البنات

الجزء 04

اميمه في الجامعه كانت عندها صديقات اتنين بس اما علاقته معا الاولاد في حدود السلام بس مااكتر وكتير منهم حاولو بتقربو منها لكن كانت بتقفلم طوالي ومابتديهم فرصه ابدا حتي للونسه معاها حتي في مناسبات اهلها ماعندها شغله بي حفلات خالص عكس اخواته بحبو الحفلات كتيير الناس بقو ينادوهو بي مولانا والاسم دا مشي معاها حتي بقت معروفه بيهو في الجامعه وفي الاسره كلها حتي اولاد اهله بتحاشو يتكلمو معاها لانها عادي ممكن تحرجم قدام الناس هي كانت بتحب نوال عمته شديد ونوال برضو بتتكيف ليها شديد ودايما بكونو قاعدين معا بعض في مناسبات اهلم او شغالين معا بعض

في معيد في الجامعه اسمو صديق زول ملتزم شديد اعجب بيها جدا وطلب يتكلم معاها في الاول هي رفضت حاول كتير لحدما قدر يوصل ليها انو عايزها رسمي وحابي يقابل ابوها ويتكلم معاهو بعد زمن وبعد عرفت هو شنو حتي ادتو رقم ابوها بس كان عندها شرط انو تكمل دراسته وبعد الدراسه تشتغل وهو وافق واتصل علي حاج الصادق وكلمو وحاج الصادق قال ليهو

:والله حبابك ياولدي انت جيت بالباب انا بهمني انو بتي توافق وتكون سعيده معا زوجها

:اكييد ياعمي

خلاص ياولدي انا بشوف الحاصل شنو وبديك خبر

بعد كم يوم حاج الصادق رجع ليهو وقال ليهو

:حبابكم تشرفونا في اي زمن حدد اليوم المناسب معاكم وجيب اهلك وتعال

:اديك العافيه ياابوي انا برجع لي اهلي وفي اقرب زمن بنجيكم

يوم الخطوبه الاسره كانت فرحانه فرح مبالغه واكتر زول كان فرحان عمته نوال فرحت ليها شديد الفاتح والشفيع برضو فرحو ليها جدا الصادق رغم الحصل والحليفه وكلام اخوانو زمان الا انو الترابط البينم كبير جدا والمشكله ديك انتهت في لحظتها لانو خوتم جميله وبسندو بعض وطوالي معا بعض يعني مازي الزمن دا اخوك او اختك تفقدو من شهر لي شهر او الاتحصل ليهو مناسبه فرح او كرح لا عندهم الجمعه ثابته في بيت واحد فيهم ومهما كانت المشغوليه لازم يتلمو سوا علمو اولادم الترابط الاسري الجميل بنو جواهم حب الاهل ومواصله الارحام كانت فرحه اي واحد فيهم فرحه للكل .بس بقولو لكل قاعده شواذ وبقولو دايما في زول بكف العين والزول دا كان عبدالسلام ود الفاتح هو اكبر من خالده شويه بي تعب ومجابده حتي وصل الجامعه وماواصل فيها كتير لو مشي الجامعه بمشي وبقعد معا شلتو ويعلقو علي البنات ويتسكعو وزول بتاع مشاكل وشايف نفسو ابوه تعب معاهو شديد قدر مااتكلم معاهو وضربو وماخلي لي حاجه بس هو بعدي فتره وبرجع تاني لي الحاجات البعمل فيها وعبدالسلام دا من قام عاجبه خالده شديد وبشاكل فيها عديل كتير بمشي ليها الجامعه ويشوفه قاعده معا منو وهل في اولاد في شلته والا لا

يوم خطوبه اميمه لابس احسن لبس وبي اي صوره حابي يقعد معا خالده وخالده بترتاح لي زول تاني وهو احمد ود عمته مني خريج صيدله زول هادي كلامو بسيط هميم جدا بحب يخدم الناس بساعد المساكين من قامت وهي شايفه احمد كل العائله بتحبو وبتحترمو وكل الناس بتزكرو بالخير

هي قاعده معا اميمه اخته جوه وتتشيك ساي

اميمه قالت ليها

:اسي انتي الجاين يخطبوك والا انا

:مانحنا اخوات بعدين انا اخت العروس لازم اكون نجمه

:ههههههه انتي عايزه تكوني نجمه عشان زول واحد بس

:اكيييد هو الوحيد البهمني ياربي بكون جا والا لسه

:اكيييد حيجي احمد مستحيل يتاخر عن مناسبه في العائله

بتكلمو كدا جات عمتم نوال داخله

:بسم الله ماشاءالله قمر والله ياحبيبتي

خالده قالت لي عمته

:وانا ياعمتو ماقمر

:انتي والله ماشاءالله عليك قمرين

قربت من عمته وسلمت عليها وقالت ليها

:انتي القمر والله ياعمتو والبشوفك بتشيلو قلبو طوالي

قعدو يضحكو التلاته اسماء ومني جو عليهم اسماء قالت لي اميمه

:اها جاهزه يابتي

:ايوه ياامي ماعندي حاجه تانيه

مني قالت لي اميمه وخالده

:ماشاءالله يابناتي ربنا يحفظكم مبرووك يااميمه بتي وعقبالك ياخالده بتي قرييب

خالده دنقرت وهي خجلانه

اميمه ردت لي عمته

:الله يبارك فيك ياعمتو وعقبال احمد قريب ان شاءالله

:اميييين يابتي منتظرنو يفتح خشمو بس ونمشي نخطب ليهو طوالي

اميمه ردت لي عمته وهي بتعاين لي اختها

:كلنا منتظرنو يفتح خشمو ونمشي معاهو

هنا خالده غلبته القعده قالت ليهم

:انا النمشي اشوف باقي التريبات

وهي ماشه لاقت احمد وهو جاي يشوف هل الحاجات كلها جاهزه والا لا

وقفت تعاين فيهو وهو مادي يدو ليها يسلم عليها

:ازيك يادكتوره مبرووووك لي اميمه وعقبالك ان شاءالله

اتضايقت من كلمه دكتوره دي كانت حابه يناديها بي اسمها ساي

:الله يبارك فيك يااحمد وعقبالك انت كمان

استاذن منها عشان يشوف الترتيبات وهي متابعه لحدي مامشي وماانتبهت لي الزول الكان واقف وبعاين ليهم والشرر مالي عيونو

نتابع ونشوف البحصل شنو سلام عليكم