البنات

الجزء 01

:مبرووك ياحاج الصادق جابو ليك بت تاني

اتقدم عليها حاج الصادق وهو مبسوط وفرحان شديد وطلع 500 جنيه وختاهم ليها في يدها وقال ليها

:الله يبارك فيك اختي

في حته مابعيده منهم كانو في راجلين من اهلو واقفين ولما عرفو انو اسماء زوجه حاج الصادق جابت بت واحد فيهم قال لي التاني

:دا شنو الراجل الضهرو كلو بنات دا ومرتو دي غير البنات ماعندها ولاده دي البت الخامسه ليهو وشوفو مبسوط كيف التقول جابو ليهو ولد علي بالطلاق انا لو في محلو الا اعرس من البت التانيه عشان اجيب لي ولد

:يازول استغفر ربك دي قسمه ربنا ليهم كدا لا هو عندو يد فيها ولا هي عندها يد فيها بعدين كيف ماينبسط ويفرح يازول دي حته منو وبتشيل اسمو في ناس مستعده تقدم روحها قصاد تسمع كلمه بابا كان ميه بت

:انا ماعارف لكن كان في محلو كما عرست وجبت الولد

:هو الولد بتجيبو رجاله والا بي كتره النسوان يازول يازول قول ليك كلام منطقي

:انت زاتك زيو انا مانسيت عندك تلاته بنات اقعدو كدا وخلو نسوانكم يشيلن ويجيبو ليكم في البنات

حاج الصادق انتظر لحدما طلعو مرتو وودوها العنبر مشي ليها واتحمدل ليها السلامه وبارك ليها البت ومشي وزع الحلاوه

بعد خرجوهم ومشو البيت زوجتو قالت ليهو

:المره دي ماتعمل سمايه وزعها بس

:لا والله كيف مابعمل سمايه فرقها شنو من اخواته نفس العملتو لي اخواته حاعملو ليها ماعايز واحده من البنات لما يكبرو يحسو اني قصرت معا واحده فيهم حتي في ولادته حاعملو زي كل مره سمايه واعزم الناس واوزع برضو

:الله يديك العافيه يالغالي ويخليك لينا

:اميييين يارب ويخليكم لي انتو كمان

جو اميمه وخالده وهند ورانيا بنات حاج الصادق لي اختم الجديده نهي وقعدو جمبها وهم مبسوطين وفرحانين بيها شديد

بره كانو اخوات حاج الصادق مني ونوال بتكلمو معا بعض نوال قالت لي مني

:انا ماعارفه اخوي دا مالو ماعايز يعرس مره تانيه ماشاءالله شغلو كويس وبقدر يفتح بيت تاني. اليجيب ليهو ساي ولد يشيلو اسمو ويمسك شغلو المره دي اتعرف الفيها

:والله يااختي تقولي شنو انا كم مره اتكلمت معاهو في الموضوع دا وطوالي يزعل ويقول لي اقفلي الموضوع دا

جا لقاهم بتوسوسو براحه قال ليهم

:مالكم قاعدين بره

:لالالا يااخوي قلنا نقعد بره حبه ونخلي اسماء تاخد راحته شويه

:عديله يااختي الله يديكم العافيه ويخلي ليكم اولادكم :امييين اخوي ويجيب ليك انت الولد البشيل اسمك

:امييين يارب

اخو الصادق اسمو الفاتح تاجر كبير كان في شغل بره واول ماعرف جا عليهو هو واخوهم التالت الشفيع اصغر اخوانو شغال معا الفاتح

سلمو عليهو وباركو ليهو البت وقعدو معاهو

الفاتح قال ليهو

:يااخوي ماتفكر في الموضوع القلتو ليك

:ياتو موضوع يالفاتح اخوي

:المره التانيه عشان ربنا يرزقك بالولد

:سبحان الله يالفاتح اخوي دا حالتك انت المتعلم والفاهم وكبيرنا يعني هل انت او غيرك بضمن اني اجيب ولد اذا عرست مره تانيه ياخي معقوله يااخوي الحاجه دي قسمه من ربنا انا والله العظيم بناتي ديل بالدنيا عندي وفوق مرتي دي مابعرس كان جابت مليون بت والحمدلله والله انا معا كل بت بتجي ربنا بزيدني من فضلو ورزقو الحمدلله وان شاءالله اربيهم احسن تربيه ويكونو سند لي بعدين

:انت ماشي علي كبر شغلك دا زاتو البمسكو ليك منو حتجي واحده من بناتك تمسك الشغل

:الفاتح اخوي ياريت الموضوع دا تنسي لاني صراحه بقيت اتضايق شديد من كلامكم دا كان انت كان اخواتي ياخي اسي زوجتي وبناتي كان سمعو كلامكم دا يقولو شنو الكلام البتقولو دا ماهين وبأثر علي الزول شديد ياريت تنسو الموضوع دا خالص لاني مستحيل افكر فيهو ابدا ابدا

الشفيع عاين لي الصادق اخوهو وقال ليهو

:والله ياالصادق اخوي كلامك عين العقل ياريت لو كل الناس زيك

نتابع ونشوف البحصل شنو سلام عليكم