ما موافقة كيف.. فيني شنو ممكن ترفضيني عشانو ! .. قلت ليهو عزام عاين انا لسه بدري على العرس.. أنا موافقة بس بابا الحيرفض .. حتقول تعالي وانا بساعدك بس بابا لا .. عمرك ما شي اساسي طالما أحنا متفاهمين وبيناتنا في ثقة واحترام 💙 وكونك سعيت وفكرت فيني كزوجتك دا بسطني جداً وما زادك الا حب حبيبي 💙.و #قاطعني..
_طيب المهم راحتك وإذا على السنين حتعدي مش باقي ليك تلاته ! .. بتضحكي مالك! ...ودقيقة خليك كدا.. رفع تلفونو و اتصورنا.. قال لي: ذكرى العريس الاترفض من قبل محبوبته و أذكرك بيها بعد نتلمى في بيت واحد و ححاسبك عليها !
قلت ليهو: اولاً ٤ سنوات مش تلاته.. بعدين حول لي الصورة دي 🙂قال لي: دي حقتي وما بشارك مرتي انا في التلفونات 💙 قلت ليه: غض النظر بس مرتي أحتلت قلبي .. قال لي وأنتِ أسراني بكل شيء فيك يا حبيبتي 💙
...
نرجع للواقع..
قلت ليها: ماما عزام راجل بمعنى الكلمة.. بعرف من صوتي إذا كويسة ولا لا.. و بيخاف على من كل شيء.. كان معاي طول السنين دي .. ماكنت محتاجه اصاحب واصاحب ليه وأنا عندي عزام 💙 اكتفيت بي شهد و بيهو 💙 .. في جوانب كثيرة ممكن أحكيها عنو بس انا ما حصل شاركتوا مع آي زول حتى شهد و هدي اساليها..
"شهد هزت رأسها بي صح وبكت "
يا ماما هو لو كعب ولا ما عاوزني مافي سبب يخليه ينتظر دا كله.. أو اذا طلعت معاه يجيب اخته معاه.. واسي يترفض بالبشاعة دي وتقليل منه..
_يا بتي أبوك عارفاه.. ودا منو ومن اخواتو عيلتهم كدا نسوي شنو... ادعي وحدعي ليك.. الدعاء بغير الأقدار 💛 • باستني وهي طالعة نومي طيب و شهد خليك معاها...
......
في جانب عزام:
_اترفضت!
قلت ليها ايوه.. ويا ريت لو حاجة منطقية... تخيلي يا ماما قال لي انا بدرالدين الشامي عاو# امي قاطعتني: دقيقة.. بدر الدين الواحد دا ماغيرو! .. رجل الاعمال المعروف ده ؟؟ .. قلت ليها: ما كنت عارف دا هو الا بعد قعدت قدامه و جسارتي راحت علي يعني زول معروف و كمان جاي اتقدم لبتو...
-الله اكبر الله اكبر.. يعني خليت الدنيا كلها عاوز تناسب دا مالقيت غيرو! ياخ دا.. استغفر الله بس.. قلت ليها: مالو هو مشكلتو شنو اذا فاتح ولا غامق لوني ولا رمادي دا منطق دا... ولا توزيعه..
عاينت لي و قالت: شوف يا عزام ححكي ليك..
...
في جانب تسنيم:
_عايني يا تسنيم... مش اصابعك ما وحده فيها اختلاف! ..
قلت ليها: شهد: ماوقت مفاضلات و تحاليل.. واطلعي من البوزتيف لإنه ما راكب فيك ،.. ما تحاولي تواسيني حتفشلي أبشرك..
_طيب عايني بالجد المرة دي... اقعدي مع عمو وشوفي الرفض من شنو.. قلت ليها: قال ليك لونو الأسمر دا فرق بيني وبينو... اسي تقول انت لونك فاتح ماهدي صفراء ولا بس لا وخلاص!
_هوي ها انا فاتح لون بشرتي ... انتوا عشان أمك وأبوك طفرة طلعتوا.. حتى بنات اعمامنا غيرانات بي امهاتهم... بيس على التخلف.. قلت ليها قولي كلامك دا قدامهم الا تاني يوم نوزع بليلتك ههه
_ايوة كدي اضحكي يا تسنيم... بعدين شوفي عزام كيف اسي .. قلت ليها: ما حيرد حيكون رسل لي.
_بالله!... كيف عرفتي.. قلت ليها: شهد بعرفه من كم أنا.. حيكون بفضفض لأمه آسي.. وهاتي تلفوني تتاكدي 💙
_طيب دقيقة اشوف ... " ارتسمت علامه إستنكار وتعجب و قالت لي؛ تسنيم لا بالجد يعني .. هو حقيقي عايني كاتب شنو.. أخدت منها و كان كاتب:
" قدر بتغير بالدعاء .. قسمة مع غيرك حدعي ما تبقى... اترفضت مرة ما مشكلة.. طالما فيني نفس حسعى آنك تبقي على ذمتي.. أبوك رفض بس حيغير رأيه تأكدي إذا ما الليلة بكرة في.. اياك تنومي زعلانه .. الزعل ما شبهك... و إذا اصر على موقفه.. حتهور وأعمل زي البنات و ابقى زي اللبن.. كله ولا زعلك وكله في سبيل ضحكة و تكوني جنبي هين... بحبك يا صغيرتي 💙"
شهد بتحكي:
تسنيم الزعل الكان فيها و الابتسامة البدت تظهر في وشها بعد قرايتها للرسالة.. خلتني أتأكد آنهم ثنائي قلب وروح فعلا .. هو بعيد خلاها تضحك و تغمض عيونها.. ما حبيت أناقشها وندخل في اسئله.. لكن هم جايين مع بعض.. يعني اذا واحد تاني ولا حيفكر غير في الإهانة الجاتو.. بس دا غير... امتص زعلها زي الفلتر.. وخت مكانها ضحكة و بسمة وسط الدموع.. صاح لمن قالوا قليل الاتحبو 💙 وكتار ال حبو... وهي اتحبت فعلًا 💙
....
في جانب عزام...
امه بتحكي...
عزام ياولدي انا و بدر زمان كنا زملاء في الجامعة... انا علاقتي معاه سطحية.. لكن مع والدك الله يرحمه..كانت اقوى .. هو ما عنصري زي أهله.. بس بقى كدا بعد اتعرض للخيانة.. كان عندو علاقة مع وحده أسمها أمينة. أمينه دي من اول أبوك حذروا منها.. لكن القلب أعمى.. كان بريدها ريدها تحير 💔.. حتى لمن أهلوا رفضوا مرض مرض الموت.. رقد مستشفى.. نهارو أمينة و ليلو أمينة... أها اهله وافقوا.. اتقدم ليها.. الوقت داك حصل ليهم مشاكل مادية في السوق وأسهمهم نزلت الأرض... شوية ويعلنوا إفلاسهم... أجل عرسهم وحكى ليها.. بعد الكلام دا بي شهر .. عرف المرحوم علاقتها بي واحد تاني واتاكدت شككوا.. قعده وقال ليهو يا بدر الدين أمينة دي حصل منها كذا وكدا .. ما اقتنع بدر وحارب أبوك عديل..بس الله يريدو بدر الدين بالصدفه لقاها مع واحد معارفهم و أنتظر لمن طلعت و مشى للشاب اللي قاعده معاه.. قال ليهو ممكن أعرف امينة علاقتك بيها شنو... الراجل حمش و عصب فيهو قربوا يدقوا.. الا بدر قال دي خطيبتي وبعد اسبوع كان مفترض الزواج ۔۔۔ لكن حصلت مشاكل.. الراجل أعتذر منه وانو ماعندو علم.. وحكى ليهو آنه بفكر يخطب ووافقت عليه و في قعدتها دي ادتني رقم ابوها! هنا بدر الدين الدم غلى فيه وأتصل لأبوك. جاهو وأتحرك لي بيت البت وقعد مع أبوها.. وأعتذر عن الخطوبة ورفض يستلم اي شيء من الجابو ليها ..
وبعدها بي فتره صحبه عزموا للعرس.. مشى على اساس دي أمينة.. لكن اتزوج وحده تانية.. و بعد سبعة شهور أمينة دخلت في حاله نفسيه لأن بدر خطب ثريا بت آهله من بعيد.. و يوم تم العقد... الله يسامحها انتحرت .. وبدر دا بعد عرف انصدم .. آهله سريع سريع تمو العرس لآنه دكتوره النفسي قرر كدا 💔 و بس بقى كدا آهله قالوا ليهو من البداية كلامنا صح و هي جارية ورا قروشك... والعقدة قامت فيهو لي يومنا دا... معذور والله.. غايتو ياولدي حبيت بت راجل.. لكن افضل تصرف نظر عنها ... أهون يقطعها ولا يديك.. بقى يشوف اي زول فيه لون أمينة منافق.. اسي أضرب ليها وأعتذر.. دا درب نهايته مسدودة.
" قالت كلامها و طلعت..
..
قفلت التلفون عشان عارف تسنيم ح تتصل علي.. كان أنسب خيار.. وقلت في نفسي بكرة بكلمها... حاولت انوم بس فشلت.. قمت حيلي و صليت و عزمت اني تاني حرجع واتفاهم مع ابوها في يوم تاني...
يتبع في الحلقات القادمة...
-مات... مات كيف يعني الصباح كان كويس
_اهدي يا#..
-اهدا كيف لازم أمشي زحي من وشي!..
...
-أظن دي النهاية..
_ختيتيها بدري شديد..
-خيروني واخترت.. أعفي لي بس خلاص!
_حتى لو أنتهينا أنا لسه... و طالما قلبي بدق حيكون بأسمك!
#tennana🌸
