part19
#شكرا_لخذلانكِ
"مقتبسة"
__________________________
محمد قاعد يستوعب في اللي سمعه
جنان:ماتجيش انت واهلك مانبيكش
محمد:سبب بس
جنان:مانبيش بصراحه خايفه نخش عاحياه مانقدرهاش راجل متزوج مرته تخوف مانعرفش طبعه وتصرفاتك ممكن تطلع انت الغالط وهيا مش مرتاحه معاك مالت لانها ترجع لولد خوك
محمد تعصب:تي سكري فمك شن اللي تخرفي فيه هدا، تعرفي جايك وبنتقدم ورح ناخدك غصبا عندك وبعد توصليني نتفاهمو عليه الغباءهدا 😡
جنان:مانبيكش سبحان الله
محمد:سكري الهاتف احسن لاني لو تعصبت بتلقيني في وسط دارك توا،سكر الهاتف وحدفه
جنان:واااك مافيش مهرب منه هدا 😪
اختها الصغيرة جيهان:وعلاش تتهربي منه هوا يحبك
جنان:اسكتي انتي شن عرفك في الكلام هدا يافرخه
جيهان:مانيش فرخه نقرا 3اعدادي ونفهم خير منك غبيه الراجل شاريك وبيطلق مرتك وماعنداش صغار محامي وريتش زي ماحكيتي انه جنتل،اسلوبه رائع ماعندكش سبب ترفضيه عاخاطره
جنان:صاحبتي في مشاكل بسبب مرته وانا هنا ننخطب ونفرح
جيهان:شن علاقتك انتي بعدين نوسه حاتفرحلك والاكثر لانك بتبدي جنبها هيا وسادين
جنان:بهي محمد طارتله مني توا 😔
جيهان:هه اللي تربطه بيديك حله بسنونك ياماما 😏انا عليا نقنعك باش تتزوجي وناخد دارك لكن مشكلتك اللي درتيها حليها بغباوتك يلا تشاو نمشي نشوف شن بنلبس قدام الناس بلكي يعجبو بيا وياخدوني انا
جنان:عليك اخت 😪
_____________________________________
نسيبه قعمزت على كرسي
مفتاح:كيف حالك اليوم
نسيبه:الحمد لله بابا
صالحه:افطري
خدت طاسه حليب:ماخاطريش
خش ياسر:اني جيت
مفتاح:هي احكي خيرك مع راجلك شن خلاك تصري عليهم يجيبوك هنا
نسيبه:مشكله خاصه
صالحه:ومدامها خاصه علاش جايه كنتي قعدتي عنده وحليتيها
نسيبه:شن معاش تبيني نجي ماما خلاص لوحتوني 😢
ياسر:بهي بلا بكي امك مش هدا قصدها بس هيا بتفهمك انه مش اي شي تقولي نبي امي وتجي احنا يوم عطيناك لراجل معناها كبرتي جو الدلع وتشكي لامك وبوك متع زمان كله تنسيه مشاكلك تحليها بروحك حوشك ماتطلعيش منه الا عند ظرف قاتل بتصوني راجل حتا لو غالط والعيب مايطلعش منك مهما صار
نسيبه:بس
مفتاح:اللي قاله خوك مزبوط لازم تتعودي تعتمدي على نفسك الراجل مايبيش مرا تعاود مشاكلهم ودخل عيلتها وعيلته في كل شي كل شي ليه حل، يوم يضربك ولا يهينك تعالي انا بوك لكن بوه قال يبيك ومش راضي على طلعتك من الحوش معناها المشكله تنحل وترجعي
نسيبه:انا جايه نبي نرتاح ايام ونفكر يابابا
مفتاح:هدا حوشك وقت تبي تجيه لكن بموافقة راجلك يابنتي هدا لو يغضب منك تلعنك الملائكة ويغضب ربي
نزلو دموعها لما معاش لقت رد
صالحه:خلاص بري ارقدي شويه تريحي
انسحبت لدارها واول ماسكرت الباب جي قدامها وجهه وضحكته اللي عشقتها من اول نظرة اذكرت حضنه اللي ترتاح فيه قربه منها"استاحشتك ياصقري 😢💔
صالحه:هالبنت بتجنني
مفتاح:معليشي صغيرة واحنا دلعناها بزياده قوليلي ماحكتلك شي
صالحه:بكل على مادرت فيها تقولي مشكله بيناتنا
ياسر:وحتا انا وكوثر امس حاولنا معاها مابتش تقول
مفتاح:كويس كويس خلي تكون ستر وغطا على راجلها هي انا ماشي تبي شي
صالحه:سلامتك شن ندير لغدا
مفتاح:تو نبعتلك كبدة مع الولد ديري لنسيبه قلاية غاليه عليها وشوفي شن بديري معاها
صالحه:ربي يدومك لينا 💜
lole"نطلعو شويه من الرواية الاب ياجماعه قداش هالنعمة مريحه وغالية على قلوبنا كلنا، 💜الاب هو اول حبيب في حياة كل بنت واول بطل في حياة كل ولد،يفكرو فينا طول الوقت،يتعبو ويشقو باش يوفرولنا كل متطلباتنا،مستعدين يديرو اي شي لسعادتنا،اللي يفرحنا يفرحهم واللي تضايقنا ضايقهم،لما يقسو علينا ممكن نزعلو وقتها ونفكرو انه حبهم نقص بس مع الوقت رح نفهمو انهم كانو يصقلو فينا لتجارب قاسيه لدنيا مش حاترحم قلوبنا،مافيش اب قاسي ومافيش اب يكره صغاره،بس فيه اب الدنيا قست عليه وجبراته يكون بشكل ثاني،
نصيحة حبو أبائكم وعزوهم،رهو غيركم متمني نظرة بس من عيون بوه، ربي يحفظ كل أب عايش ويرحم الاموات"
هي نرجعو للرواية 💜
رن الجرس
صالحه:مرحبتين بنور عيوني بنياتي
نادين باستها:انا بس نور عيونك شوفيلهم حاجه ثانيه هادو
نورهان:خزي ياانانيه
نادين:امي وكيفي عاد
صالحه:كيف حالكم قبل
نورهان:الحمد لله ياماما كيف حال بابا وياسر وعيلته
صالحه:باهيين كلنا
نادين:ماما جايبتلك بشارة تهبل
صالحه:بشري هي
نادين:قبل هاك هدي هدية من معتز
صالحه خدت الكيسه اللي كان فيها قفطان بشاربة متعه وكندرة:بارك الله فيه ربي يزيد رزقه ويباركله فيه لكن شن السبب
نورهان:حتا انا عندي ليكم خبر حلو
صالحه:يافرحتي بشرو
نورهان ونادين مع بعض:انا حامل 😍
صالحه:ماشالله روروروروروي 😘ربي رزقكم مع بعض الحمد لله قداش استنيتو يابنياتي الحمد لله 😢
نادين:علاش تبكي اللطف حكيتلك باش تفرحي
صالحه:دموع الفرح ربي يرزق وخيتكم مسكينه
نورهان:نوسه مزال صغيرة عالحمل ومسؤوليه الصغار تشوفي في راجلها مدلعها غير شن تبي تقول بنته
صالحه:اي بالله اونه عطوهم عين تعاركو
نادين:حي خيرهم
صالحه:علمي علمك مابتش اختك تحكيلنا شي
نورهان:ليش مشيتيلها
صالحه:جت امس تعفس في دموعها في دارها راقده
نادين:خلي نمشيلها
نورهان:معاك جايه
خشت نسيم:حنينه
صالحه:يامرحب بالجنة جت تدنى
نسيم:تاحشتك انتي جدو وخالو
صالحه:وبنيت خالو
نسيم:نلا انا تعاركة مع ايلان عاش صاحبتي 😣
صالحه:ايااه تعالي معاي احكيلي كيف تعاركتو
في الدار نسيبه حاضنه نادين وتبكي
نورهان:غير احكيلنا شن صار
نسيبه:نحبه انا 😭😭😭
نادين:هالكلب الحيوان هدا غير وعدني مايزعلكش 🤬😡
نورهان قرصتها:كوني محضر خير
نسيبه:عرفتوا مرت محمد عمهم
نورهان:ايه عايشه اسمها تقريبا
بدت تحكيلهم في اللي صار من الاول
نادين:ياروحي 😔معاش تبكي تقطعيلي في قلبي يانوسه
نورهان:حبيبتي بس هوا مش غلط
نسيبه:دس عليا خلاها ضايقني
نادين:يعني انتي لو كنتي عارفه من اول زواجك انها ماضي راجلك ماكنتيش حاتواجهيها لما ضايق فيك
نسيبه:اكيد لانه هيا ديما تلقح عليا وتحاول تحرجني وطلعني اخي قدامهم
نادين:شفتي النقطه هدي خلت صقر مايحكيش مايبيش يدير حساسيه بينكم تخلي العيله تنتبه والموضوع يكبر يوصل راجلها انتي قلتي بروحك لما جابها وجها متشوه من الضرب تخيلي قتلها او شك في صقر وتصرف تصرف متسرع كنتي توا ارمله ياحلوة
نسيبه:هيي بعد الشر عليه
نادين:شفتي فكري فيها بعقلك رح تلقيه دس لمصلحتكم لانه انجبر يتقبل عيشته معاها في نفس المكان انحط في الامر الواقع لما لقي روحه مروح وبيتزوج
نسيبه:بس
نورهان:مابسش راجلك ماغلطش
نادين:ازعلي بهي فترة وانفخي عليه باش يتعلم معاش يدس وفي الجديد كل شي يحكيه وتحلوه مع بعض لكن في عقلك اقتنعي انه تصرف صح وانتي واخده راجل محترم عاقل ورزين
نسيبه:اممم
نادين:خلاص عاد اضحكي جايين بنحتفلو ره
نسيبه:ليش
نورهان:انا واختك بنجيبو بيبي
نسيه:حي قصدكم الزوز
نادين:لالا انا حامل بزوز واحد ليا وواحد ليها نوضي ياهبله 😂
نسيبه:خزي 🤭
نورهان:اضحكي ياقلبي مايطلعش عليك الزعل
نادين:تعرفو معتز بياخدلي سيارة هديه
نورهان:بدينا 🙄
نسيبه:حتا معتز 😂😂
نادين 🙄
خشت عليهم نور:اجتماع من دوني
نادين:اهي جت الخوافه 😂😂
نور:مابردك حقي نخاف والله صغاري
نادين:خايفه على صغارك مشيتي تجري لحضنه
نورهان:واا على كلامك زي السم كيف متحملك راجلك انتي
نادين:عاجباته وزي العسل عاقلبه كلامي
نور:حتا عبودي عاجباته
نادين:ودوم عليك من قالك لا غير عذبتيه يمشي ويجي مسكين
نور:عادي فداي
نورهان:توا بتتعاركو نوضو نشوفو شن بناخدو هيا بنحتفلو كلنا
نادين:انا بنطلع مع نوسه و نجيب العشا انتم شوفو وضعكم في الحلو
نور:انا ناخد الكيك
نورهان:وانا ناخد شكلاطه ونوعين حلو
نسيبه:وانا 😣
نادين:انتي تنوضي تلبسي وتجي معاي
نسيبه:به
وطلعو كل وحدا تاخد في حاجه
______________________________________
الساعه 4 العصر
محمد:هيا
خوله:خيرك مضايق ماكنتش هكي الصبح
عفس عالدخان وتنهد:ماتطلعش عليا الفرحه
طلعت سعاد:هيا مانبوش نعطلو ولا الناس جايين عالمغرب
محمد:لالا انتم قولولهم جنان وخلاص مانبيش ندير حتا مقابله
خوله:اللطف علاش
محمد:هدا هوا نوري قال اركبو معاي
خوله:هيا مالا توكلنا عالله
وصلو حوش الاميرة
محمد:هدا اعطهولها في ايدها
خوله:بهي حاضر
خش محمد مع خوته للمربوعه
سليمان:انستونا والله
نورالدين:تسلم الله يعزك خوي والله جايك في طلب ان شالله ماتردناش
سليمان:باذن الله ماتطلعوش من عندي الا راضيين تفضل
نورالدين:هدا خونا الصغير محمد عمره 35عام متزوج وبيطلق قريب ماعطاشي ربي صغار شاف بنتك وناوي الحلال والقرب منكم جينا من الباب وطالبين بنتك الكبيرة
سليمان شاف لمحمد:وشن تخدم
محمد بكل ثقه:محامي
سليمان:بنتي صغيرة تخش على طلاق
محمد:نورالدين كيف واخد لولده بنت مفتاح ال..... واظن صاحبة بنتك
سليمان:بجديات
نورالدين:ايه
سليمان:وتخليها تكمل قرايتها
محمد:حتا لو هيا بتسيب انا نجبرها عليها
سليمان:والله نتشرفو بنسبكم ولكن الراي للبنت نسألها وان شالله خير
نورالدين:يارب
اما داخل
خوله:ماشالله عالزين يابخته حميدة
ربيعه:نتشرفو والله
سعاد:تقري مع البنات!
جنان:ايه نقرا مع نسيبه وسادين صاحبتي قرينا مع بعض في الاعدادي
خوله:بهي معناها مش غريبه بيناتنا كان صار نصيب ان شالله
ربيعه::ربي يقدم اللي فيه الخير وخيتي
خوله:تفضلي هدي هديه بسيطه من حميده
جنان خدت الباقه والكيسه فهمت انه مايبيش مقابله انسحبت من جنبهم مشت لدارها
جيهان:ترا افتحيهم
جنان:قرت الورقه عالباقه"ربي يكتبك من نصيب قلبي"
والهدية كانت هاتف جديد بشفرته وسلسه باسم "جنتي"
جيهان:اااخ رومنسي العطيب 🤤 خسارة فيك يافقريه
جنان:اوووف وانا مزعلاته
جيهان:ماتفهميش شورني بنمشي نقلهم خودوني
جنان:اطلعي والنبي خليني بروحي
جيهان:ماشيه
اتفقوا انه بيشاورو البنت ويردو عليهم طلعو روحو لاستقبال اهل احمد
_____________________________________
نسيبه:وين بنمشو
نادين مركزة عالطريق:بنمشو لمطعم النجم نكسدو بروحنا ونستنو معتز بيجي هوا ياخدلي العشا عنديش هلبا فلوس
نسيبه:وعلاش مطلعتني انا
نادين:نبيك تغيري جوك يانكدية عارفاتك تتحشمي تهدرزي لخواتك انا اقرب لقلبك 😌
نسيبه:ياندو
نادين:عيونها
نسيبه:نحبه 😢
نادين:علاش مسيبتيه
نسيبه:لانه دس عليا خلاني منظري هبله قدامها
نادين:بس هوا تعامله معاك مش معامله واحد عقله مع غيرك
نسيبه:عارفه حتا انه
نادين:شنو رقدتو مع بعض اخيرا
نسيبه:وووه لسانك بكل انتي 🙈
نادين:لاحياء في الدين عزيزتي المهم تهنيتي وتو تشوفي كان مايزيدش يهبل عليك مانتسماش ندو هدا وين بيتعلق وبيحب عالمزبوط وانتي عاد صغيرة بعقلك تخليه كيف ماتبي تو نعلمك كل شي 😉
نسيبه:به
نادين اتصلت ودارت روحها زعلانه:قلبي
معتز:خيرها غزالتي
نادين:دايرين بارتي في حوشنا وطلعت بناخد العشا نقصو عليا الفلوس حبيبي
معتز:علاش تطلعي انتي مش قتلك راحه بس وين توا!
نادين:في النجم
معتز:اهو جايك تو ناخده انا خليهم عندك فلوس
نادين:تمام نستنا فيك وسكرت
نسيبه:مافلحك
نادين:تعلمي 🙂
قعمزو يهدرزو لين وصل
معتز:حبيبي
نادين:عطلتش
معتز:اي كنت قريب من هنا كيف الحال
نسيبه:الحمد لله وانت
معتز:تمام هي شن تبي ناخدلك
نادين شدت ايده:امم نختار اللي نبيه
معتز:طبعا اميرتي تدلل بس
ماصدقت صاحبتنا بدت تسمي وتاخد مافضلت حاجه سلايط على مقبلات وشربات ووجبات فلس الراجل. 😂
معتز:تمام هكي
نادين:امم بيبي
معتز:ياعيوني
نادين:خاطري في الكيك هدي اطلبلنا انا ونوسه
معتز:حاضر عاشنو تبيها
نادين:ميلكا ونوسه كيتكات
معتز:اوك كولي وللحوش طول الطلبيه نبعتهالك توصيل بعدين يستلمها ياسر
نادين:حاضر
معتز:ردي بالك على روحك وسوقي بالشويه
نادين:نحبك اني
معتز:نموت في حبك ياعمري 😘🤤
نادين:مروح للحوش
معتز:اي مكسد مع امي
نادين:سلملي عليها
معتز:يوصل سلام
نسيبه:حي عالراجل فلستي بيه
نادين:علاش يخدم مالا كان مش عليا انا وصغارنا مستقبلا 🙄كان نخليهمله بيفكر شن يدير بيهم اصلا
نسيبه:كيف
نادين:حبيبتي هوا يخدم من الاول باش يتزوج ويبني حياته بعد خداني بدي يخدم عليا انا يعني الفلوس صرف ماعنده علاش بيدسهم
نسيبه:بس انتي ماعاجبك العجب
نادين:من قال بالعكس عاجبني كل شي يديرلي فيه معتز بس المفترض ديما تخليه مقتنع بانه اللي داره شويه ماتحسسيشي انه دارلك هلبا ولا حاجه كبيرة لا ديما وريه انه عادي يعني ماتنصدميش افرحي في حدود المعقول خليه ديما يجاهد للافضل يتعب باش الحاجه تعجبك يسعى ديما لرضاك صدقيني وقتها حاتبدي في نظره ديما هلباا واياك تسمحيله ياخد قرار بالنيابه عليك لا انتي حره وعقلك في راسك تقرري بنطلع هنا بناخد هدي بناكل هدي هوا ماليشي علاقه حتا لو خديتي رأيه مجامله ديري اللي في راسك ماتسمحيش انه يطفيلك شخصيتك ديما خليك حرة نفسك وقوية
نسيبه:هدا كله دايرتيه
نادين:مخليني مرتاحه ومعتز غير رضاي وعنده نادين بالدنيا
نسيبه:صح والله حتا لما يجي لحوشنا عيونه مايحولش فيهم من عليك
نادين:ونقطه مهما وصلت درجه حبك ليه ردي بالك تخليه يشوفها ديما وصليله فكرة انك قادرة تتخلي وحياتك ماتوقفش عليه الراجل لو شاف انك تحبيه للموت حايبدا يجرب في ردود فعلك في بعده وضعفك في جفاه لكن لما يحس انك زي بيه زي بلاه قويه وعايشه في كل الحالات رح يتمسك بيك اكثر واكثر لانه بيعرف لو خسرك مستحيل حد يعوض مكانك 💜فهمتي يااختي الحلوة
نسيبه:قداش نحبك
نادين:وانا نحبك ردي بالك من راجلك لاني شايفه حب كبير في عيونك وردي بالك تضعفي
نسيبه:حاضر.....................يتبع
_______________________________________
ننهو الحلقه هنا لاني تعبت في الكتابه اليوم 😓 والبارت الجاي نكملو
الرواية بتكون 30حلقه يعني مزال 11حلقه
من التعليقات بنختار وحده او اثنين بيسربولكم معلومات من الحلقات الجايه ومعلومات من النهاية 🌸 بس نبي نشوف تعليقات حلوة وتفاعل لاني نتعب في كتابتها وافكارها ✨
