part25
رواية #شكرا_لخذلانكِ
"مقتبسة"
الاخيرة
___________________
أحمد حضنها قدام الناس كلها بدون مايهتم لحد:انا كويس تعافيت بفضلك بعد ربي
اريام:الحمد لله 😍حبيبي يعني بديت كويس
احمد:ايه الدكتور قالي تمام وتحاليل كلها نضيفه
اريام:الله اخيرا
احمد:ربي يخليك ليا يااحلا شي في حياتي 😍
اريام:ومايحرمني منك هيا نمشو نبشرو سندس
احمد:هي
جيهان:يابابا 😣
سليمان:قتلك عندي خدمة مانيش فاضيلك روحي مع وحدا من صاحباتك ولا كلمي راجل اختك يجيك
جيهان:معاد عرفته محمد راجل بنتك ولا شغال كل يومين جايني يروح بيا
سليمان:سكري بلا طولت لسان يافرخه
جيهان اتصلت باختها:واااك
جنان:خير بلاك تعيطي
جيهان:انا قعدا في المدرسه بوك مش جايني دبريلي وتعالي روحي بيا
جنان:بهي تمام حمودي
محمد:عيونه
جنان:جنو مالقتش من يروح بيها بابا مشغول
محمد:ياروحي عندي اجتماع توا مانقدرش نمشي اساسا متاخر
جنان:به شن يصير
محمد دار مكالمه:وين انت
رامي:كيف خشيت شارعنا
محمد:فوت علي جنان ارفعها بتروح باختها من المدرسه
رامي عيونه لمعو:وين تقرا هيا
محمد:المركزية
رامي:تم هي قلها تطلع
محمد:اهو رامي بيرفعك
جنان:ناقصه هيا
محمد:نعم
جنان:شي حبيبي بالتوفيق
محمد:منورة ردي بالك على روحك
طلعت :خير
رامي:خيرات
جنان:سامحني بنتعبك
رامي:مش مشكله
جنان:تسلم
رامي:سجلتي في الجامعه ولا بيقعمزك محمد
جنان:لا سجلت
رامي:شن بتقري
جنان:صيدله
رامي:كويس ربي يوفقك وخيرك ماتقنعيش صاحبتك تكمل قرايتها
جنان:نوسه من يوم عرفتها تكره المدرسه والقرايه صعب حد يقنعها مع انها شاطره هلبا
رامي:خساره ضيع عمرها
جنان:مرات صقر يقدر يقنعها
رامي:مرات ايه وينها الطشه مش باينه
جنان:تو ننزل نشوفها
رامي:خليك تبي محمد يقتلنا مالا 😅
نزل خش للمدرسه قعد يدور فيها لين حس بحد قرصه
تلفت:وعليكم السلام 🙂
جيهان:علاش جيت انت وين حمادي
رامي:مشغول شن مش عاجبك انا
جيهان:اممم كان تاخدلي جيلاطي تبدا احسن واحد
خدي منها الشنطه وطلعو:وين بنلقاه في الصقع
جيهان:دبر
رامي:تمرضي
جيهان:محوله اللوز نمرضش
رامي:اياااه حصله
جنان:خيركم
رامي:اختك تبي الجيلاطي
جنان:ماتعياش منه هدي ديما تاكل فيه
رامي:ناخدلك بضاعه وديريه في الحوش
جيهان:كيف
رامي:تو نقولك شن موافقه
جيهان:عادي
جنان:تحشمي
رامي:خليها
جيهان:ماقتليش
رامي:نعم
جيهان:الحلو مخطوب ولا يراجي في المكتوب 😉
ضحك رامي بصوت عالي 😂😂😂
جنان 🤦♀️🤦♀️🤦♀️
رامي:نراجي في المكتوب الحق
جيهان:بهي ربي يبعتلك بنيه الحلال
رامي:ان شالله تبو حاجه
جنان:تعبناك
رامي:ياودي عادي يامرت عمي ماتركزيش
جنان:تو انتي تتحشمي
جيهان:لا 🙄
جنان:خرا فوق ما متعبينه يروح بيك وزايده تطلب في الجيلاطي وتتسهوك وتعاكس
جيهان:وين المانع الولد جميل
جنان:ياربي صبرني
جيهان:جو زايد ديري فيه كان تخليني والله نجيبه على وجهه ومانبدا الا مرته
جنان:غير الهي في قرايتك يافرخه
جيهان:ننننن
رامي:هي تفضلي يااميرة
جيهان:خيتي سلمه وجايب حتا شكلاطه
رامي:اول مره تركبي سيارتي ره
جيهان:محلاك 🥺
جنان بتموت من اختها 😂
رامي:بس نبي حصتي من الجيلاطي
جيهان:حاضر
جنان:انزلي
جيهان:باي ياجميل
رامي:باي يا طشه
نرجعو بالوقت شويه نشوفو شن صار مع سادين
واقفين قدام بعض كل واحد قلبه مش راضي على تصرفاته بس مصرين يتصنعو القوه
معتصم:انتي اللي جبرتيني
تلفتت:لو طلعت من ليبيا اعرف انك طالع من قلبي وحياتي
معتصم:قولي انك معادش تبيني بس ترتبي في اعذارك واحد ورا الثاني
سادين:لو هكي فاهمني لو هكي تشوف فيا سلامتك ياولد عمي
معتصم:متأكدة انتي
سادين ومزال عاطياته ظهرها:هدي ثاني مره تهددني بالسفر،مش حانقعد عمري كله نتبع فيك لاني خايفه من بعدك اللي خلاني نعيش السنين هدي كلها بدونك يعيشني باقي حياتي بلاك
معتصم:تلفتي
سادين مسحت دموعها:توصل بالسلامه ومشت
خوله:خيرك شن قالك
سادين:امشو انتم انا ماشيه لجنان
خةله:تعالي هنا خيرك تبكي
سادين:ولا شي سلميلي عالبنات
الباب يخبط بقوة
فتحت جنان:خيرك 😨
طاحت عليها سادين:بيمشي بيسافر 😭😭😭خلاص سيبته قتله مش حانرجعلك
جنان:غير اهدي شن صار علاش تعاركتو
سادين:حقير كل ماتصير حاجه يقولي بنسافر ونخليك انا مش ضعيفه باش نقعد نترجا فيه
جنان:بهي شن صار توا
سادين:قتله لو تطلع من البلاد تنساني وانتهينا
جنان:علاش انتم تعاركتو
سادين:يبي العرس توا احنا صح حددناه في الوقت هدا بس مش معقول نديروه
جنان:صح مش وقته بكل خيره مايصبر حتا شهرين بعدين هوا قاري فاتحه يعني كله عادي
سادين:تافهه المشكله بس توريك الحقيقه انا وياه مش لبعضنا
جنان:لالا شن هالكلام مش اول مره تتعاركو ترجعو غير هوا متعصب وتصرف غلط
سادين:انا نعرفه وقت يسكر راسه على حاجه يديرها لو يكون اخر يوم في حياته وصدقيني بيسافر
جنان: هوا مش حايهون عليه يزعلك
سادين:نزعل! لا انا بننهيها بكل
جنان:ماتنسيش انك مرته
سادين:قصدك بتنحسب عليا طلقه هه عادي وين المشكله 😢
جنان:لاحول ولا قوة الا بالله خلاص معاش تبكي طز فيه هوا الخاسر في الاخير واهله مش حايخلوه
سادين:💔
نادين:شن
دكتورة:ماشالله صحتهم كويسه
نادين:صحتهم!!
دكتورة:اي مدام بيجيك توأم بنوته ووليد ربي ينوضك بالسلامه
نادين:الله بجديات
دكتورة:ايه بنعطيك شويه فيتامينات وارتاحي
نادين:تمام
خدت الوصفه وطلعت
معتز:هاحبيبي شن صار
نادين:بترفعني لماما توا
معتز:ياودي بهي من الحوش قتلك بنرفعك قوليلي توا شن البيبي
نادين:كويسين
معتز:بهي الحمد لله
نادين عرفاته ماركزش ضحكت وفاتت
بعد مشا مشوار بالسياره شد فرين بقوة
نادين:خيرك بتقتلنا
معتز:انتي قلتي كويسين ولا انا سمعت غلط
نادين:اللي شاغل بالك
معتز:قولي
نادين:ايه هنا فيه توأم
معتز:قولي والله
نادين:والله 🙄
معتز:بنات
نادين:بنت وولد
معتز:الله اكبر 😍ربي يخليكم ليا معاش فيه حركة نهائيا
نادين:عااساس قبل تخلي فيا نتحرك 🙂
معتز:بنرجعو لداري في حوش العيله
نادين:وعلاش
معتز:مافيش ركوب ونزول هدا انسيه
نادين:الصبر يارب
معتز:الله بيجيني زوز منك 😍😍😍
نادين 🙄🙄
___________________________________
فؤاد:قعمزي
ليان:نلا نلا نلا نبي نمشي لحوش جدو
فؤاد:جدك طالع مش توا كلمتيه
ليان:كلموه تاني
فؤاد:تي قتلك قعمزي يانم صدعتيني 😡😡😡
بدت تبكي:ماما 😭😭😭
جت مرام:خيرك
فؤاد:ديري عملتك وابكي مش عارف لمن طالعتلي هالفرخه
مرام:شن دارت
فؤاد:قعدا في نفس النقه
مرام:بهي ياماما مش قالك جدو لما نروح نجي نرفعك
ليان:ايه
مرام:خلاص انتي قعمزي عاقله باش يجيك لانه جدي قال اللي يدير شطانه مش واخده
ليان:بهي عاقله
مرام:ايوه بنتي السمحه
ليان:بابا شين
مرام 😂
فؤاد:زيك
ليان:ني شينه ماما
مرام:لالا بنتي عسل يقطر
ليان 😛😛انت شين بروحك
فؤاد:هبله
مرام:سمعت بام نسيبه
فؤاد:ايه كلمت ولدها وصقر بكري
مرام:ترفعني للزياره بعدين
فؤاد:حاضر
مرام:سلمه حبيبي
فؤاد:بري كملي شغلك احسن لانه بنتك مقعمزه
مرام 🤭
ليان:شن تقول
فؤاد:شي
نسيبه:صقر 😣
جاها للدار:ها حبيبي
نسيبه:بطني توجع فيا 😭
صقر:من وين
نسيبه:هنا
صقر:شن كنتي ديري
نسيبه:ااه لالا ☹️😳
صقر:بهي ارقدي عاظهرك
نسيبه:لا توجع فيا
صقر قعد يدلك فيها لين ارتاحت:تمام توا
نسيبه:ايه شن صار
صقر:تشنجات عاديه تصير لما تتحركي غلط 😒
نسيبه:حبيبي
صقر:سألتك بكري وقلتي مادرت شي
نسيبه:دفيت الكنبه بس 🥺
صقر:بهي نوضي حولي السرير 😡
نسيبه:لا خلاص
صقر:اني طالع
نسيبه:حرجت مني
صقر:تتحركي من مكانك نهارك احرف 😒
رامي قعمز عالصالون:امي
خوله:خيرك
رامي:عادي الواحد يحب في ايام
خوله:😒😒شن تبي انت
رامي:قلبي يبيها لين خلااااص نبيها مرتي
خوله:ومن هدي
رامي:فرخه رهو حتا اني
خوله:نوض من جنبي غير اكبر انت بعدين خود وحدا صغيره
رامي:يما فكيني عاد اهو الشهادة بنجيبهالك الشهر الجاي وحوشي نبي نبني فوقك
خوله:وبه من هيا مطيوحه السعد اللي راضيه بيك
رامي ابتسم بهيام:اخت جنان
خوله:منو
رامي:اخت مرت محمد
خوله:هاديكا اللي لسانها ملوي على رقبتها ميه لويه وتقرا اولى ثانوي
رامي:ايوه
خوله:ترا مدلي ريموت علي نفتح على المسلسل
رامي:شن رايك
خوله:تحرك ياولد بيفوت عليا
رامي:استغفر الله انا نمشي ندوي مع بوي
خوله ولا كأنها تسمع فيه فتحت عالمسلسل وتتفرج
روح محمد:جنتي
جنان:عيونها عاسلامتك حبيبي
محمد:الله يسلمك جيعان راه
جنان:عارفاتك غير تلقاه واتي
سادين:عمو
محمد:اووو حبيبت عمها هنا نورتينا
حضناته:استاحشتك
محمد:ياعيوني حقك عليا ليا فترة ماطلعتك ولا هدرزنا
سادين:مش مشكله
محمد:كيف تجهيزات العرس
سادين ضحكت بوجع:مافيش عرس عمو
محمد:شنو
سادين:معتصم سافر
محمد:ليش
حكتله اللي صار من البدايه
محمد مسحلها دموعها:مزال ماانخلقش اللي يبكيلي بنتي الحلوة وكان مشا شن يعني الزين هدا كله مايستاهلاش الكلب وعد من عمك نعذبه ونبكيه زي مابكاك
سادين:نطلب منك طلب
محمد:عيوني ليك
سادين:تعالا معاي نقول لبابا وخوتي مش قادره بروحي
محمد:حاضر بس نتاكدو انه سافر
سادين:به
طلع برا واتصل:الو
معتصم:ها ياعمي
محمد:مصر على قرارك
معتصم:تي خيركم كلكم واقفين معاها
محمد:بلاش كثرة دوه سؤالي واضح بتسافر او لا
معتصم:ايه مسافر
محمد:متأكد
معتصم:ينادو على طيارتي توا
محمد:مالا اسمع توا طالع لحوش عمك بنوقف كل شي والبنت عندي معادش ليك اي علاقه بيها ترجع بعد شهر شهرين،ولا حتا عامين حاتلقاني في وجهك طول مافيا نفس، اي ومعلومة تانيه بنرفع عليك قضيه ونطلقها منك غيابي تمام توصل بالسلامه هي وسكر عليه تلفت بيخش لقاها واقفه
سادين:مشا
محمد:لو مزلتي تبيه مش
سادين:هيا
طلعو لحوش العيله اتصلو بالولاد باش يتجمعو ومعاهم مسعود وسعاد
خوله:ان شالله خير
محمد:خلي يحضرو ولادك المصايب
فؤاد:ديما نازل فينا
محمد:قعمز واسكت انت عايش في الدنيا ولا برا منها
فؤاد:برا منها شن فيه
على خشه صقر:خير ياعيله
رامي:ادوي هي
سادين مواطيه راسها ودموعها ماوقفوش
صقر:خيرك تبكي انتي
محمد:العرس اللي تجهزوله وقف والتغى ولدك سافر
مسعود:شنو
محمد:زي ماسمعت،على عينكم كل ماتصير لقطه ماتعجباش يلم شنطه ويسافر يهرب يعني بالمختصر والبنت معادش تتحمله عاره هدا قالتله لو تسافر المره هدي خلاص وسافر
سعاد:ياحليلي
نورالدين:علاش تعاركتو
سادين:يبي العرس الاسبوع هدا
نورالدين:وانا مش قلت يتأجل على خاطر مرت خوك
سادين:هدا اللي قلته بس هوا مايبيش
نورالدين:سلامته
محمد:بنطلقها منه
مسعود:بس
محمد:مابسش ولدك عيل وبنتي مش لعبه عند حد
مسعود:نخليه يروح وياخدها
سادين:انا معادش نبيه ياعمو ارجوك ماتحطنيش في موقف اخي انا جبتكم كلكم مانبيش تصير مشاكل بيناتنا ماما ماتزعليش من مرت عمي هيا ماقالتش لولدها يدير هكي فيا بابا ماتاخدش على خاطرك وتشيل من عمي وانتم مانبيكمش لو رجع بعد وقت تضربوه او تتعاركو معاه تنسوش انه ولد عمنا الوحيد رامي ارجوك فكر قبل ماتمد ايدك هادو عيلتنا اخر شي نبيه انا نتقاطعو بسبب انه النصيب ماجمعناش انا وولدهم 💔
محمد:ربي يكملك بعقلك
سعاد تبكي:سامحيني يابنتي والله 😢
سادين:عادي ياعميمه ربي مش كاتب الحمد لله عاكل حال
خوله:ربي يبعتلك ولد الحلال اللي يستاهلك
سادين:ان شالله خيركم ساكتين
فؤاد:عندك عقل حتا انا الكبير ماعندي نصه
سادين 😅:الله غالب عليك
صقر حضنها:انا ديما ظهرك
سادين:ربي يخليك لينا صقري
رامي طلع بدون مايقول شي
مسعود:سامحني ياخوي
نورالدين:السماح ولد امي ماتكدرش روحك
اما سعاد انسحبت وهيا قلبها واجعها على سادين اللي معتبرتها بنتها
نسيبه مقعمزة تتفرج لين انفتح الباب وخش وراه وحده
صقر:سلام عليكم
نسيبه:وعليكم منو هدي
صقر:الشغاله دير كل شي في الحوش نشوفك متحركة ياويلك هدي مدام نسيبه
شغاله:اهلا مدام
نسيبه:اهلين
صقر:شوفي الحوش ومبدئيا الفتره هدي بتقعدي عندنا لانه مدام حامل مانبيها تتعب ولو شفتيها دير في شي غير الطبخ قوليلي وليك مكافئه
شغاله:حاضر بابا
صقر:بري شوفي المطبخ
نسيبه:خيرك حبيبي
صقر:سادين ومعتصم سيبو
نسيبه:علاش
صقر:اختلفو وماصارش نصيب
نسيبه:كيف بيصير توا
صقر:محمد قال بيطلقها غيابي
نسيبه:علاش وين مشا هوا
صقر:سافر
نسيبه:بنمشيلها
صقر:بهي ردي بالك
نسيبه:اوك
جنان:ياروحي 😭
محمد:تكبر وتنسا لكن وربي لما نوريه الكلب
جنان:ماتستاهلش
محمد:😒بهي ليش تبكي انتي
جنان:وجعتني دوسه
محمد:غير حطيلي ماناكل بنموت من الجوع
جنان:بهي
اريام عالهاتف:تتكلمي بجديات
سعاد:والله مازدت عليك حرف يابنيتي كان تشوفيها تقطع القلب
اريام:خيره الحقير هدا
سعاد:هرب وخلانا في الحشمه مع حوش عمك
اريام:خلي نشوف احمد تو نجيكم
سعاد:بهي
"برايكم قصه سادين ومعتصم بتم ولا مزالت مستمره "
____________________________________
دكتور:الحمد لله صحتها تحسنت مرات الايام الجايه نطلعوها لغرفه عاديه
مفتاح:الف حمد ليك يارب
دكتور:روحو ياعمي هيا في العنايه مايخشلها حد غير تعبو في روحكم ولما تطلع يقعد معاها مرافق واحد
مفتاح:ان شالله بارك الله فيك ياولدي
كوثر:شن صار
مفتاح:قال روحو مافيش داعي يقعد حد هيا تحسنت
كوثر:الحمد لله
مفتاح:هيا بنيتي نمشو
كوثر:تمام خديت دواك اليوم
مفتاح:خديته ربي يحفظك ويحميك من كل شر
كوثر:امين ويخليك لينا انت وعميمه
مفتاح:نادين حكتلي شن داير فيك الكلب هداكا غير انشغلنا مع عمتك مش ناسيك ونديرلك حل راك بنت الغالي
كوثر:تسلم ياعمي
مفتاح:والله استحشت هاديكا الحلوفه نمرو عليها توا
كوثر:عادي تو نكلم ماما توتيها
مفتاح:بهي
بلقيس:ماماااااااا 🤭
نور:نعم ياماما خيرك تعيطي
بلقيس:رهو بسوم طاح مني
نور جت تجري:🙄شنو
بلقيس:شنو
نور:تعلمتي خفه الدم من بوك
عبدو:وخيره بوها مش عاجبك
نور:حول من قدامي وانتي معاش تكلميني
بلقيس:بصر معاك يامامي 😥
نور:من معلمهالك البصاره هدي
بلقيس:بابتي
نور:خلاص خلي بوك ينفعك
بلقيس:بننزل لجدو
نور:انزلي
عبدو:خيرها غزالتي
نور:شي
حضنها:مستاحشك
نور:اني معاك
عبدو:قلبي شن رايك بعد تشد امك صحتها نسافرو احنا والصغار لينا فتره ماطلعناش من قبل تجيبي السيد باسم
نور:عادي و
عبدو:مش رافعين حد معانا
نور:بهي 😁
بلقيس نازله تلعب سمعت الباب متع الجنان يخبط مشتله:منو
بنت:افتحي حبيبتي انا خالتو
بلقيس فتحتلها:من انتي
ضحكتلها:شن رايك نمشو ناخدو لماما هديه حلوة
بلقيس:اممم 🤔شن ناخدو
بنت:دبدوب حلو كبييير
بلقيس:هي 😍
شدت في يدها ومشت 🤦♀️
أريام:حبيبتي
سادين:استاحشتك يامعفنه خديتي راجل ونسيتيني
اريام:ابكي ماتحاوليش الكل يصدقك الا انا نعرف قداش تحبيه
سادين:وكسرني 😢💔
اريام:تو يندم
سادين:مش حانرجعله
اريام:ابكي وارتاحي ماتقعديش هكي ساكته
سادين:مخاطريش في شي 😢
جو نسيبه وجنان قعدو معاها يحاولو يغيرولها جوها
كل واحد ن خوتها يفكر فيها اختهم الصغيره انكسر قلبها وهما يتفرجو ومنو ولد عمهم اللي كانو واثقين فيه ثقه عمياء
"عمركم ماتقولو انسان مستحيل يخيب ثقتي مافيش شي مستحيل في الحياة، اللي قلنا مستحيل يخون خان،واللي قلنا مايكذبش كذب،واللي مايخونش الثقه خانها،واللي ظنينا انه سند هه طلع الكسرة ، جهزو قلوبكم للصدمه ديما باش ماتأثرش عليكم لانها جايه جايه"
هاتفه يرن ويعاود
نور:رد خيرك
عبدو:مانيش
نور:مني!
عبدو:نهال
نور:رد وريحها
عبدو:فوتي اصلا بنغير ارقامي
نور خدت الهاتف وفتحت الخط:الو
بلقيس تبكي:ماما
نور:بلقيس وين ان
نهال تضحك:ماعلمتيش بنتك ماتفتحش الباب لحد غريب وماتطلعش معاه
نور:انتي ياحقيره
نهال:عيب الغلط فرختك من بكري تبكي ياروحي
عبدو خدي الهاتف:وين البنت
نهال:في الحفظ والصون طلق امها نردلك بنوتك الحلوه عافكرة تشبهلك هلبا وخاصه عيونها
عبدو:لو نوصل فيك اعرفي نهايتك على ايدي وغلطي يوم فكرتي تمسي شعره من راس صغاري
نهال:في انتظارك حبيبي
نور منهارة:نبي بنتي عبدو بالله عليك رجعهالي قبل ديرلها حاجه 😭انا قتلك خايفه عليهم ماصدقتهاش شوف توا خدت البنت من الحوش 💔
عبدو:حانردها وعد
نور:نبي بنتي 😢😢
عبدو:اني طالع مش حانروح الا وبلقيس معاي ماتفتحيش الحوش لحد
___________________________________
نورهان:حبيبي
حسان:عيونه
نورهان:جيب نسومه بعدين بهي
حسان:خليها تلعب ارتاحي انتي
نورهان:استاحشتها ☹️
حسان:بهي المغرب تو نمشي نروح بيها ارقدي توا
كيف خداها النوم رن هاتفه
حسان:ايوا
عبدو:تجيني نبيك ضروري
حسان بعد على نورهان:شن فيه
عبدو:اللي كنت واخدها قبل خطفت بلقيس وتهدد فيا
حسان:وين انت
عبدو:قدام الجامع اللي جنبكم
حسان:اني جاي
"نسيت نقلكم حسان شرطي "
نورهان فاقت:وين ماشي
حسان:عندي شغل ضروري حبيبتي
نورهان:رد بالك على روحك
حسان:حاضر تو نمر نجيبها نسيم معاي
نورهان:اوك
رب سيارته ومشاله:اتصلت بيك
عبدو:ايه
حسان:خلي سيارتك وتعالا معاي
عبدو:نمشو لحوشهم
حسان:للمركز قبل نشوفو الموقع متع المكالمه وتفتح فيها محضر
عبدو:داير تسجيل مكالمات اني
حسان:ممتاز شن نور
عبدو:هيا اللي ردت عليها خليتها بتهبل
حسان:خير ان شالله نروحو بيها معانا
عبدو:يارب ☹️
نسيبه:نستاذنكم بنات بنمشي نشوف ماما
سادين:حتا انا ليا ايام مامشيتلها
نسيبه:خليك
سادين:لا بنمشي معاك ولوسمحتو معاد تتعاملو معاي هكا
اريام:بهي غيري
صقر:هيااا
نسيبه:استنا دوسه بتجي معانا
صقر:تلقوني في السياره مالا
الساعه 8:00مساءا
نور بتموت من الخوف وعبدو مايردش عليها معادش عرفت شن دير حاضنه ولدها وتبكي لين انفتح الباب
بلقيس:مامي
نور مشت تجري قامتها:حبيبتي ياروح ماما ياقلبي 😭😍
بلقيس:استاحستك ماما
نور:وانا ياروحي انتي كويسه يوجع فيك شي
بلقيس:لالا مشيت مع بنيه صاحبتك خدتلي حلوى وشكلاته وبعدين جو بابا وعمو حسان
نور:ياعمري 😢
عبدو:خلاص ماتخوفيهاش بري بابا العبي جنب خوك
بلقيس:به
نور:وين لقيتوها
عبدو:في حوشهم زي ماقتلك واخدتلها العاب وحلوى كانت بس تبي تخوفنا
نور:كله بسبب اغلاطك وتهوراتك لامتا بنقعدو عايشين في الرعب هدا
عبدو:فتحنا محضر وحسان حايديرلكم حراسه
نور:انا معاش مطمنه نطلع برا من حوشي زرعت فيا خوف
عبدو:انا اسف
نور:خليني في حالي
عبدو 💔
بعد خمسه شهور 🌸
في المستشفى
ياسر:قعمزي ياامي ماتعبيش روحك
صالحه:ربي ينوضكم بالسلامه يابنياتي 🤲
كوثر:يارب
اما داخل غرفه العمليات كانت نادين تولد في توأمها بالعمليه
طلعت الدكتورة:مني راجل نورهان
حسان:نعم
دكتورة:الف مبروك المدام جابت وليد
عارفين شعور الايه "وَاْصْبِرْ لٌحُكْمِ رَبِّكَ فَإِنَّكَ بٌأَعْيُنِنَا" قداش صبرت نورهان وتحملت كلام عزوزتها واهاناتها ليها يوم ربي راد انها تحمل وتجيب ولد انصفها وفرج عليها ،ورزقها 💜
معتز:خيرهم عطلو الزح
سالمه:اصبر ياوليدي وادعيلها
معتز:دمي انحرق اوووف
سالمه:وعلاش طلبتو عمليه
معتز:ندو ماتتحملش تجيب طبيعي نبيهاش تقعد تتعذب
سالمه:🙄هبال مالا اصبر واسكت
معتز:يارب
بعد ساعه طلعت من العمليه
صالحه:مبروك يتربو في عزكم
معتز:الله يبارك فيك لوسمحتي وين مرتي
ممرضه:مدامتك مزال مافاقتش من البنج
معتز:نبي نشوفها
ممرضه:تلقاها في غرفه 100
مشا يجري
سالمه:مايتحمل فيها حتا دقه الشوكه
صالحه:ربي يخليهم لبعض ولصغارهم
نورهان:بجديات
حسان:ايه ياروحي جبتي ولد
نورهان:الحمد لله ربي جبر بخاطري طول فتره حملي ندعي يكون ولد
حسان:شن بتسميه
نورهان:محمد
حسان:يتربا في عزنا 😘
خشت نسيم:ماما
نورهان:نعم حبيبتي
نسيم:خالو يبيش يرفعني نشوفو بيبي ره 😥
حسان:تعالي انا نرفعها بنتي
نورهان:جيبهولي
حسان:بهي تو نشوف حد يجيبه
معتز:امتا تفيق
صالحه:ياولدي خيرك تنق تو تنوض
معتز:خلي نادي الدكتور يشوفها
صالحه:براحتك
بدت تفتح في عيونها:اممم ماما
صالحه:نعم بنيتي الحمد لله عاسلامتك
نادين:ااخ راسي
صالحه:معليشي شويه وترتاحي
معتز:غزالتي عاسلامتك ياروحي
صالحه 🙄
معتز:تحسي في حاجه نادي الدكتور
نادين:نبي نشوفهم
معتز:ارتاحي انتي قبل بعدين تو يجيبوهم
رجعت رقدت
معتز:ياروحي تعبت بكل
صالحه:لاتعبت لاشي هيا جايبه بالعمليه غير انت مدلعها لين خلاص
معتز:حقها
سالمه:بهي برا جيبلنا ماناكلو وجيب حاجه للدكتور والممرضات
معتز:حاضر ردو بالك منها بالله وكانت فاقت ثاني اتصلو بيا
صالحه:ربي يهدي
نسيبه:حبيبي
صقر:عيونه تعالي قعمزي
نسيبه:خواتي جابو نبي نمشيلهم
صقر:عمري كلميهم حتا بالهاتف دكتورة مانعه عليك الحركه
نسيبه:نبي نشوفهم مليت من الحبسه في الحوش بالله عليك خليني نمشي
صقر:خايف عليك مانبيش تضطري للولاده المبكرة
نسيبه:اللي كاتبه ربي بيصير شن ترفعني
صقر:انا عندي عمليه شويه تانيه
نسيبه:بهي نقول لرامي والنبي كان تحبني
صقر:بهي وامي تمشي معاك
نسيبه:اوك
صقر:ماتخلينيش مشغول ردي بالك على روحك
نسيبه:حاضر
غيرت وطلعت
خوله:شن حالك اليوم
نسيبه:الحمد لله عميمه
خوله:اركبي
طلع رامي طايرتله
خوله:ربي يهدي 😒
رامي:يما وراسك ريحيني من تلقيحك هدا
خوله:وين كنت ليك ايام بايت برا
رامي:جهنم
خوله:حيوان تكلم كويس
رامي:يرضيك يانوسه نقلهم بنخطب ويقولو لا
نسيبه:علاش
رامي:قالو لا مزال صغير
نسيبه:من تبي انت
رامي:جيهان
نسيبه:ماشالله عليها
خوله:اه مالا من لسانها
نسيبه:لكن والله طيوبه غير صغيره بس تكبر وتتعدل
رامي:الله ينور عليك
خوله:يصير خير بعدين نقول لبوك
رامي:عندك علم الكلب هداكا بيروح غدوة
خوله:فكنا من المشاكل
رامي:تي وربي لما نشرب من دمه انا من الاول مش راضي عليها زواجه بنتك منه
خوله:مالا والله تمسه معاد ولدي ولا نعرفك
تعصب رامي بدي يخبط عالدومان:عاجبك بنتك ليل نهار تبكي عليه لاتاكل لاتشرب زي الناس
خوله:مادخلكش الهى بداك
رامي:تو تشوفيني كيف نلهى بيه
نسيبه توترت وبدت تحس بمغص لكن مابتش تتكلم
خلال العركه تقص عليهم سيارة للأسف رامي ماقدرش يتحكم ودارو حادث 😓😖
محمد مقعمز يقرا في ورق
جنان:حبي
محمد:شويه نكمل اللي في ايدي ونلها بيك
جنان:لا بنقولك توا
محمد:روحي والله مافاضي خليني مركز في لقضيه
جنان:شغلك اهم مني
محمد حدف الورق:ادوي هي 😡والاحسن ماتفوتيش عشره دقايق
جنان:🥺 اطمن مش فايته حتا خمسه ثواني الحق فيا بنفاجئك انا حامل عموما
محمد:شنو 😳
جنان:برا ملح انا بنمشي لسادين
محمد:غير تعالي جاي
دفاته وطلعت:تكلمنيش ارجع لخدمتك
محمد:الله اكبر واخيرا شدت 😍
جنان:اهبل 😂
محمد:تعالي ليك مني احلا هديه عالخبر الحلو هدا
جنان:بعدين
صقر يجهز في روحه للعمليه رن هاتفه:ايوا
رامي:وين انت
صقر:كيف بنخش عمليات نسيبه فيها حاجه
رامي:شن بنقولك
صقر:ادوي 😡
رامي:درنا حادث وهيا بيدخلوها عمليه مستعجله
صقر:لاحول ولا قوة الا بالله وين انت جايك
غير وطلع يجري طريق كلها يدعي تكون بخير ومايخسرش البيبي
صالحه:بسم الله
سالمه:خيرك ياوخيتي
صالحه:حسيت نخصه في قلبي
نادين:خيرك ماما
صالحه:شي بنيتي ارتاحي
نادين:نوسه قالت بتجي خيرها عطلت
صالحه:تو نتصل بيها
وصل صقر سأل على مكانها ومشالها
رامي:صقر ا
اشرله بايده انه يسكت فاته وخش للغرفه لقاها تبكي:اميرتي
نسيبه:قلهم نبيش عمليه بالله عليك
صقر:شن وضعها
دكتورة:لازم عمليه باسرع وقت نبض العيل بدي يضعف
صقر:حبيبي تحملي عاخاطرنا
نسيبه:ااه بطني ياصقر بنموت
حضنها يحاول يهديها:ادعي ياروحي ربي يفرج عليك وتطلعيلي بالسلامه
نسيبه:مانبيش عمليه 😭
صقر:لازم حبيبتي مانقدروش نولدوك طبيعي
بعد وقت اقتنعت ودخلوها
خوله:شن صار
صقر:انتي كويسه
خوله:الحمد لله هيا رعشت والضربه زادتها شن قالت الدكتورة
صقر:دخلوها ولادة
خوله:ربي معاها مشكله خواتها يستنو فيها
صقر:كلميهم
قعد يدور في الممر راسه بيتفجر يحس في الوقت طول
سادين:حي
خوله:كلمي بوك وتعالو
سادين:تمام هي
جنان:خيرهم
سادين:دارو حادث ونسيبه دخلوها ولاده
جنان:الله
سادين:نكلم بابا
جنان:بنمشي معاكم
بعد وقت جابت نسيبه بنوته وهيا تعبت هلبا خلوها في العناية
صقر واقف يتفرج على بنته في الحضانه:شوفي محلاها كيف هاديه
سادين:تتربا في عزكم
صقر:عسل 😍
سادين:غير راك تقولها قدام نوسه تقتلك
صقر:ههه
سادين:شن بتسموها
صقر:كيان 💜
سادين:ربي يحفظها
صقر:بنمشي نخشلها قعدا انتي
سادين:ايه
صالحه:ياودي هني روحك
نورهان:خلوني نمشي نشوفها
صالحه:قلت لا لما تطلعي بعدين ساهل
نادين:وينهم 😥
معتز:اهو جابتهم
نادين:حليلي محلاهم 😍😍شوف حبيبي
معتز:زي امهم 🤤
ممرضه:تعالا معاي لوسمحت توقع علي وراق
نادين فهمتها تعاكس فيه:ريحي روحك يامزيته واطلعي برا
ممرضه:عفوا
نادين:بري نادي حد محترم يتكلم معانا
طلعت الممرضه
معتز:خيرك
نادين:وقحه 😅
معتز:ركزيلي مع الحلوين هادو بس
نادين:شن نسموهم حبيبي
معتز:انتي اختاري
نادين:اممم وسيم ونيتي السمحه وتين
معتز:تم هي وكليهم جعانين ره ياماما
نادين:بهي خود واحد منهم
معتز:هاتيلي اميرتي الحلوة
نادين 🙄😒
معتز:احم بهي اعطيني وسيم هي
صالحه وصلت:طمني ياوليدي
صقر:الحمد لله هيا كويسه غير صايرلها هبوط بس باذن الله غدوة تطلع من العنايه
فاتت الليله هادية عالكل وفي صباح يوم جديد 🌸
سادين دور في الحوش:اي حطيت كل شي قلتيه شن مزال ثاني
خوله:مرو عالمحل جيبو حليب وعصير وقهوة
سادين:بهي مع السلامه رااامي
طلع من الدار:ها
سادين: طلع هادو نلبس جاكيتي ونجيك
سكرت دارها وطالعه لقاته ينزل في شناطيه من تاكسي
قام راسه جت عينه في عينها
سادين ابتسمت ومشت:صباحو عميمه
سعاد:صباحك مبروك يازينه
سادين:نوسه جابت امس
سعاد:بهي الحمد لله عاسلامتها
سادين:يسلمك
سعاد:توبعدين نجي نشوفها
سادين:تمام
خش معتصم:السلام عليكم
سعاد&سادين:وعليكم السلام
سادين:يلا نتلاقو ومشت
سعاد:خسرتها ياوليدي
معتصم:ياامي مانيش ناقص ارحميني
محمد:يامرحب
معتصم:اهلين
محمد:تفي على المفرخ اللي زيك
معتصم 🙂
محمد:ياويلك نلقاك فايت من جنبها
معتصم:مش درت اللي في دماغك شن مزال تبي تاني
محمد:نبكيك الدموع اللي بكتهم بنتي
معتصم:تي بهي بهي
"اللي صار انه محمد رفع قضيه على معتصم وطبعا بذكائه قدر يطلقهم من اول جلسه غيابي"
رامي:شنو
سادين:ولا شي
رامي:بترجعيله!
سادين:لا وانت فوته خليك متجاهله هكي
رامي:ربي يصبرني وخلاص
كوثر:لو سمحت بعد بنلبس ايلان البنت صقعانه
ياسر:اسمعيني بهي
كوثر:مانبيش نسمع شي
ياسر:ارجوك
كوثر:لا
ياسر:ليش مصره تنهينا
كوثر:نتحمل كل شي الا الاهانة بالطريقه هدي
ياسر:اسف
كوثر:اسفك ما يغير شي طلعت وسيباته
"كوثر من لما طلعت صالحه من العياده قعدا معاها بعدت على ياسر ومعادش تتعامل معاه طبعا هدا قرار مفتاح ونادين حاول يراضيها ميه مره بس رفضت وبوه ديما واقف في وجهه، ندم يتأسف كل يوم بس الدرس لازم يكون قاسي حتا ماتتكرر الغلطه"
طلعو نسيبه من العنايه بعد تحسنت مرت فتره وقررو يديرو اسبوع الخوات مع بعض
نادين:اعطي لوسيم مرضعته لحد مانكمل هدي
معتز:تو نعطي ل
نادين:ماتقربهاش وتين اهو قتلك
معتز:اففف هدي كلها غيره
نادين:🙂ايه قتليش شن رايك في قفطاني
معتز:جميل زي صاحبته
نادين:نحبك 😘
معتز:نموت فيكم
نسيبه:😭😭😭
صقر:خيرنا
نشيبه:فهمتش خيرها تبكي وكلتها وغيرتلها مزال تعيط
صقر:به علاش تبكي انتي
نسيبه:مه هيا مضايقه
صقر قامها:اسسس حبيبت بابا خيرها دايره الدوشه
سكتت
نسيبه:حي معناها كانت تبيك
صقر:مستاحشتني خلاص تو نشدها بري وتي روحك
اريام:تعالي ديريلي شعري الله يهديك والله ماقادرة نتحرك
سادين:اففف تزوجو واحملو وانا نقعدلكم خدامه
اريام:مردودلك كله
سادين:عااساس لما نتزوج بتسيبي صغارك وراجلك وتجيني
اريام:في الفرح ان شالله 😂
دارو اسبوع كبير في الصاله 🌸
نورهان مبسوطه بولدها معادش اهتمت لكلام عزوزتها وعايشه سعيده مع عيلتها
نادين اللي مش عاجبها العجب وتعلق عاكل شي معتز مدلعها واللي تطلبه يكون عندها اسست مملكتها الخاصه مع راجلها وصغارها اللي ماحد يتجرأيقربها
اما نسيبه طول الوقت شاده بنتها وخايفتها تبكي لانها بتبدا تبكي معاها 😂صقر مش موجود يسكتهم
وفي نهاية الحفله كل وحدا تصورت مع عيلتها صور وبعدين خدو صورة جماعيه كاتذكار للحظات الجميله........
lole:تعالو نهدرزلكم ليش كتبت الروايه هدي وشن المقصد من كل ثنائي
روايتي كنت نبي نحكي فيها على حياه العيله في مجتمعنا الليبي من مشاكل وخلافات وسعادة وحزن
انا ماتعمقتش في كبار العيله بس لو ركزتو كنت نوصل في معلومه انه #الام و #الاب ديما مايكونو السند والظهر لصغارهم هما الدعم والحضن الحنين والكلمه الطيبه
زي خوله وصالحه وسعاد
نورالدين ومفتاح ومسعود 💜
صقر&نسيبه الثنائي لجميل كلكم حبيتوهم حتا انا حبيت نوصل بيه فكره البنوتات اللي عايشين في عالم الاحلام الورديه ممكن يتحقق مافيش مستحيل على ربي زي ماحلمت نسيبه من لما كانت صغيره ربي حققلها امنيتها براجل احتواها عطاها حب من كل قلبه عاملها كأنها بنته مش مرته وسعى انه يعطيها اكثر واكثر "ربي يرزق كل بنيه ببطل كيف صقر"
أريام&احمد البنت اللي انخذلت في الحب الاول واللي عاشت سنين مقتنعه بفشل الحب وسكرت قلبها ربي كان مخبيها للأفضل وللأحسن بعتلها شخص كان بحاجتها وقفت معاه وساعدته خدو نصيبهم من السعادة والعوض 💜
نور&عبدو الزواج التقليدي اللي اغلب الناس تخاف منه وماتحباش رهو مش بشع لا لما ينبنى على احترام من الاول رح ينجح عبدو غلط بس صلح غلطه لانه حب نور من قلبه 💜
نورهان&حسان المعاناه والظروف الصعبه ماتخليكش تتخلى على شريك حياتك او تتخاذل لا بالعكس لما تتمسك بيه وتشد على ايده ربي حايفرج عليكم وحبكم يقوا اكثر واكيد ماننسوش العوض 💜
نادين&معتز ويامحلاهم 😍😍 من حب معتز مثال للراجل اللي يحب الحلال مالعبش بنادين ولا فكر فيها غلط لا اول ماشافها خطبها وتزوجها دللها ودلعها كونو مملكه خاصه بيهم وعايشين مرتاحين 💜
كوثر&ياسر هالثنائي يحكو عالراجل اللي اوهم حبيبته ايام العلاقه انه مثالي جداواكتشفت بعد الزواج انه ليه جانب مظلم صعب يسمحلها تستمر معاه ممكن يجي اليوم اللي تسامحه فيه وترجعله ..💜
محمد&جنان الشخص اللي عمره مااقتنع بالحب ولا صدق وجوده ولهذا تجربته في الزواج كانت فاشله جدا ↙️وبعد وقت ربي خلاه يشوفه ويعيشه بكل مشاعره عوضه وعوض قلبه عاكل يوم غلط عاشه مع عايشه عوضه بجنان اللي صانت قلبه وكانت ليه الجنه عالارض 💜
رامي اللي عاش في محاوله يقنع اهله انه كبير وعاقل رغم صغر سنه تحطم قلبه بسبب حب مش خير ليه ولا نصيبه بس اكيد ربي حايعوضه وبعتله جيهان بطول لسانه وضحكتها الحلوة حتا تمسح اي علامه حزن شافها في حياته بعد وقت طويييل اقتنعت خوله تخطبهاله والعرس بعد تكمل الثانوي 💜
فؤاد&مرام الثنائي اللي كان زواجهم مظاهر وشكليات مع مرور الوقت اكتشفو انه غلطو يوم خدو هالقرار واجهو مشاكل كبيرة بسبب تهورهم وطيشهم بس يوم قررو يصلحو غلطهم ربي زرع في قلب كل واحد منهم حب كبير للثاني عاشو حياة هاديه ومرتاحه بعيد عالكل 💜
سادين&معتصم اااه قداش وجعني قلبي عليها ماكنتش حابه نكتبلها نهاية حزينه بس نبيكم تقتنعو انه مش اي حد حب حد يعني هوا نصيبه لا صح النصيب كلمة كبيرة كسرت هلبا قلوب بس هيا واقع النصيب من عند ربي وسادين ماكانت نصيب معتصم صبرو سنين حبوا بعض في لخفاء وبعد وصلو بعضهم افترقو هوا ندم حاول مرات انه يرجعلها بس صداته بكل قوة ومحمد وقف ضده اما هيا عاهدت قلبها تنساه ودعت ربي في كل وقت انه يمسح حبه من قلبها وقدرت فعلا وهبت حياتها لقرايتها وعيلتها وكلها ثقه انه ربي حايعوضها 💜
في يوم كانو صقر ونسيبه طالعين لمنتزه مع بنتهم
نسيبه:الله غزل البنات 😍
صقر:تو نجيبلك
وقف يستنا في الدور لين سمع بحد ينادي فيه تلفت
عايشه:كيفك
صقر:اهلا
عايشه:متغير هلبا ماعمري شفتك مبسوط بالشكل هدا حتا معاي
صقر ابتسم:تعرفي شكرا بجديات لولا انك سيبتيني وقتها ماكنت سافرت ماكنتش اصريت اني نكون حاجه كبيرة ماكانت امي جبرتني نتزوج نسيبه ماكنت لقيت الحب ولا كانت عندي عيله جميله توا 💜 #شكرا_لخذلانكِ
✨حتا ربي قال "وَعَسَى أَنْ تَكْرَهُواْ شَيْئاً وَ هُوَا خَيْرُُ لَكُمُ " أحيانا الشي يبكينا ويزعلنا فتره بس بعده يصير الافضل وقتها حانقولو الحمد لله انه ربي عطانا احسن بهلبا من اللي تمنيناه وحانعرفو انه كسرة القلب وقتها كانت باش تخلق منا انسان قوي
✨خلو نيتكم صافيه تجاه الكل حتا لو جرحوكم وعمركم ماتفكرو تردو الاساءة باساءة زيها لا ربي فوق الكل والدنيا دور حاتشوفو اللي ظلمكم في نفس الموقف ونفس الشعور
✨اوثقو في عوض ربي لقلوبكم 💜
the end
ان شالله تكون عجبتكم وماتكونش نهاية زعلت حد مني
فترة وجايتكم برواية جديدة وهالمره حاتكون رواية حقيقية 🤭 تفاعلكم معاي بس
lole saad.
