البنات

الجزء 07

:احتمال ربنا يهديهو

:ونعمه بالله انا ماخايف من انو بتاع مشاكل او كدا لا انا خوفي من انو زول مابحب يتحمل المسئوليه عايز يعيش حياتو بالطول والعرض مابهمو انو يكون بيت او يشيل مسئوليه بيتم او بيتو هو الخاص

:بس كلامو بختلف قبيل وتحس انو في تغيير فيهو كبير

:احتمال مامعروف بتمني انو يتصلح ويساعد ابوه ويكون شخصيه ليهو براهو اسي شوفي زي احمد دا ماشاءالله مهذب مرتب حياتو بي صوره جميله جدا خاتي خطوات لي حياتو بي صوره جميله جدا ومحبوب من الكل وراجل يعتمدو عليهو

:احمد ماشاءالله عليهو ولد السرور والله

:مامعروف البحصل بكره شنو نحنا العلينا انو نربي بناتنا علي احسن مايكون بعد كدا قسمتم في يد ربنا

:اي القسمه مابيد اي زول بحددا ربنا بس

تاني يوم في المدرسه سهي ورزان صديقات هند قاعدات في الفصل بعد الحصه انتهت واي واحده ماسكه تلفونه وفاتحه النت هند قالت ليهم

:انتو مابتزهجو من النت دا

سهي قالت ليها

:دا هو البفرق لينا من القرايه الكتيره البنقري فيها دي

:اسي الزمن البتاخدي في النت دا كان قريتي فيهو حاجه مااحسن ليك

:هههههه هي الحياه قرايه بس

سهي مدت تلفونه لي رزان

:رزان شوفي موش دا معاويه المرسل لي طلب صداقه

:اي ياهو زاتو والله

:اقبلو والا اخلي

:لا خلي شويه خليك تقيله شويه يابت ماتقبلي اي طلب طوالي انا عندي كميه من الطلبات وبعرفم كلهم ورافضه اقبلم

:بس معاويه دا براهو ياخي

هند تعاين ليهم ومحتار فيهم وهم في تلفوناتم

:انتو والله ماعندكم موضوع التلفونات دي لسه عليها شويه نحنا لسه في تانيه ثانوي

:يعني بعد نعجز حتي نشيل تلفونات ونخش النت والا شنو يابتي نحنا بقينا كبار وواعيات وفاهمات كل حاجه

:لا لسه والله اي حاجه عندها زمنه

:انتي زوله متعقده ساي

رزان قالت لي سهي

:ياخي خليك منها بتعرفي حسام الوريتك صورتو يومتا

:اي مالو

:اليوم قال حيجي جمب المدرسه عايز يلاقيني

:انتي جاده

:اي والله بعدين بعد الحصص حينتظرنا بره

:حظظك والله الود دا وجييه ياخي

هند قالت ليهم وهي ماسكه الشنطه وطالعه

:سبحان الله انتو اهلكم جابوكم المدرسه عشان تقرو والا عشان تحبو وتقابلو دا وتصادقو دا اي حاجه محسوبه عليكم والحاجه البتحصل بتحملوها اهلكم وحتاثر فيكم وفي مستقبلكم

بعد الحصص انتهت هند طلعت ماشه علي البيت في ولدين كانو واقفين ولما شافوها طالعه ماشه براها قعدو يشاغلو فيها وهي مااشتغلت بيهم خالص وهم يشيلو ويشاغلو فيها بي مصلحات سيئه جدا وهي ماشه وساكته ومدنقره في الارض وخايفه يلحقوها فجاءه وقف زول قدامه هنا قلبه قرب يقع ورفعت راسه تشوف دا منو لقتو عبدالسلام ودعمها واقف ومعاهو اصحابو قال ليها

:خليك واقفه هنا ماتمشي ومشي هو واصحابو علي الاولاد والاولاد من شافو عبدالسلام حاولو يجرو لحقوهم ومسكوهم دقوهم دق نضيف الشباب الواقفين والبنات كلهم اتلمو عبدالسلام نادي هند ووجه كلامو لكل الشباب الواقفين

:انا عبدالسلام ودالفاتح زول مشاكل ضلي زاتو بشاكلو ومعروف والماعارف يعرف اسي دي. هند دي اختي والله البعاين فيها ساي اقسم بالله الا اقدد ليهو عيونو هند فرحت شديد وهي شايفه عبدالسلام اخد ليها حقها من الاولاد

الناس اتفرقت وعبدالسلام مشي معا هند يقدمها شويه علي البيت وهم ماشين قالت ليهو

:شكرا ليك ياود عمي والله ماتتخيل كنت خايفه قدر شنو وانا بسمع في الاولاد وهم بتكلمو معاي

:علي شنو ياهند انتي اختي وواجبي احميك والبقرب منك مابخلي ابدا

:شكرا ليك كتيير والله تسلم

مشو وهم بتونسو لحدما وصلو البيت عبدالسلام قال ليها

:يالا انتي وصلتي البيت انا ماشي وتاني مافي حاجه بتجيك اطمني واذا حصلت اي حاجه بس كلميني وخلي الباقي علي

:ماتتفضل علي البيت

:بجيكم مره تانيه اسي عندي مشوار مهم ماشي ليهو وسلمي علي عمي وعمتي والشباب

:يصل والله ان شاءالله يالا باي

دخلت البيت وهي مبسوطه شديد ولاقت امها وسلمت عليها امها سألته من المدرسه والقرايه

:والله تمام ياامي كلو تمام بالمناسبه عبدالسلام ودعمي بسلم عليكم

:عبدالسلام لاقيتي وين

قامت حكت لي امها الحصل :الحمدلله يابتي بس ماتحكي لي ابوك الحصل دا قولي ليهو لاقيتو جمب المدرسه وبسلم عليك

:حاضر ياامي

تاني يوم رزان وسهي منتظرين هند من الصباح ومن شافوها مشو عليها

:وريتيني لكن عامله لينا فيها مسكينه ومابتعرفي اولاد

:انتي بتقولي في شنو

:انا بتكلم عن الحصل امس عن حبيبك الدقا الاولاد

:دا اخوي ودعمي يامتخلفات انتو. انتو بس فهمكم واحد اي ولد معا بت معناها حبيبه دي التلفونات دي خربت تفكيركم

جاهم صوت من ورا

:هند الصادق المديره عايزاك

الله يستر المديره دايره هند في شنو بكره بنعرف بأذن الله سلام عليكم