البنات

الجزء 08

هند جات المكتب وهي خايفه دقت الباب المديره قالت ليها

:اتفضلي ياهند

دخلت المكتب للمديره ومتوقعه تسألها عن الحاجه الحصلت امس

المديره قالت ليها

:اتفضلي الظرف دا ادي لي والدك

مسكت الظرف وهي بترجف

المديره لاحظت ليها

:مالك ياهند خايفه كدا

:لالا مافي حاجه يااستاذه

شالت الظرف وطلعت بسرعه زي الساكيها شيطان وجرت نفس طويل بعد طلعت من المكتب طبعا رزان وسهي كاتلم الشمار عايزين يعرفو المديره عايزه هند في شنو واول ماشافوها جو عليها وسهي قالت ليها

:اها المديره قالت ليك شنو اكيد بتكون قالت ليك جيبي ولي امرك صاح

:لا بس ادتني الظرف دا

:اكييد كتبت جواب لي ابوك بالحصل كلو الله يستر عليك ياهند اختي

هند قلبه عايز يقع اليوم داك مافهمت حاجه في الحصص الادوهم ليها خالص باله كلو في الظرف القاعد في شنطته وتسأل في نفسها عن الحاجه الفيهو فكرت تفتحو تشوف المكتوب فيهو شنو بس اتراجعت لانو ماصاح تعمل كدا اول ماالحصص خلصت جري علي البيت وبقت منتظره ابوها بتين يجي فكرت تقوم تحكي ليهو عن الحصل من عبدالسلام عشان لما يفتح الجواب يكون عارف الحاصل كلو بس هي ماكلمتو من الاول ودست منو راسه عايز يضرب من التفكير الكتير واول ماابوها جا جابت الجواب وادتو ليهو

:دا شنو ياهند

:دا خطاب ادتني ليهو المديره قالت لي اديك ليهو

فتح الخطاب وبقي يقرا فيهو وهي واقفه وتعاين في ملامح وشو ومنتظره السؤال خلص قرايه الجواب وقال ليها

:تمام لحظه بس ياهند

:معليش للسؤال ياابوي الجواب فيهو شنو

سكت ابوها مسافه وقام قال ليها

:انا ماكنت عايز زول يعرف الحاجه دي بس حاقول ليك لكن الموضوع دا يكون سر بينا مافي زول يعرفو ابدا في طالبات معاكم وضعهم شويه صعب واهلم بعانو عشان يدرسوهم ومرات كتيره مابكون عندهم رسوم السنه انا التزمت للمديره اي طالبه مابتقدر تدفع الرسوم انا حادفع ليها الرسوم حقته واذا احتاجت كراسات او كتب او لبس مدرسي انا حالتزم بيهو وحتي الطالبات ماتعرف الحاجه دي لما تصلم بتجيهم شكل مساهمه من المدرسه دا الفهم الواصلم وواصل اهلم

هند سكتت اتبدلت الاحاسيس الكانت جواها من خوف وقلق لي احاسيس بتاعه فرح وفخر وعزه بي ابوها نزلت دموعه وحضنت ابوها شديد وقالت ليهو

:انت اعظم اب في الدنيا والله انا بحبك شديد والله ياابوي

:تسلمي لي بتي الحياه دي مابتستاهل حاجه ومافي زول بياخد حاجه معاهو الا العمل الطيب والذكري الحسنه عشان كدا يابتي اتفقدي اخواتك المعاك في المدرسه صادقي دايما الناس البسيطه لانهم هم البعيشو الحياه صاح قدمي ليهم كل الحب والخوه واذا احتجتي انك تقدمي لي اي واحده فيهم حاجه تعالي لي وانا جاهز ودايما يابتي اعملي الحاجه دي بدون ماتحسسي الزول انك صاحبه فضل عليهو وماتخلي الناس تعرف انك بتعملي كدا ماتتعاملي معا الناس بي تعالي خليك ابسط من بسيطه نحنا وضعنا الحمدلله تمام جدا جدا ودا كلو بفضل ربنا ودعوات الناس الطيبين ديل انا عايزك تمشي علي نفس الطريق الماشي فيهو انا

:حاضضر ياابوي اوعدك اني اعمل كل القلتو لي بنفس الطريقه الانت بتعمله بيها

طلع مبلغ وختاهو في ظرف وقفل الظرف وسلمو ليها هند طلعت من ابوها وحاسه بي فرح كبيييير جدا جدا

وبقت منتظره بتين الصباح يجي

الصباح اول ماوصلت المدرسه مشت علي المديره وهي مبسوطه وسلمته الظرف

المديره شكرت جدا وشكرت والده

طلعت علي الفصل وهي حاسه بي روحه انها انسانه تانيه وبقي تفكيره انها تفتش البنات البسيطات وتصادقم وتكون معاهم علي طول وتتقاسم معاهم اي حاجه

بهناك في مدرسه الاساس بتاعه رانيا المديره خشت الفصل وقالت بي صوت عالي

:جائزه الطالبه المثاليه السنه دي فازت بيها الطالبه رانيا الصادق والجائزه دي عملتها المدرسه عشان تحفز الطالبات وتخلق تنافس بينم غير التنافس الاكاديمي وتخلق جو اسري داخل المدرسه من بين ثلاثين طالبه اتنافسو علي الجائزه قدرت رانيا انها تفوز بالجائزه بي تعاملها الجميل معا الاستاذات والطالبات معاها حتي في الفصول التانيه وتكون محبوبه من الكل

وقف الفصل والمدرسات وهم بصفقو لي رانيا وهي اتقدمت عشان تستلم الجائزه من المديره وهي مبسوطه شديد وفرحانه جدا

المديره قالت ليها وهي بتسلمه الجائزه

:ربنا يحفظك يابتي رغم انو عمرك صغير لكن عقلك كبير ودا نتاج تربيه جميله من اسرتك حافظي علي كل الحاجات البتعمليها وحيكون ليك مستقبل كبير ان شاءالله

:شكرا كتير يااستاذه ابوي وامي هم العلموني اعمل كدا

:ربنا يحفظم ربوك تربيه صاح تحياتي ليهم

:يصل يااستاذه

رجعت علي مقعدها في الفصل والمديره والاستاذات طلعو وكل الطالبات جو عليها وباركو ليها

بعد خلص اليوم الدراسي جرت جري علي البيت واول ماوصلت جرت علي امها

:امي امي انا فزت بي جائزه الطالبه المثاليه في المدرسه

امها حضنتهه عليها شديد

:الف مبرووك يابتي الف مبروك بت ابوك صاح انتي

مشت كلمت اخواته وفرحو ليها شديد واول ماابوها جا من الباب كلمتو

ابوها فرح شديد وقال ليها

:مبرووووووك يابتي ربنا يحفظك ياعسل ويوفقك كمان وكمان من زمان انا بقول انتي طالعه لي في كل شي

:كيف ياخي كما طلعت ليك اطلع لي منو

دخلو جوه البيت وناداهم وقال ليهم

:اختكم فرحتنا ورفعت راسنا في المدرسه رايكم شنو نعمل لينا برنامج ظريف كدا وندعو المدرسات والطالبات المعاها في المدرسه

كلهم ايدو كلامو وفرحو شديد

نتابع ونشوف البحصل شنو سلام عليكم