بلساني :
جود جودي مالك في شنو ؟!.. أنتي بتبكي ليه الزعلك منو! ... جود قالت لي: أنا تعبت تعبت خلاص.. يعني اذا اتنين حبو بعض وعاوزين يتزوجو لازم يجيبو أطفال!!... على ياتو مبدأ و ياتو قانون النقطه دي مشروعه.. ياخ مش دي أرزاق الله و هو وحده عالم بالغيب و في يدو كل شيء ؟! .. قلت ليها: ايوة لكن في شنو ؟ الموضوع عندو علاقة بي امجد!! .. قالت لي ايوة!.. و تخيلي بابا عمل شنو ! قلت ليها مالو ؟! .. قالت لي تخيلي قبيل جيت مارة جنبهم صدفه سمعتو بيقول انه أمجد ما وافق عليه لإنه ما بجيب أطفال ! .. قلت ليها: لا حول ولا قوة الا بالله.. متأكده!.. قالت لي ايوة.. ياخي انا بحبه ما عاوزه أطفال.. يكفيني أنه يكون جنبي.. اصطبح بي وشو و يكون هو أخر وش أغمض عيوني عليه.. ليه بابا بالقسوة دي... لو جاني وقال لي انا ما كان رفضت... بس اه اه يا تسنيم في نار نار في قلبي مولعه والله... قراره دا هدم حاجات كتيرة وهدم سعادتي وانا من غيرو ما ببقى.. بابا معتقداته دي اخخ منها اخخ .. سته شهور عدت و الليله فتح الجرح كأنها سته ثواني ... آه اه انا أعمل شنو أعمل شنو !... عايني يا جود قرارو يمكن صح ويمكن لا.. ما تعايني كدا اسمعيني..
هو يمكن صح لأنو ما عاوزك تتحرمي من الإحساس ده... و الغلط يمكن لآنه يعني مافي زول عارف قدر الله.. كتار كانو ما بيلدو بس ربنا كريم وهبهم.. و فلنفترض انه كان أنتي مكانه هل بابا حيرضى تترفضي كدا!! ما اعتقد لكن بكرة اقعدى وكلميهو طيب!..
قالت لي ابدا ولا حيغير رأيه ... هدا إنتي حبيبتي أقرب مثال رفض عزام.. اداهو فرصة تانية ؟! .. لا.. ولا حيديهو وإذا فكرتي أو فكر.. قال حيعقد ليك يختي.. قلت ليها: دا كلام شنو! ... قالت لي زي ما بقول لك.. عزام وانتي ما عندكم فرصه تاني..
......
صباح جديد...
"عند عزام"
آها يا ولدي على وين العزم بقى ان شاء الله ؟! قلت ليها : ماشي أقعد مع أبوها تاني و أحاول معاهو.. قالت: عزام دا درباً نهايتو وحل.. بدر الدين رأسه قوي وأنا بعرفو من بدري.. قلت ليها: يمة اكان وحل نهايتو ننتظرو ينشف يعني لا طبعًا... الوحل بيتشال أو يتردم و يتعمر وتصلحه قبل اي شيء... اديني دعاك.. قالت لي: أمشي رضاي عنك وعليك.. و يفتحها في وشك و يسعدك ويسهل امرك ويبعد عنك اولاد الحرام يارب 💙... بستها في رأسها وقلت أمين يارب يلا ودعتك الله 💙 قالت الله حافظ💙
....
"بلسان جودي "
صحيت الصباح ومشيت لماما لقيتها زعلانة و مضايقه قلت ليها: في شنو الزعل ؟ الحلو مالو الليلة من الصباح ! .. قالت لي: غض النظر إنك زعلتي أمس لكن في حسابتك تتسمعي للناس ؟.. ياتو يوم شفتي زول بيعمل حركة زي دي ها ووين وريني!! قلت ليها: آيوا دا المزعلك يعني... أسألك سؤال لو كان التصرف الاتخذوا بابا عملوا زول فيني.. وجاكم قبل العرس يتم بي فتره قال ليكم بتكم دي انا ما عاوزها لولدي .. دون تبرير او اي شيءٍ وهو محتفظ بنفسه شعوركم كيف حيبقى الساعة ديك ؟!
قالت لي: ما كنت حرضى ح أزعل و احاول اعرف المشكلة شنو وإذا بتتصلح كان بها ... قلت ليها بس دا كان العاوزاهو انا.. تجيبوني تخونوني في الصورة مش لا و خلاص مافي نصيب... و بعدين يا ماما انا ما من عوايدي اقيف وأسمع كلام الناس.. لكن جيت ماره وسمعت اسمه أمجد بس و وقفت.. يعني لا عادتي ولا اتربيت على كدا.. بس إنتوا جبتوا سيرته وحصل الحصل .. و ما وقفت لمن ندهتي لاني ماكان قادرة اتكلم ابداً .. اعفي لي 💙
