اسكريبتات ❤🖤

عوض فؤادي💌

_ربع ساعه تأخير ، كنتِ فين
-آسفهههه
جريت بسرعه علي الاستديو
هدوء ، نفس عميق
"يا صباح اللطف ، يوم جميل بإذن الله ، مش ناقص غير ضحكتك الحلوه تنوره ، و مج القهوة بتاعك ، و صوت القارئ البلوشي و هو بيقرأ قرآن ، و طبعا صوتي انا عشان اليوم تكمل بهجته ، احم اولا تبا لتواضعي ثانيا وحشتوني جدا ثالثا و دا الأهم أن بشكل رسمي نقدر نقول إن انهارده اول يوم في الخريف ، و الشتا علي الابواب و لسعه البرد اللي بتكون الصبح مع صوت الموج و السما بتمطر و انت حاطط الهاند فري و بتسمع قرآن، احساس تاني ، نبدأ بقا بسوره البقره و مستنين رسايلكوا و اتصالتكوا"
_اتاخرتي كدا ليه يا طيف
-اسفه جدا يا موده ، العربيه عملتها معايا تاني
_ما قولنا غيريها
-ايدي علي كتفك ياختي ، بس منين انتي عارفه الحال ، و بعدين هو في زي زوبه، دي قلبي اصلا برغم كل اللي بتعمله بس بحبها
_ربنا يهديهالك و يكبرهالك قريب ، يلا عشان هتبدئي
-يا رب ، تمام انا جاهزه
"و رجعنالكوا من جديد ......."
(الصباح بيتكرر كل يوم و مع ذلك مفيش يوم يشبه اللي قبله ، كل يوم بيكون مختلف ، علي حسب توقعتنا و ميولنا، الحاله النفسيه و هرموناتنا، اللي حوالينا و مشاكلنا و مشاورنا و حياتنا ، و لكن برغم كل دا يبقي الصباح هو الافضل )
_يلا يا طيف مروحه
-ايوه يلا ، تعالي اخدك في طريقي
_اكيد طبعا و دي عايزه كلام
-ايه دا ، مين المحترم اللي راكن كدا قدام عربيتي ، دا بني آدم مشفش بخمسه جنيه تربيه
*افندم؟!
-احم ، هي دي عربيه حضرتك
*ايوه عربيتي ، ايه اللي حضرتك قولتيه دا
-ما هو برضو دي مش راكنه عربيه ، هي عربيات الناس لعبه مش ماليه عينك زوبه قصدي العربيه بتاعتي
حسيته ابتسم * برضو ميدكيش حق تقولي كدا ، اعتذري حالا
_يا جماعه استهدوا بالله يلا يا طيف العربيه طلعت
*مش همشي إلا لما تعتذري
-يبقي حضرتك هتقف للصبح
مشيت بسرعه مع موده ، او بالأصح هربت بسرعه ، كائن غريب الأطوار ، قلب مزاجي ، الهي يا شيخ رجلك تتخبط في الترابيزه ، لا عنيفه اوي انا ، هدوء ، نفس عميق ، و لا اكن حاجه حصلت
_صباح الفل يا مامتي
-صباح الورد يا طيف ، فطرتي
_ و دا اسمه كلام برده ، طيب بزمتك يا شيخه الواحد يجيله نفس ياكل ازاي من غير ما يشوف القمر دا
-ربنا ميحرمنيش منك ابدا يا حبيبتي
_ولا يحرمني منك ابدا يا روحي
(ضحكتها بهتت ، حسيتها كبرت اوي ، هو الفراق بيعمل كدا ، من ساعه موت بابا الله يرحمه و انا شايفه عيونها حزينه دايما حتي في عز ضحكتها ، بحس بيها بليل و هي بتصلي القيام و تدعيله، و لما تبتسم بليل و هي نايمه بعرف أنها بتحلم بيه ، حقيقي الحب الصادق بيدوم حتي بعد الموت ، نفسي حد يحبني زي ما ماما بتحب بابا ، يعيش علي ذكرياتنا سوا ، يدعيلي و يشتاقلي ، احس اني لو مت هفضل عايشه في قلبه )
_ماما انا نازله عايزه حاجه
-لا يا حبيبتي متتاخريش
_حاضر يا قمري، ادعيلي
(افضل حاجه دعوه الام ، بتكون بمثابه درع واقي ضد الحياه ، يعني مثلا لو طالع الصبح و قالتلك ربنا يكرمك و يوقفلك ولاد الحلال ، عايز ايه تاني من الدنيا ، او لو خايف و تقولك متقلقش ربنا هيفرحك ، بتحس انها بشري من ربنا ، ربنا يحفظ امي و كل الامهات يا رب )
_دكتوره طيف ، في حالات جديده جت ، هتمسكي الحاله اللي في الاوضه 505 بجانب الحالتين اللي معاكي
-تمام يا دكتور ، حاجه تانيه
_تقدري تشوفي شغلك
(افضل مهنه في الحياه هي تخفيف الألم ، انك ترسم ضحكه علي وش شخص دا أعظم إنجاز ممكن تعمله في يومك ، و بجد بحمد ربنا علي أنه اداني المهنه دي ، انا دكتوره نفسيه، بجانب اني بقدم برنامج الصبح في الراديو ، بحب جدا شغلي ، و اكتر شئ يفرحني لما ألاقي حد باعتلي و يقولي اني بفرق جدا في يومه ، و انه بيبتسم لما يسمعني ، برنامجي بيكون بعد الفجر بساعتين تقريبا ، و بالرغم أن الوقت بدري و لكن في كتير بيسمعه ، الحكايه بدأت معايا برسايل علي الفيس ، كنت بعمل رسايل سعاده كل يوم الصبح عشان اخلي الناس مبسوطه ، لحد في يوم موده كلمتني دي صديقه عندي علي الصفحه بس بقت حاليا صديقه في قلبي ، قالتلي علي فكره البرنامج و انا رحبت جدا و كانت احلي خطوه حقيقي )
_يوسف القمر عامل ايه انهارده
-اا لحمد ل لله
_ورني بقا يا جو عملت ايه
-ر رسمت ح حاجات حلوه
_الله ، ايه الجمال دا اللهم بارك ، شاطر يا روحي ، بص بقا جبتلك ايه
-اا ايه
_شوكولاته ، عايزها
-ايوه
_قوم خدها يلا، هتعرف تطولها
-بس دي عاليه
_بس انت بطل و هتعرف تجبها، يلا
-اا ا هيييه
_شاطر يا حبيبي، يلا نلعب بالمكعبات بقا
-ايوه
*يوسف ، دا طفل داون عنده ٥ سنين ، بحبه جدا جدا ، المفروض يتسموا اطفال ملائكية مش داون ابدا ، بجد كميه الحنيه و البراءه في الأطفال دي مش طبيعيه ، سبحان الله ربنا مديلهم بهجه و حب تخليك تحب تقضي حياتك كلها معاهم ، دفئ و حنيه لا توصف ، بجد انا بحسد اي حد عنده طفل ملائكي )
_دكتوره طيف شوفتي الحاله الجديده
-لا ، لسه هروح اهه
_طيب ، عايزك تهتمي بيها كويس
-حاضر يا دكتور
*دخلت الاوضه لاقيت ست كبيره يمكن في الخمسينات ، شكلها بسيط ، و ملامحها هاديه ، نايمه بهدوء و لا فارق معاها العالم ، بس السؤال هنا ايه اللي يخليها هنا و هي في السن دا ، يكون ولادها مثلا هما اللي جايبنها هنا ، مهما كان السبب بس لازم اهتم بيها و هعرف بعد كدا ، لما تخف إن شاء الله .
_______
(صباح الورد علي كل اللي بيسمعوا ، صباح الضحكه الصافيه و الهوا البارد ، و انهارده اول أيام الشتا العزيز اللي ياما الناس اتكلمت عنه في أشعار او خواطر ، و اللي برغم برده و غيومه يبقي هو الافضل بالنسبه لكتير من الناس ، حابه اكلمكوا عن جبر ربنا ، ربنا بيجبرنا دايما باشكال مختلفه ، ممكن يجلنا الجبر علي هيئه دعوه من حد منعرفوش، او ابتسامه طفل ، او حاجه كل الأسباب كانت بتقول استحاله تحصل ، ربنا بيجبر الارض بعد الصيف و بيجي الشتا عشان تزهر من جديد ، فما بالك بقلبك ، انت متخيل أن ممكن ربنا يكسر بخاطرك في يوم ، دا يوم القيامه هيكون شخص داخل النار و هو علي باب النار هيبص وراه ، ربنا يسأله يقوله عبدي لما التفت ، هيرد و يقول مكنش دا ظني فيك يا رب ، ربنا هيقوله و ما ظنك ، يرد و يقول انك ترحمني ، عارف ربنا هيقوله ايه ، ربنا هيرحمه بسبب حسن ظنه ، لما تحسن الظن بالله هيجيلك الجبر علي طبق من دهب، و اخيرا ربنا يجبر قلوبكوا و يسعد قلوبكوا، و دلوقتي هنسمع سوره يوسف و هستني رسايلكوا )
_مروحه و لا راحه المستشفي
-هروح المستشفي الاول
_تمام هروح انا ، اشوفك بكرا
-باذن الله
*الانسان دا كائن عجيب بجد ، ازاي بيقدر يخفي شعوره بالشكل دا ، حقيقي انا كنت محتاجه كل كلمه قولتها انهارده ، الحاله اللي جاتلي بقالها ٣ شهور و مفيش تحسن ، بتتحسن ببطئ جدا ، لازم اعرف ايه اللي وصلها لكدا .
"عارف انك سمعاني ، اكيد سمعاني زي ما طول عمرك بتعملي ، مش علي طول لما اكون زعلان بتواسيني و تقوليلي ثق في الله ، طيب مش بتعملي كدا ليه دلوقتي، طب لو حصلك حاجه انا هعمل ايه ، انتي مش بتحبي اكون زعلان ، و طول ما انتي نايمه كدا مش هبقا مبسوط ابدا، مش كان نفسك تفرحي بيا ، قومي و انا هخطب يا ستي و هفرحك بس ماتناميش كدا ، انتي نمتي كتير مش عايزه تصحي بقا ، طيب عشاني عشان أحمد حبيبك ، بالله قومي بقا ، سمعت انهارده حبيبتك و كانت بتقول أن الفرج جي قريب ، قومي بقا يا امي " قعد يعيط علي ايديها
*اول مره اشوف ابنها ، دموعي نزلت من غير سابق انزار ، حقيقي احساس وحش جدا ، بس لازم اقعد معاه يمكن اعرف اوصل لشئ أبدا من عنده ، خبطت علي الباب و استنيت علي ما مسح وشه ، لان الرجاله مش بتحب حد يشوفها منهاره ، و في ناس بتقول هو في راجل بيعيط ، لو مكنش فيه مكنش السؤال اتسأل ، و بعدين حبي و سيد الرجال كلها عيط علي فقدان ابنه إبراهيم ، ازاي بقا الراجل مينفعش يعيط ؟!
_احم ، السلام عليكم
-و عليكم السلام
*يا نهار ابيض مرصع بكل الالوان ، ايه اللي جابك هنا ، دا لو افتكرني هيعملني شورما، بس اكيد نسي دا من ٣ شهور يعني ، اكيد مش فاضي زي و بيفتكر كل اللي بيحصل معاه .
_انا الدكتوره اللي مسؤله عن مدام كوثر ، حضرتك تقربلها
-انا ابنها ، هي حالتها مش بتتقدم انا مش شايف اي تحسن خالص
_مامت حضرتك رافضه العلاج ، جسمها مش بيستجيب و لازم اعرف ايه اللي وصلها لكدا
-حالتها كدا من ساعه ما باباي و اختي ماتوا ، كانوا مسافرين و العربيه عملت بيهم حادثه و اختي و والدي ماتوا قدامها ، هي اللي عاشت أما هما
سكت ، حسيت اني و لاول مره مقدرش اخفف عن حد ، احساس العجر دا وحش اوي
_الله يرحمهم ، مامتك حصلها صدمه من اللي شافته و عقلها اكيد بيفكر هي ليه عاشت ، والدتك عايزه تلاقي هدف للحياه عشان تعافر عشانه
-انا اقدر اعمل ايه
_حضرتك مفيش شئ تعمله غير أنك تيجلها و تحاول تفكرها بذكريات حلوه بينكوا ، عشان حالتها النفسيه ، و بإذن الله خير
_تمام شكرا لحضرتك يا دكتوره ، هو اسم حضرتك ايه
-طيف
_شكرا يا دكتوره طيف
* انك تفقد شخص غالي عليك مش شئ هين ، بتحس أن الدنيا بدأت تصغر حوليك ، شغفك في الحياه بيقل و بتحلم باليوم اللي تقابله في الجنه
*بدأت حالتها تتحسن عن الاول بقيت اقعد معاها اغلب الوقت ، يمكن هي مش بتفتح عيونها بس متاكده أنها سمعانا، بقينا صحاب جدا ، لدرجه ان يومي بينقص لو هي مش فيه ، حياتي كانت كويسه لحد ..
-ماماتي ، انتي فين يا وردتي ..ماما
لقيتها واقعه في الارض و مش بترد عليا ، حسيت أن مخي وقف ساعتها ، معرفتش اتصرف ازاي ، كلمت موده و هي جابت الدكتوره و جت
-خير يا دكتوره ، ماما مالها
_السكر عندها واطي و دخلت في غيبوبه
-يعني هتكون كويسه صح
_باذن الله خير ، عن اذنك
"احساس انك ممكن تفقد شخص عزيز عليك بتمني محدش يجربه ، انك تكون عاجز عن تخفيف ألمه و مرضه بيكون أشبه بإحساس الام اللي بيموت منها ابنها وهي واقفه مش قادره تساعده "
"يا أيتها النفس المطمئنة ارجعي الى ربك راضيه مرضيه فدخلي في عبادي و ادخلي جنتي "
*الوقت بيقف عند آخر ذكره حلوه ليك مع شخصك المفضل ، لما بتفقد شخص غالي علي قلبك بتحس انك فقدت روحك معاه ، ساعتها بس بتشوف الدنيا قد ايه صغيره و مش مستهله كل اللي بنعمله عشانها ، ساعتها بتعرف أن ملكش حد غير ربنا ، مفيش غيره يبقي لازم ترجعله ، لان انهارده في ايدك الاختيار أما بكرا انت هترجع بس بالاجبار ، فروح بنفسك قبل ما تروح غصب عنك
"انهارده بقالها شهر مش معايا ، شهر سابتني لوحدي هنا و مشيت ، والله انا عارفه انها في مكان احسن وأنها اكيد مبسوطه لأنها بقت مع بابا ، بس احساس الوحده كئيب اووي ، موده مسبتنيش من يومها ، حقيقي من غيرها مش عارفه كنت هتصرف ازاي ، بكرا لازم انزل الاستوديو و المستشفي ، اخر محاوله ليا مع مدام كوثر ، و إما نجحت أو سيبت شغلي 💔 "

(صباح جديد ، عدا امبارح بحزنه ، و منعرفش إذا كنا هنعيش لبكرا ، بس اللي واثقين منه أننا بنعيش صباحنا دلوقتي ، انهارده آخر حلقه في البرنامج و زي ما هتودعوا الشتا هتودعوني معاه ، الاول شكرا علي كل الرسائل اللي جاتلي عشان تواسيني ، ممتنه لكل شخص اهتم بامري و دعالي الايام اللي فاتت ، جايه اكلمكوا انهارده عن العوض ، يمكن كتير منكوا عارفين أن والدتي اتوفت من شهر ، و محدش هيعرف احساسي غير اللي جربه ، بس انا متاكده من عوض ربنا ، زي ما انا متاكده من كلامي معاكوا دلوقتي ، ربنا مستحيل يتخلي عني ، يمكن اخسر شغلي انهارده ، بس مش قلقانه ، لان رزقي عنده هو ، مش مستنيه من حد رزقي ، زي ما ربنا كان معايا طول عمري هيفضل معايا لآخر عمري ، عوض ربنا جميل اوي ، لو عايز تحس بيه ارضي ، طول ما قلبك مليان رضا هتشوف عوض ربنا كل لحظه في حياتك ، أسأل الله أن يعوضكم و يجبر قلوبكم و يسعدكم ، يا ريت متنسونيش من دعائكوا، هستني اتصالتكوا و رسايلكوا، عسي أن يكون لنا لقاء اخر قريبا ، و السلام عليكم ورحمه الله وبركاته )
'خرجت و حسه أن هينقصني حاجه ، عرفت اني مش انا اللي بسعد الناس ، انا اللي بفرح لما حد يقولي فرحتيني ، انا بعمل كدا لنفسي قبل ما يكون ليهم ، قعدت قدام البحر ، بقالي كتير مجتش هنا ، صوت الموج و هو بيخبط في الصخر ، مع صمت الصبح ، و نسمه هوا الربيع ، بيخدوك في دنيا تانيه ، عالم تاني ، عالم الذكريات و متفوقش منه إلا و علي وشك ابتسامه هاديه و دمعه نازله من عينك ، روحت المستشفي و دخلت الاوضه مع كل خطوه كان قلبي بيدق جامد ، وحشتني جدا حقيقي ، فيها شبه من أمي ، حسيت إني عايزه اترمي في حضنها ' .
"عامله ايه ، وحشتيني اووووووي الفتره اللي فاتت ، جيالك انهارده عشان اقولك أنها اخر مره ليا هنا ، كان نفسي تفوقي انهارده ،مش عشان افضل في شغلي ، بس عشان كان نفسي احضنك اوي، عارفه انا ماماتي كانت زيك كدا ، كانت طيبه اوي، لو كنتي شوفتيها كنتي هتحبيها ، بس لو بقا ، هيا خلاص مبقتش هنا ، هي دلوقتي سامعه كلامنا ، بس فوق عند ربنا ، انا حبيتك اوي ، و عارفه انك بتحبيني ، سمعت ابنك مره لما كان بيحكيلك عن برنامجي ،و عرفت انك كنتي متبعاني، آخر حلقه كانت انهارده ، و آخر يوم ليا هنا برضو انهارده ، و ماما سابتني من شهر ، و موده هتسافر ، و .. و مش بقا معايا حد خالص " عيطت كتير ساعتها كنت بكلمها و انا ماسكه ايديها ، كان بقالي كتير معيطتش كدا ، ساعه موت ماما كان ربنا الهمني الصبر و كنت بدعي بس ، كنت بعيط علي اني مش هشوفها ، و لا هفرح حد ، حسيت أن في ايد حد ماشيه علي خماري ، لما رفعت رأسي لقيتها صحيت ، طيب ازاي ، ساعتها بس عرفت أن عوض ربنا جه و أن حياتي هتكون احسن بكتير من الاول ، برغم انها صحيت بس سبت المستشفي برضو ، بعد فتره لقيتها بتكلمني و كانت عايزه تزورني ، قعدت معاها كتير اليوم دا حضنتها اوي و حسيت أن ماما لسه معايا ، أحمد اتقدملي ، و افتكرني بعد ما والدته طلعت من المستشفي ، و عشان انا شجاعه طبعا اعتذرت منه ، اتجوزنا و قعدت مع ماما كوثر ، و دلوقتي معايا مالك .
"و دي كانت حكايتي مع جبر ربنا و العوض ، اصبري و احتسبي هتلاقي الحياه بقت حاجه تانيه خالص ، والله مفيش أعظم من الرضا بالمقدور ، و الحمد و الشكر هيزود الموجود ، ارضي و تيقن من العوض و احسن الظن بالله هتكون حياتك جنه علي الارض ، و دلوقتي هنسمع سوره يوسف و مستنيه رسايلكوا و اتصالتكوا "

"و قالوا أ واثق أنت بالمقدور و الايام .. فقلت كيف لا اثق و رزقي في يد الرحمن "
#عوض_فؤادي🔮
#سيستجيب💌
#دعاء_سمير 😊