البنات

الجزء 02

الصادق عمل السمايه وكانت حاجه جميله خالص وزي كل مره عزم ناس ووزع لحم لي اسر فقيره كتيره كرامه وسلامه للبنيه ولي امها

مرت الايام ونهي ماشه تكبر والبيت ملان فرحه وبهجه يوم رانيا قاعده معا ابوها وامها قامت قالت لي ابوها

:صحي يابابا انت عايز تجيب عروس

الصادق واسماء الاتنين نططو عيونم ومستغربين في كلام رانيا العمرها 6سنه ابوها قال ليها

:عروسه ليك يعني تلعبي بيها والا عروسه مولد

:امس عمتو نوال قالت انك لازم تجيب عروسه بس ماعارفه عروسه لي والا لي نهي اختي

الصادق عيونو بقت شرار من الزعل والغضب اسماء دنقرت في الارض وقامت رفعت راسها وقالت لي رانيا

:ايوه عروسه ليك تلعبي بيها انتي واختك عشان عمتك بتحبكم شديد

رانيا فرحت شديد وقالت لي امها

:ونحنا كمان بنحبها عمتو شديد

:قومي العبي بره يارانيا وبعد شويه ابوك بمشي يجيب ليكم العروسه تلعبو بيها

قامت رانيا وسلمت علي امها وابوها وطلعت بره

الصادق قال لي اسماء

:معليش علي الكلام السمعتي ياغاليه

:مامشكله ياغالي ولا يهمك حتي انت لو عايز تزوج مافيها حاجه والله دا حقك مابحرمك منو

:انا مابفكر في كدا ابدا والله

:عارفاك مابتفكر انا بقول ليك حتي لو فكرت انا مابزعل والله

:معليش ياغاليه ومعالجتك لي الكلام السمعتو رانيا وعكسك لي صوره عمته بي صوره تخليها تحبها دا تصرف جميل منك جدا جدا

لو واحده غيرك كانت زرعت كره جوه رانيا والبنات من الكلام البتقولو عمتم بس انتي مافي زيك والله ربنا يحفظكم لي ويديني العافيه عشان اسعدكم كمان وكمان

:انت السعاده والحنيه المعيشنا ليها مافي والله وانا سعييييده جدا بيك والله وماعايزه اي حاجه غير تكون مبسوط وسعيد

:تسلمي يابت الاصول انا اسي بطلع اجيب العروسه لي رانيا واجي عشان ماتزعل

:تمام ياغالي

الصادق طلع وطوالي علي بيت اختو نوال لقاها قاعده في المطبخ سلم عليها وقال ليها

:انتي يانوال اختي كيف تتكلمي قدام رانيا وتقولي اني لازم اجيب عروس عارفه رانيا قالت الكلام دا قدام امها بس امها حولت الكلام لي صالحك انتي. رانيا لسه صغيره بس البتسمعو ممكن تقولو قدام اي زول بحسن نيه والكلام البتقولو ممكن يكون جارح وممكن يسبب مشاكل كبيره جدا عشان كدا حتي اذا عايزه تتكلمي ماتتكلمي قدام طفل بي اي حاجه

اسماء بت اصول بدل تزعل وتتضايق اتصرفت بي حكمه كبيره

:مالازم تكون حريصه علي رضاك هي تلقي وين زيك موفر ليها اي حاجه ليها ولي بناته كيف مابترضي

:نوال حاسبي لي كلامك البتتكلمي عنها دي زوجتي وانا مابرضي فيها ابدا وهي ماالزوله الهينه او بترضي بي اي حاجه هي بت عز وبت اصول وانتي بتعرفيها كويس وبتعرفي اهله ياريت كلامك يكون فيهو احترام اكتر ليها بعدين انتي تعالي هنا هي مزعلاك بي شنو عشان تتكلمي عنها بالصوره دي والله بتحترمك انتي ومني والفاتح والشفيع وبتعدكم اخوانها واخواتها الصاح انو التعامل يكون بالمثل ياريت يااختي تاني الموضوع دا ماتتكلمو فيهو نهائ والا انا حاخسر اي زول يتكلم فيهو

:تخسرنا عشان عايزين مصلحتك وعايزين ليك الولد :مصلحتي!! هل مصلحتي اني اتزوج هل مصلحتي اني اجيب ولد اذا ولد او بت انا المسئول عنو وانا بي تربيتي البخلي يكون ناجح او ناجحه في اولاد كتيرين اخير عدمم والله البنات احسن منهم وفي بنات والله القدمو لي روحم ولي اهلم لي المجتمع مائه ولد مايقدمو اختي استهدي بالله وختي الرحمن في قلبك وشيلي الكلام الفاضي دا والا ..

:والا شنو

بكره بنعرف باقي الكلام سلام عليكم