البنات

الجزء 10

كان يوم العرس يوم جميل جدا جدا والناس مبسوطه وفرحانه جدا واستمر اليوم بكل روعتو لحدما جات الحفله المساء واهل العريس والعروس في نص الداره وكمان الفنان ماقصر معاهم خالص غني ليهم اغاني جميله وركز علي اغاني الحماسه والصادق والفاتح وابو العريس عرضو في نص الداره والزغاريد ماتديك الدرب

عبدالسلام كان بحاول بي اي طريقه يكون قريب من خالده وهي مبسوطه وترقص ساي

خلصت الحفله وودعو العرسان ورجعو علي البيت في الطريق عبدالسلام اتكلم معا خالده وقال ليها

:خالده انتي ليك فضل كبير علي انتي القربتيني من العائله وخليتني احس بي قيمه الاسره الكبيره والصغيره انتي الصحيتي جواي حاجات كتيره جميله جدا ماكنت قايله موجوده فيني حياتي الفاتت كلها ندمت عليها انا بتمني انو الانسانه الكانت سبب في رجوعي للاسره تكون هي شريكه حياتي

خالده اتفاجأت بي كلام عبدالسلام وغلبه البتقولو بعد مسافه قالت ليهو

:والله ياعبدالسلام انا سعيده اني اسمع منك الكلام دا وكونو يكون في حياتك زول قادر يغير فيك حاجات للاحسن دي حاجه جميله جدا انا والله نظرتي ليك نظره اخت لي اخوها ومافكرت فيك غير كدا ابدا

قاطعه وقال ليها

:طيب ادي نفسك فرصه وفكري فيني زي مابفكر فيك ادي نفسك مساحه تفكير في عبدالسلام غير انو اخوك فكري فيني كزول ليهو مكانه جوه قلبك وحياتك وماتستعجلي في الرد اخدي راحتك للنهايه واخدي المده العايزاها حتي لو سنه ولما تصلي لي نتيجه اديني خبر واي كان ردك ماحتتغير مكانتك عندي حتكوني خالده الحبيته وملكت عقلي وقلبي وبت عمي واختي العزيزه

:تسلم والله ياود عمي الغالي كلامك صاح انا حاخد فرصه وافكر وبعد كدا حاديك خبر

وصلو البيت واحمد قاعد يتونس معا نهي مسافه كدا حست روحه نعسانه قامت استاذنت منو ومشت علي غرفتها تنوم

خالده شافتو قاعد براهو جات وقعدت معاهو واتكلمت معاهو في حاجات عامه وبدت تلمح ليهو شويه شويه وقامت سألتو عن حياتو الخاصه قام قال ليها

:والله ياخالده ماعندي حاجه خاصه لي بت ومابكضب عليك في الحته دي الحب احتمال هو الحاجه الوحيده البعيد منها الان انا تفكيري في الناس كلها مافي نفسي

:بس معا تفكيرك في الناس برضو مفروض تفكر في نفسك وتدي نفسك مساحه تحب انسانه تكون هي المالكه قلبك وحياتك

:دي حاجه عندها وكتها اكييييد لما يجي وكتها حالقي قلبي دقه للانسانه دي وملكت قلبي وعقلي بس اسي مافي

:صدقت والله الحب دا قدر بجي وبتملك حياتنا غصبا عننا مرات بكون مامنطقي او لي زول مابكن لينا اي نوع من المشاعر ومرات بنلقي الطرف التاني بنفس احساسنا واكتر الصاح انو نوزن حياتنا ونوزن قلبنا ومانخلي يندفع ساي او يتعلق بي حاجه ماليهو المفروض اول نتأكد من مشاعر الطرف التاني اول حتي بعد كدا يانخلي حبنا ياخد كل المساحات او ندفنو جوانا ونتحمل الصدمه ونتجاوزه

:صاح يابت عمي كلامك كلو صاح انا أسف جدا جدا بس مابيدي. افضل انك توضح احساسك اذا في او مافي من الاول من انك تعيش الطرف التاني في احلام ويعيش حياتو علي الاحلام دي ويجي يتصدم في النهايه الحياه مرات بتكون حلوه معانا ومرات بتألمنا جدا جدا بس لازم مانخلي الالم يكون هو المسيطر علي حياتنا لازم نتغلب عليهو ونعيش حياتنا من الاول علي احسن مايكون وندي نفسنا فرصه معا زول تاني واكييد اي حاجه بتحصل لينا لي خير

نزلت دمعه من خالده غصبا عنها ماكانت عايزاها تطلع ابدا بس ماقدرت تمسكها اكتر الالم الجواها كان اكبر من انها تخليهو جواها مسح دمعته وقال ليها

:بت خالي الحياه حلوه ماشرط نحصرها كلها في زول واحد في مليون شخص بتمني حتي لو بسمه مننا او كلمه طيبه ارجووك اتجاوزي ألمك وحزنك واطلعي منهم زوله تانيه نظرته للحياه جميله وافتحي كل ابواب الفرح في حياتك ماتخلي زول واحد يقفله في وشك انتي عايشه وسط اسره بتقدم كل الحب والسعاده لي بعضها وللناس واكيد البزرع الفرح بلقي

وقام منها خلاها قاعده في كرسيها وهي تبكي ساي بكت علي روحها وعلي قلبها الملكتو لي شخص هي ماكانت عارفه هل هو بحبها او لا كان مفروض تتأكد اول من مشاعرو تجاهه شنو حتي تدي المساحه دي بكت علي نفسها حست انها ضعيفه جدا اتمنت لو اميمه كانت جمبها عشان تحكي ليها وتطلع كل الالم الجواها دخلت علي غرفته وختت راسه في المخده وخلت دموعه تنزل بي غزاره شديده حبت تطلع كل الالم الجواها

تاني يوم من الصباح اي اسره جهزت حاجاته عشان يرجعو علي بيوتم والدموع في وجه الكل حتي الصادق والفاتح كانت الايام القضوها معا بعض جميله جدا جدا بس دي الدنيا كدا بتجمع عشان تفرق ودعو بعض بالدموع وبعد مشو الصادق وزوجتو وبناتو حسو بالبيت فاضي زي المافيهو زول الجوطه واللمه الاستمرت لي كم يوم انتهت اي واحد مشي علي غرفتو وقعد يسترجع كل لحظات المناسبه

عدت الايام واميمه مبسوطه معا زوجها في بيتم بعد كم شهر من الزواج قالت لي زوجها

:انا بكره حامشي اقدم لي الشغل

:ليه تقدمي للشغل هل انتي محتاجه حاجه او ناقصاك حاجه

:لا والله انت مامقصر معاي خالص واي حاجه موفره لي

:طيب اي لزومو الشغل

:الشغل مهم جدا وزمان نحنا اتفقنا علي كدا وانت وافقت

:اذا قصرت في حاجه معاك اشتغلي طوالي لكن غير كدا تكوني معززه ومكرمه في بيتك

:بس انا قريت عشان اشتغل والشغل ماحيكون علي حساب زمني معاك ابدا واذا اثر علي حياتنا حاخلي طوالي

:انتي ليه تدخلي في حسابات زي دي خليك قاعده في البيت واي حاجه تجيك لحدي عندك

:انا ماحاشتغل عشان محتاجه حاجه

:ياخي المجادله الكتيره ماحلوه عشان خاطري شيلي موضوع الشغل دا من بالك خالص

:بس دا ماكان كلامك معاي في الاول انت وعدتني والتزمت بالحاجه دي

:ارجووك انسي الموضوع دا

:لا ماحانسي

:كيف يعني ماحتنسي

:ايوه ماحانسي وانا مصره اني امشي الشغل

:والله

:ايوه

الله يستر غايتو نتابع ونشوف البحصل شنو بكره سلام عليكم