البنات

الجزء 12

تابعنا في الحلقه الفاتت تعامل الصديق معا اميمه وكيف تصرفاتو اتغيرت معاها واتحول لي شخصيه تانيه واتزوج كمان عليها وبالصدفه عبدالسلام واحمد شافوه معا زوجتو الجديده تسنيم

كانت الدهشه حاضره في وجه احمد وعبدالسلام عبدالسلام اتضايق شديييد وغضب شديد وقرب يتشاكل معا صديق بس كان احمد مأخد منو وعد مايتصرف اي تصرف احمد زاتو احتار من الحاصل هو زاتو غضب شديد واتضايق جدا جدا بس كتم الغضب جواهو وقال لي صديق

:اتشرفنا كتير

وساق عبدالسلام بعيد وهو ماسكو من يدو وعبدالسلام ماشي وبعاين لي صديق وزوجتو الجديده

بعد طلعو عبدالسلام قال ليهو

:ليه ماخليتني اضرب الزول دا

:تضربو كيف ياعبدالسلام

:كيف يتزوج علي اميمه وكمان بكل برود دي زوجتي الجديده

:ماتستعجل نحنا نعرف الحاصل اول وبعد كدا نتصرف

احمد اتصل طوالي علي خالو الصادق وطلب يقابلو في البيت

وصلو البيت وعبدالسلام اتصل علي ابوه وعمو الشفيع برضو

جو واحمد حكي ليهم الحصل في المطعم الصادق قال لي احمد وهو مخلوع شديد

:زوجتو !!كيف الكلام دا

:دا الحصل والله ياخال وانا بالجد استفزاني الحاصل جدا جدا بس مسكت نفسي ومسكت عبدالسلام عشان ماتحصل مشكله وقلنا بعد نعرف الحاصل من اميمه والسبب الخلاهو يتزوج شنو

الصادق طلع تلفونو واتصل علي اميمه وطلب انها تجي البيت اسي

:والله ياابوي ماعارفه صديق يخليني اطلع والا لا

:لا تطلعي وتجي اسي البيت واذا عندو اي كلام اليجي هنا يقولو لينا

:حاضر ياابوي

اميمه لما جات احمد وعبدالسلام واعمامه اول ماشافوها استغربو جدا جدا دي مااميمه بت الصادق كانت عباره عن هيكل عظمي مافي اي نضاره في وشها شكلها متغير تماما احمد قال ليها

:اميمه دا شنو انتي مالك الحاصل عليك شنو في شنو يااميمه مالك انتهيتي كدا

سكتت ساي ماردت ليهم ابوها قال ليها

:زوجك اتزوج عليك

كانو متوقعين تزعل وتكورك لما تعرف بس هي برضو ساكته ومدنقره في الارض زاد استغرابم اكتر ابوها جا جمبها ورفع راسه لقي وشها ملان دموع

:اميمه مالك يابتي في شنو ليه ساكته في شنو احكي

الفاتح قال ليها

:اميمه بتي احكي الحاصل شنو

زاد بكاها وبقت تبكي بي صوت عالي

ابوها قال ليها

:يابتي الله يرضي عليك في شنو يابتي

عبدالسلام جا ووقف قدامه

:بت عمي ماتبكي في شنو احكي الحاصل وريني الراجل دا مالو معاك والله الليله الا نكتلو

الفاتح قال لي عبدالسلام

:اهدا ياولدي كتل شنو كدي النفهم الحاصل اول

:اهدا كيف ياابوي شوفه بقت كيف وشوفه بتبكي كيف اكيد الزول دا معزبه عذاب شديد ونحنا قاعدين وماعارفين الحاصل شنو

احمد ساكت ساي وبعاين لي اميمه وهو من جوه زعلان زعل مابعدو ابدا

اميمه قالت ليهم ودموعه نازله وصوته باكي شديد

:والله ماكنت عايزه اتكلم ولا اقول حاجه ابدا بس مابقدر اتحمل اكتر ومابقدر ادس اكتر

وحكت ليهم الحاصل كلو من بدايه مناقشته معاهو لحدي اخر لحظه

لما خلصت كان الغضب مالي وجووهم كلهم بس ابوها كانت دموعه ماليه وجهو وهو بسمع في الحاصل لي بتو وهو ماكان عارف قدر شنو هي اتعذبت واتهانت واتزلت مسكه وضماها عليهو وقال ليها

:ليه يابتي سكتي كل الزمن دا ليه مااتكلمتي ليه يااميمه بتي ليييه

احمد قام وهو غضبان غضب مابعدو الفاتح لاحظ ليهو مسكو من يدو

:وين ياولدي وانت غضبان كدا

:ياخالي احترمناهو وقدرناهو وشلناهو في راسنا وشوف ردو شنو وشوف اميمه بقت كيف والله مااخلي ابدا

:لا ياولدي ماانت البتعمل كدا

:لا ياخالي اي حاجه ولا الزله والاهانه انا بوري هي شنو واهله شنو ومافي زول بوقفني والبقيف قدامي والله مابخلي

مرق هو وعبدالسلام معاهو وهم ملانين غضب الله يستر بس

نتابع ونشوف البحصل شنو سلام عليكم