البنات

الجزء 09

الاسره كلها كانت قاعده والمديره والمدرسات والطالبات اصحاب رانيا كانت عزومه جميله جدا جدا المديره لما جات بيت ناس رانيا وقعدت معا امها واخواتها واتعرفت علي الاسره كلها واتكلمت معا الصادق قالت ليهم

:بعد جيت هنا عرفت رانيا جابت الحب والكرم والاحترام والتقدير دا من وين موش الاسره الصغيره بس لا حتي الاسره الكبيره كلها اسره واحده ودا البخلي الطفل ياخد كل الحنيه والحب ويعكسو في المحيط العايش فيهو حقيقه انتو اسره جميله جدا جدا سعدت بي البرنامج الجميل دا وياريت كل الاسر تخت في باله انو الطفل بياخد معاهو كل حاجه بلقاها في البيت اذا كانت الاسره متفككه او فيها مشاكل كتيره حينعكس علي الطفل حتي لو كان شاطر حيكون في جانب فيهو مهم فاقدو وشويه الشطاره دي حتروح معا الحاجات الفاقده. اما اذا كانت اسره ملانه حب وحنان ومترابطه معا بعض اكيد الطفل حيكون زي رانيا وفي دربها نهي

الصادق قال ليها

:بشكرك علي الكلام الطيب دا يااستاذه وكل كلمه قلتيها صاح البيت هو الببدا يكون الطفل والمدرسه بتتم الباقي بالتوجيه العلمي والتربوي اذا الاسره او المدرسه ماقام بي دوره حيكون في نقص في الطفل ودا حينعكس عليهو مستقبلا اما اذا البيت قام بي دورو والمدرسه تمت الباقي اكيد حيكون الطالب او الطالبه متميز في كل شي انا بشكرك وبشكر كل الاساتذه وكل الطالبات علي تلبيه الدعوه وتشريفنا في بيتنا او الصاح بيتكم وهو مفتوح ليكم في اي زمن سوا استاذه او طالبه نحنا بنسعد بي تشريفكم لينا في اي وكت

:تسلم اخوي والله وربنا يديم الاحترام والتقدير بين الناس وتكون الاسره والمدرسه جسم واحد هدفو يقدم جيل يخدم نفسو ويقدم لي بلدو ويعكس صوره جميله

:ان شاءالله اختي

في نهايه البرنامج اي زول قدم لي رانيا هديه.

نهي قاعده وتعاين لي الهدايا بتتقدم لي رانيا اخته قامت قالت ليهم

:يعني انا زول يقدم لي هديه مافي زعلانه منكم كلكم

قعدو يضحكو

احمد قدم ليها هديه وقال ليها

:معقوله ننساك ياغاليه انتي اميرتنا

:انت الوحيد البتتزكرني فيهم

ابوها قال ليهاوهو بضحك

:وانا

:انت كنت بتتزكرني لكن شكلك نسيتني اسي

:ههههههههههه معقوله ياحبيبتي انساك كيف هديتك جوه غرفتك امشي شوفيها

جرت علي غرفتها وشافت الهديه وجات جاريه وجات نطت لي ابوها في رقبتو وسلمت عليهو

:كدا سماح يااحلي بابا في الدنيا كلها

انتهي اليوم الجميل دا ومرت الايام واتحدد عرس اميمه وعشان اول عرس في العائله كانت لمتو حلوه جدا جدا وكل الاسره من اسبوع واكتر جات كلها قعدت في بيت الصادق ونادر يمشو بيوتم ومعا تجهيزات العرس والناس شغاله طبعا عبدالسلام واحمد معا بعض طوالي بي اعتبار انهم اكبر اولاد العائله اي مشوار او شغل عليهم هم واصحابم احمد عرف انو عبدالسلام بحب هند يوم وهم معا بتاع الصيوان بتفقو معاهو وهو طلع يجيب حاجه من بره احمد قال لي عبدالسلام

:ودالخال شايف عينك علي هند

:نعم!!

:مالك مستغرب انا عارف انك بتحبها شديد وشايف الحاجه دي في عيونك

:بس بس هي شكلها عندها علاقه معا زول تاني

:زول تاني من بره العائله يعني

:احمد ماتستهبل علي

:استهبل عليك كيف ياعبدالسلام

:موش انت وهند بتحبو بعض

:لا خالص والله هند زي اختي والله مااكتر من كدا خالص

:قول والله يااحمد

:والله العظيم ياودالخال هي قالت ليك في حاجه بينا

:لا بس شايف عينها عليك طوالي

:دي نظره اعجاب بس مااكتر يالا انا اقول ليك حاجه خلي هند تعجب بيك انت وتكون انت المالي عيونها انت في حاجات كتيره فيك غلط معليش للكلام دا لكن انت اخوي حاول اعمل الصاح دائما وقلل الغلط دا ماتتصنع حته انك كويس لا حاول اعمل الحاجه دي عشان نفسك اول ماعشان زول لما تكون بتعمل حاجه صاح وانت عامله من ضميرك ومن جواك حتلقي كل الناس حبتك واولم هند وكدا حتملك عقلها وقلبها وماحتشوف غيرك ابدا انت اول حاجه قرب من ابوك واعمل كل حاجه عايزه منك اسرتك وامك واخواتك الصغار خليك ابوهم التاني اجتهد في قرايتك ابعد من المشاكل والاصحاب المابتستفيد منهم او السمعتم سيئه صاحب دائما الناس الكويسين وفي الكويسين الناس البسيطين حب الناس ليك بجي بي ابسط الاشياء اذا عملتها صاح

:شكرا ليك ياغالي والله شكرا ليك انا والله سعيد جدا جدا

:سعيد عشان عرفت انو ماعندي علاقه معا هند موش هههتهههه

:هههههه لا عشان كلامك الجميل دا ياغالي

خلصو كل حاجه ورجعو علي البيت وقعدو معا الصادق والفاتح والشفيع وكلموهم بي الحاصل ورتبو معا بعض كل شي الصادق قال ليهم

:انا ماعندي اولاد من بطني لكن انتو اولادي والله الله يخليكم لينا

عبدالسلام قال ليهو

:تسلم ياعمو نحنا فعلا اولادك ودا عرسنا ودا واجبنا

:الله يديكم العافيه يااولادي

الشفيع قال لي عبدالسلام

:غايتو ياعبدوش انت اتغيرت تمام بس في سر نخلي بعد اعمامك الكبار ديل يمشو وتحكي لي اخوك

الفاتح قال ليهو

:دا علي اساس انك انت عمرك 15سنه ههههههههه انت عجوووز يااخوي

:يازول انا قدركم انا لسه شباب وروحي روح شباب انت واخوك دا بعد كدا كبرتو وعجزتو

قعدو يضحكو كلهم وهم مبسوطين وفرحانين جدا جدا

بكره الحفله تعالو بدري

نتابع ونشوف البحصل شنو بكره