بلسان تسنيم:
نجوان قالت: بابا مالو !! .. ما تبكي اتكلمي افتحي خشمك دا بتكلم معاك انا... قلت ليها: دقيت علي الشركة قالوا بابا دخل في اغماء..
_لا حول ولا قوة الا بالله يارب ألطف... جيبي لي تلفوني من جوة سرعه... قلت: اقعدي أول أجيبوا ليك واجي... مشيت جبت التلفون من المطبخ جيت لقيتها ماف في الصالة اتحركت على غرفتها و أول ما قربت لقيتها ممدودة في الارض ... انصدمت خفت عليهم الاتنين خصوصًا دا تاني حمل ليها خفت من آنها تجهض تاني ...
إتصلت على راجلها و هو بدوره إتصل بي الإسعاف و كانوا قبله في الوصول... يعني المثل البيقول المصايب لا تأتي فرادًا ما كذب... بابا هناك و نجوان و طفلها هنا... حسيت اني شيبت وكبرت في يوم... وليد أول ما وصل قال لي وين هي ؟!
قلت ليهو:- في العناية جوة هي كويسة بس لسه ما فاقت.. قال لي بانكسار: و الطفل؟! ... قلت ليهو:- ربنا كريم.. الحمد لله على كل حال هم الاتنين بخير... نزل رأسه و خت يدينو في رأسه و بقى يستغفر الله..
بعد مسافة قال لي: حصل شنو خليتها كويسه ؟ وقعت ولا مالها ؟! ... قلت ليهو :- أنا خليتها في الصالة بس مشيت أجيب تلفونها كانت عاوزه تتصل بالبيت بابا.. بابا يا وليد ما عارفه مالو قالوا لينا أغمي عليه!
_لا حول ولا قوة الا بالله متين الكلام ده... قلت ليهو حوالي الساعة 7 الا ربع... انا لازم أرجع السودان لكن نجوان كمان ... آه يارب!
_عايني انت اتصلي بالبيت حاليًا... قلت ليهو:- إتصلت بس ماف زول رد علي..
_عايني كل أمر بيصيبنا لخير.. وإنا لله وانا اليه راجعون طيب...كلنا لها ... إذا أصابنا خير او ضر مع ان الله ما بيصيب ب ضر إنما أمتحان لينًا عشان يشوف مدى صبرنا و تحملنا و نرجع ندعي و نتقرب ليهو اكتر .. ما تجذعي ختي الفال الطيب.. ادعي ليهم بس الدعاء بغير وربنا قادر... أنا حمشي اشوف الدكتور و أنزل أصلي العشاء وأرجع طيب.. ما حيحصل غير الخير 🤍
......
الخرطوم
أختلاف التوقيت
شهد بتحكي "
جيت بيت عمي لقيت الدنيا مقلوبة.. سألت جودي في شنو من البكى عرفت في مصيبة حصلت.. بعد طلع روح حتى فهمت انه عمي تعبان مشينا المستشفى.. عملو ليهو اللازم بس لسه ما فتح و السبب كان جاتو نوبة قلبية دخل بعدها في كومة..
بقينا قاعدين متوترين و خالتي ثريا ماسكة سبحتها و على قعدة وحده.. قلت ليها:- خالتي اشربي موية بس ما ردت علي قلت ليها خالتي لازم تشربي و جودي معاهو جوة وقبل آي شيءٍ الله معاهو .. قالت لي ما عاوزه شيء بس خليني في حالي.. قلت ليها طيب دي الكرستال جنبك اشربي وقت تحتاجي ليها..
قلت ليها:- تسنيم عرفت ؟!
_ إياك تعرف دي مجنونة بتجي باقي اليوم دا راجعه.. حيي انا من الجاتنا و كمان نجوان حامل الله يستر عليها ما تكلميهم أبدآ لمن نطمن عليهم..
قمت من جنبها جاتني نادية قالت لي بعد دا لازم أرجع البيت لو ما امي كبيرة وبراها كان قعدت... قلت ليها :- ما قصرتي أبدا حبيبتي تسلمي يارب.. بس عاوزه اعرف الوصل عمو للحالة دي شنو ؟
_ كان في واحد جا ونقاشهم احتد و أصواتهم علت دخلت طلعت الزول دا و لمن رجعت ياهو اللي حصل .
قلت ليها : منو الشاب دا من الشركة ؟!
_ لا ما مننا او من الفروع غريب أسمو عزام كان
قلت ليها: عزام!! عزام أحمد كان ؟! في زول عرف غيري ؟
_ ايوة هو .. و جودي كلمتها لمن سالت عنه .. عايني اتاخرت انا آي جديد كلموني طيب
شكرتها وطلعت و طوالي اتصلت تلفون
_ شهد إنتوا وين ياخ من قبيل بتصل !!
=قاعدين قولي بسم الله أول ..إنتي كيف ؟
_ انا لا حول ولا قوة .. نجوان في المستشفى
= مالها اوعى تكون..
_ لا لا الحمدلله جات سليمة.. بابا كيف أسي ؟!
= أبوك كويس جدا مافيه الا العافية
_ أنا عارفة انه فالمستشفى فا اختصري
= حمدلله على سلامتو هو كويس ما تشيلي هم بالجد.. لسه ما فتح
_ يالله !! الحصل شنو يعني ؟!
= نقاش حاد زعل جاتو نوبة
_ زعل!! بابا حتى صفقاته كان لمن ياخدها منافسه ما بزعل.. زعل من شنو ؟!
= زعل بسبب #قاطعتها جود بي أشارة... نينا برجع اكلمك بعدين جود عاوزاني
_ طيب !!
رجعت لجود قالت لي عندك رقم عزام ؟!
قلت ليها لا.. عمي كيف بقى.. ما حيموت صح
قالت لي : عملنا العلينا و فتح أسي الحمدلله.. يا ريت ما تكلمي تسنيم أو نجوان..
قلت ليها: عرفوا و نجوان فالمستشفى بس هي كويسة و الطفل بخير.. قالت:- طيب طيب أمشي مع أمي البيت و تعالوا بكرة العصر .
بلسان جود:
انتظرت أمي و شهد يمشوا مشيت الاستراحة.. يمكن حظ عزام إنه الرقم ما عند شهد.. إتصلت اطمن على نجوان و بعد عرفت أنها بخير و الصباح حيخرجوها و اطمنت عليهم...
جواي لسه زعل من عزام فقلت لي تسنيم .. مره وحده لو خليتي عنادك دا و عاينتي لبابا ما كنا وصلنا هنا... رفضه كنت شايفاه غلط بس بعد الحصل لخير.. أحمدي ربك إنه أتجاوز الخطر و إلا كان حيكون عندي تصرف تاني.. زول قالوا ليه لا اكتر من تلاته مرات الوداهو يمشي تاني شنو وريني ؟!
قالت لي:- و أنا دخلي شنو.. عزام دخله شنو مش أخر مره اترفض وتاني ما جاء البيت ؟!
قلت ليها: دخلكم الاتنين... اللوم فيكم واقع هدي انا قدامك عشان بابا وصحته شايفاني فتحت الموضوع بعد فسخ الخطوبة او جانا تاني.. لا صح... ليه ما قدرتي تمسكي عزامك بعيد عننا.. عارفة بابا لو اتصرف اي تصرف حكون أول الداعمين ليه في اي قرار ضد عزام... عزام عزام الدنيا قفلت وراه مثلًا ولا الرجال انتهوا ؟!
_ أنتي أسي زعلانة ما حناقشك ولا أحسب اني سمعت اي شي و قلتها ليك عزام ما عندو دخل
قلت ليها عنده .. مشى ليهو الشركة لشنو خلاه بين الحياة و الموت و طلع بعدها ياهو عدت على خير المرة دي و لو ما بهمني أمرك كان ممكن ادي إسمه لعمي الكبير لأنو عاوز يعرف لولا تدخلي.. اتكلمي معاه و فهميه ما اشوفه ولا أسمع عنه قريب أبوي تاني ولا جنب بيتنا!!!
بلسان عزام "
الساعة ٣ صباحًا
جاتني مكالمة أول كنت ح أصمت التلفون بس لقيت رقم دولي رديت جاني صوت باكي..
_ عزام انت مشيت الشركة لبابا أمس ؟!
= ايوة في شنو وأنتي بتبكي ليه... أبوك شاكلك ولا شنو ؟!
_ و يشاكلني قول أنت مالك دخلك شنو.. ان شاء الله يقطعني أنت والدني ولا هو ؟
= أهدي في شنو معصبة قدر دا و صوتك عالي
_ بعليه و آنا حُرة و معصبه اي و شديد جدا.. الوداك لبابا شنو ياخ وريني يا انسان ؟!
= أنسان ؟! .. انا عزام تقولي لي إنسان بعد تحسني اسلوبك معاي حتى أكلمك
_ لا يا دكتور دا اسلوبي عجبك ولا لا... مش قلت ليك ما تمشي لبابا الفترة دي حصل ولا لا ؟
= الله يعدي اليوم دا ... حصل أها في شنو ؟!
_ بابا بي سببك جاتو نوبة قلبية... ياخ اديني سبب يوديك قبل أكلمك اتصرفت من عندك ليه ؟! ... أنت خربت أي شيءٍ بمشيتك دي فهمت و اتحمل غلطك دا براك فاهم و بابا لو حصل ليه اي شيءٍ عكسي بسبب دخلته للمستشفى ساعتها أنت حتشوف تسنيم تانية غير البتتكلم معاك دي ... و لغاية ما أنزل السودان ما تقرب حتى آو مجرد فكرة تخطي لبابا خطوة فهمت ؟!
بعد قفلت التلفون قمت حيلي و لفيت الغرفة و بحاول استوعب انه دي تسنيم بتتكلم كدا.. عمرها ما رفعت صوتها ولا اتكلمت كدا.. كمان أبوها في المستشفى بس هو كويس كان ما باين عليه حقيقي خفت من الجاي شديد لإنها بتتكلم بي وعيد و كأني ما بعرفها..
يتبع ...
#نبض_العزام7
