي كدا معلقه قلبك علي الفاضي
_هدير بالله كفايه ، مع السلامه
  مش عارفه ليه حسيت قلبي وجعني من كلامها ، طيب لو عملت كدا صح ولا غلط ، آيه بطلي اللي بتقوليه اهم حاجه رضا ربنا ، من ترك شيئا لله عوضه الله خيرا منه ، فضلت اهدي نفسي و فتحت الشات
_السلام عليكم ورحمه الله ، انا اسفه المسچ اللي فوق اتبعتت غلط ، انا كنت عايزه اعرف مستوي واحده قريبتي اسمها رحمه محمد ، مامتها مكلفاني بكدا ممكن حضرتك تقولي هي عامله ايه
*انت حد قالك قبل كدا أنك قليله الزوق جدا يعني ، في حد يتكلم كدا ، علي الاقل عامل ايه ، اعرف اسمك حتي ،  مش الدخله دي
  فضلت متنحه للفون شويه بقرأ الرساله كذا مره مش مستوعبه
_انا مش جايه اتعرف و اقول عامل ايه انا عايزه اعرف مستوي البنت و خلاص ، و لو انا قليله الذوق فعند حضرتك حق انا فعلا قليله الذوق عشان اتكلمت مع حضرتك ، عملت بلوك و نمت الليله دي و انا دماغي بيعيد المسچ و كلام هدير و حسيت ان قلبي بينزف مني ، صحيت علي أذان الفجر ،صليت و قرأت قرآن و فتحت الفون و اكتشفت أنه شاف صورتي ، يا نهار ابيض ، لان رقمه متسجل عندي شاف الصوره ،عرفت دلوقتي ليه لازم محطش صورتي ،  كدا بكل سهوله يقدر يعرفني ، استر يا رب ، لبست و نزلت الكليه و زي كل يوم كلام هدير بجانب زعيق الدكاتره كل شويه ، و الصداع اللي مش بيسيب دماغي ....
مرت الايام و بالرغم من الكلام اللي قاله لسه بدعي بيه ، والله مش بأيدي بس قلبي مش قارده اتحكم فيه ، و في يوم بعد ما خلصت محاضرات ، لقيت حد بينادي عليا ، طلع هو ، يا رب قويني
_يا آنسه
*نعم ، حضرتك محتاج مساعده
بصيلي بتركيز _انت قليله الذوق اللي كلمتيني واتس صح ، عايزه تاخدتي كورس فازاي تتكلمي
*انا مسمحلكش، لو سكت مره مش هسكت تاني ، قليل الذوق يبقي حضرتك لما توقف بنت و تتكلم معاها في الكليه كدا ، و لو علي الكورس فأكيد حضرتك تعرف حد كويس ، لانه نفس الشخص اللي اداهولك بس الظاهر مجبش نتيجه
  سيبته و مشيت ، مش عارفه اتكلمت كدا ازاي ، كان واقف مصدوم ، طبعا ما هو البيه متعود أن كل البنات تجري وراه ، رجلي خدتني علي مسجد الكليه ، صليت الظهر و فضلت ابكي كتير اوي في السجود ، صوتي كان عالي بس مش اعلي من صوت وجع قلبي ، خلصت و حسيت بايد حد علي ضهري
_السلام عليكم ورحمه الله ، تقبل الله يا قمر
*و عليكم السلام و رحمة الله و بركاته ، منا منكم جميلتي
_انا حبيبه ، سمعت صوت بكائك ، لعله خير إن شاء الله ، ممكن اعرف اسمك
*انا آيه ، اتشرفت بمعرفتك
_الشرف ليا يا حبيبتي ، هو مش تطفل ، بس لو حابه تحكي انا ممكن اسمعك ، لو لسه مش واثقه فيا فدا من حقك ، بس عايزه اقولك حاجه ، انت شكلك جميل ما شاء الله و خمارك زايدك جمال ، و وجودك في المسجد في الوقت اللي كتير مش بيدخلوه فدا في حد ذاته شرف و انجاز ليكِ ، و لولا ربنا شاف صدقك مكنتيش هتكوني هنا دلوقتي ، و ربنا عمره ما يضيع عبده أبدا ، ربنا مفيش ارحم منه و دموعك دي غاليه اوي علي ربنا ، لعل الفرج قرب اوي منك ، بس متبطليش دعاء ، ربنا بيحبك اوي و بيحب يسمع دعائك ، لو مكنتيش غاليه عند ربنا مكنش منع عنك حاجتك عشان تدعيه ، ربنا لما بيبغض حد ممكن يفتح عليه ابواب كل شئ عشان ميسمعش صوته ، كوني علي يقين و ربنا هيجبرك صدقيني
    انا مكنتش حاسه بأي شئ بعد كلامها ، قلبي سكن و هدي ، حبيت ربنا اوي ، ياه للدرجه دي انا غاليه عند ربنا ، صدقت مقوله يرسلنا الله لبعضنا رحمات ، جت حبيبه أخدت كل حزن قلبي ، روحت اليوم دا فضلت اقرأ قرآن و اعيط و ادعي ربنا كتير ، بس الغلط اللي عملته اني ماخدش رقمها ، دعيت لها كتير أوي و كان عندي أمل اني اقابلها تاني ......
مرت الايام و انهارده آخر يوم في الامتحانات ، و اتفقنا انا و هدير اننا نتمشي مع بعض
_الو يا هدير انا طلعت اهه انت فين
*سبقتك في الكافيه اللي قدام الكليه
_تمام انا جايه لك متروحيش في..
=حسبيييي
لقيت حد شديني بسرعه قبل ما العربيه تخبطني ، الفون وقع مني و كنت مصدومه و خايفه في نفس الوقت
=انت ماشيه كدا و خلاص ، مش تبصي للطريق الاول ، لو كان حصلك حاجه ، او .... مسمعتش باقي الكلام بصيت كانت الشمس علي وشه و هو بيتكلم بس عرفته من صوته و بعدين لقيت كل حاجه بتسود فجأة و مسمعتش غير صوت هدير و هي بتصرخ ، فضلت ٣ ايام في المستشفي معرفش اي حاجه عن العالم اللي حواليا ، طلعت من المستشفى و عرفت انه كان بيسأل عليا هدير ، يمكن عشان صورته قدام صحابه في الكليه ، بس اللي اعرفه إني قررت أنساه و استعوضه عند ربنا ، بدأت اهتم بحياتي بس منكرش اني كنت حزينه ، كان بسهوله جدا أن اللي يشوفني يعرف دا ، عشان كدا بابا اخدنا العين السخنه، قال اغير جو و كمان عشان أخدت الاجازه ، كنت بشوف اللي حواليا بلاقيهم مبسوطين ، الضحكه منور وشهم ، طيب هو ليه انا حزينه ، كل اللي يعرفني بيتمنوا يكونوا مكاني ، عايشه كويس ، بطلع و اخرج ، روحت السخنه ، حاجات كتير بيحسدوني عليها ، بس انا مش فرحانه بالحاجات دي ، طيب هو انا كدا انانيه ، او مش راضيه بالنعمه ، انا كل اللي طلباه حياه بسيطه مفيهاش وجع قلب ، مفيهاش المظاهر دي كلها ، حياه بتتكون مني انا و هو و بس ، نعيش مبسوطين و في هدوء ، طيب انا مستحقش كدا ، جه صوت ماما طلعني من افكاري
_واقفه لوحدك ليه يا آيه
*ابدا يا ماما ،حبيت ابل رجلي بالميه
_بس المياه مش جايه عند رجلك اصلا
*ها
_يمكن الحاجه قدامك وانت عايزاها بس واقفه في المكان الغلط ، انا شايفه الحزن في عيونك يا آيه ، مش هتحكي مالك
*هحكيلك كل حاجه
    عيطت كتير و انا بحكي ، بس في الآخر حسيت بأن هم و انزاح من قلبي ، حضنتني و دا كان كفايه إني اكون كويسه ، رجعت القاهره تاني و انا عندي امل في بكرا ، و الابتسامه بدأت تعرف طريقها ليا ، بدأت احفظ قرآن و ادرس علوم شرعيه ، عرفت أن الحياه مع ربنا حاجه تانيه خالص
_آيه صح
*اا حبيبه ، حضنتها جامد اوي
*عامله ايه ، بجد بدعيلك دايما
_الحمد لله ، ربنا يسعدك يا حبيبتي ، اخبارك ايه و أخبار قلبك
*ادام الله حمدك و غفر الله لي ذنبي و ذنبك ، انا و قلبي ممتنين ليكِ اوي
_ربنا يجعلكوا دايما كويسين ، عايزه حاجه همشي انا
*لا استني مش هغلط زي اول مره ، عايزه رقمك
بضحك _بس كدا ، من عيوني