part24
رواية #شكرا_لخذلانكِ
"مقتبسه"
ماقبل الاخيرة
_____________________
صقر:شن هدا
نسيبه:ماما وخشت للحوش يجرو شافت امها طايحه وخواتها يعيطو
صقر:لاحول ولاقوة الا بالله
ياسر:حولو خلي نقيمها
نسيبه:ماما ماتت 😭 وطاحت اغمى عليها
طلعو بيهم للمستشفى دخلوهم للطوارئ
نادين:ياربي ماتوجع قلبي بأمي 😭
كوثر:اهدو بالله عليكم عمتي مش حايصيرلها شي قعمزو
نور:اسمعو الكلام
نادين:اختك شن صار فيها
نور:مش عارفه راجلها معاها
طلع الدكتور:وين ولدها
ياسر:نعم
دكتور:المريضه زادت تعبت ولازم تخش العمليه بأسرع وقت
ياسر:امتا يعني
دكتور:لو دفعت المبلغ كامل ووفرتو دم ندخلوها بكرا
نادين:همكم في الفلوس بس رح ندفعولك ماتخافش بس دخلها العمليه
ياسر:اسكتي،قداش المبلغ
دكتور:10الاف مبدئيا
ياسر:بس ماعنديش المبلغ هدا كاش توا تستنا لغدوة الصبح نسحب
دكتور:تمام بعد تدفع ندخلوها
نادين:قلنالك بندفعو دخلوها توا حرام عليكم قعدا تموت قدامكم
دكتور:مش بايدي يامدام فيه ناس قبلها ودفعو
نادين:حسبي الله فيك
ياسر:شن بنديرو
نادين مشت بعيد واتصلت:حبيبي
معتز:هاياروحي خيرك
نادين:ماما تعبانه هلبا ولازم عمليه في اسرع وقت
معتز:بهي رفعتوها
نادين:مايبوش يدخلوها عاخاطر الفلوس وياسر ماعنداش المبلغ كامل
معتز:تمام شويه وجايكم شديلي تركينه بالله ماتقعديش دوري
نادين:به باي
جي صقر:شن صار
ياسر:يبو 10الاف باش يدخلوها
صقر:قداش عندك انت
ياسر:6
صقر:انا بنمشي نشوف المدير محلوله باذن الله
ياسر:نوسه خيرها
صقر:ضغطها نزل شويه وتفيق
نزل لمكتب مدير العيادة
صقر:السلام عليكم دكتور
علي:اوووه مرحبتين بطالبنا
صقر:كيف الحال
علي:بخير والله وين وين زمان ماشفناك امتا روحت
صقر:ليا شهور في البلاد
علي:وماتجيش تاخد مكانك
صقر:روحت طول لقيت امي حاجزتلي عروس تزوجت وخديت فتره نقاهة
علي:الف مبروك
صقر:جايك في طلب
علي:ادلل
صقر:نسيبتي تعبانه لازمها عمليه قلب جبناها بكري والدكتور رفض يدخلها لين يندفع المبلغ كامل واحنا ماعندناش كاش توا
علي:تخش في اسرع وقت باذن الله وانتم خودو راحتكم في الدفع عادي
صقر:الصبح بس نسحب ونجيبهم
علي:تمام توا نمشي نشوفهم يدخلوها وان شالله تطلع بالسلامه
صقر:بارك الله فيك
علي:ولو واجبنا لكن بتجي تخدم معاي
صقر:ان شالله
نسيبه فتحت عيونها تشوف للدار واول مااذكرت:ماما 😢
نور:حبيبتي فقتي
نسيبه:شن صار
نور:اشش ارتاحي ضغطك نازل دكتور قال لازمك راحه كامله عاخاطر البيبي
نسيبه:امي
نور:بيدخلوها للعمليه
نسيبه:يارب ماتحرمني منها
وصل معتز،مفتاح،عبدو وحسان
صقر:بتخش توا وانا بنحضر معاهم العمليه
ياسر:بارك الله فيك
معتز:كلمت خوي الصبح يسحب الفلوس ويجيبهم
مفتاح:ربي يحفظكم
صقر:نستاذن انا
غير لبسه وخشلها بنتي
نسيبه:صقري قلهم يخلوني نطلع
صقر:شن ضغطها
ممرضه:تمام دكتور
صقر:بهي نحيلها الكانيولا حبيبي انا بنخش العمليه ردي بالك عاروحك اوك
نسيبه:ردلي امي 😢
صقر:ان شالله امك توا محتاجه دعائك بس
نسيبه:به
صقر:ردي بالك منها
نور:حاضر
دخلو صالحه غرفه العمليات
نادين:راسي يابنات
نور:خيرك دايخه
نادين:نحس فيه ثقيل
جاها معتز:خيرك
نادين:راسي
معتز:تعالي نطلع ترتاحي شويه
نادين:لالا بنقعد هنا
معتز:شويه ونجو
نادين:به
معتز:تبو حاجه
نور:لالا صحيت
____________________________________
فاتت باقي الليله صعبه وطويله عالكل
صباحا الساعه 8
طلع صقر
تجمعو الكل حوليه
نادين:شن صار
نسيبه:ماما كويسه ولا
ياسر:طمنا الله يطمنك
مفتاح:بالشويه عليه خلوه ياخد نفسه
صقر:العمليه مزالت بس بنرتاحو شويه هيا تحت التخذير بيرجعو بعد ربع ساعه
مفتاح:ارتاح ياولدي طول الليل معاهم
صقر:ان شالله
نادين نخصتها:بري مع راجلك نقعد نقري فيك
نسيبه:افف ولحقاته
صقر خش لمكتب صاحبه قعمز عالكرسي:ااخ
نسيبه:تعبان
صقر:تعالي
قربت منه:شكرا لانك جنبي ديما
صقر:في كل وقت ياروحي
lole:تعالو نهدرزلكم في موضوع
"#الاهتمام عارفين شن معنى المصطلح هدا ولا حتا قيمته في قلوب الناس،عافكرة الاهتمام اعلى منزله واحلى بهلبا من #لحب لما يكون عندكم شخص في حياتكم يهتم لأدق تفاصيلكم حتا الاشياء اللي مش مركزين عليها،وقت حزنك يحس بيك يفهمك من مجرد حروف حتا لو كتابة،يفهم صوتك واللي مضايقك،يحس بيك في عز مرضك،ويتوجع اكثر منك،اما في فرحتك تلقاه مبسوط اكثر منك بس لانك فرحان،يحب اللي تحبه ويكره اللي تكرهه،مستعد يسمعك لو تحكي اسابيع،ماينساش كلام قلته في يوم حتا لو فاتو عليه سنين،بمجرد تناديه يكون حاضر حتا لو عنده الف شغله،وديما ديما مستثنيك عالكل لو مهما كثرو حواليه الاصحاب والاحباب.
هدا الاهتمام يخليك تتعلق بالشخص ايا كان مش شرط حبيب،ممكن صديق وممكن اخ.
ولما ينعدم الاهتمام ويحضر الاهمال تنجبر انك تمشي بدون ماتلتفت ابدا لانه حتا لو تحب الشخص وروحك فيه وقت يغيب اهتمامه يصبح حضورك وغيابك واحد.
نصيحه:ركزو عالاهتمام،اهتموا بالناس اللي تحبوهم،وديما اختارو اللي يهتم مش اللي يكثر الكلام والغزل وكلمة"نحبك"
اختارو اللي ماتهونوش على قلبه حتا في الزعل يهتم.
نرجعو للروايه
واقفه وراه ديرله في مساج:شن رايك ترقد شويه
صقر:لالا
نسيبه:ارتاح بهي
صقر:بناكل ونرجع معاهم
نسيبه:به براحتك
صقر:كليتي انتي
نسيبه:هئ
صقر:قعمزي نطلب فطور ونجي
نسيبه:حبيبي جيبلي بريوش خاطري فيه
صقر:حاضر شن تاني
نسيبه:بس
معتز:تحركي فكينا من تسكير راسك
نادين:نلا نبيش
معتز:استغفر الله العظيم مافيش داعي نفصل قدام الناس امشي غيري وارجعي
نورهان:اسمعي الكلام
نادين:قلت لا
معتز:شوفي وجهك كيف اصفر هيا وراس حبيبي
نادين:عارفاتك ترفعني للحوش معاش حاتردني
معتز:نردك والله
نادين:وعد
نورهان 🙄:صبرك
معتز ضحك:هيا
نادين شدت في يده:ربع ساعه رهو
معتز:حاضر
نادين فنصت:زي ماوصيتك
كوثر:بهي 😅
طلعت نادين لحوشها،نسيبه تفطر مع صقر ، نورهان ونور كل وحده مع راجلها
ياسر قعمز جنبها:كيف حالك
كرثر:لحمد لله
ياسر:عارف انك مضايقه مني بس
كوثر:لوسمحت مش وقته الكلام هدا احنا نبو نطمنو على عمتي توا وبعدها يصير كلام
ياسر:شن قصدك
كوثر:يوم خديتني من حوش اهلي مش للضرب
ياسر:حبيبتي والله ا
كوثر:تبي بنتك تو نخليها اما اني معاش ليا مكان معاك
ياسر:نعم
كوثر:زي ماسمعت مشت وخلاته
ياسر:تسيبني!!
جت نسيبه:هاكم افطرو
نورهان:وين مشيتي
نسيبه:قعدت مع صقر يرتاح
نورهان:ماقال شي علي ماما
نسيبه:لتوا عمليتها ماشيه تمام
نورهان:يارب طلعها بالسلامه 🤲
صقر:شويه تانيه بيجي رامي جايب باقي الفلوس خودهم منه اكد عليهم وادفع
ياسر:تمام باذن الله واول مانسحب نردلك
صقر:مش بيناتنا ياراجل أمي حتا اني
ممرضه:دكتور رجعو للعملية
صقر:تمام جاي هي نستاذنكم
نادين:بندوش ونرجعو
معتز:نديرلك حاجه تاكليها
نادين:نبيش
معتز:باب الحوش تشوفي فيه مش حاتطلعي منه الا وانتي معبيتها بطنك بري هي
نادين:صبرني يارب
دوشت وكلت زي الفالحه
نادين:هي نمشو
معتز:لحظه نستنا في محمود جايبلي الفلوس
نادين:ننزلو نستنوه عند عميمه باش نطلعو طول
معتز:باه انزلي و بالشويه في الدروج
نادين:اوك
خوله:ياودي هيا
نورالدين:تي بهي خلي نحسو النعمه
خوله:المرا تحت العمليه من امس ومزال بتاكل انت ارفعني لبنيتي
نورالدين:توكلنا عالله
___________________________________
عند اريام في العياده مقعمزة تستنا في احمد اللي خش للدكتور يكشف عليه تهز في رجلها وتدعي
طلع احمد
اريام:هاشن صار
احمد:نستنو نتيجه التحليل لكن قالي متحسن مدام الصداع بدي يخف
اريام:ربي يبشرنا 🤲
جيهان:بابا وصل انا ماشيه
جنان:فطرتي
جيهان:ايه وخديت الفلوس سلم نسيبنا
جنان:عليك فرخه بتجي بعدين
جيهان:ايه ماما قعدا عند خوالي
جنان:تمام
لبست سبيدروها وطلعت تغني وتاكل في حلوة
صفر من وراها:شن هالصباح الحلو الرايق
جيهان:صباح الورد
رامي:صباح الفل والياسمين على الحلوات 🤤
جيهان:ره كان بتغازلتي هك مره تانيه بنحبك
رامي:مافيش اي مانع 😉
جيهان:ونحرش فيك عمك ونقوله يزوجك ليا
ضحك بصوت عالي:اياه
جيهان:يس
رامي:به اعطيني حلوة
جيهان:تفضل
رامي:مش متحجبه انتي
جيهان:لالا
رامي:شن بنقولك توا ركزي في دروسك بهي
جيهان:اوك باي وطلعت تجري ركبت مع بوها
رامي:خيرنا عيله كامله بنطيحو في فرخات 🤦♂️ان شالله خير وخلاص
معتصم:صباحو غزالي
سادين:حبيبي 😢
معتصم:خيرها بنيتي من مزعلهالي
سادين:ام نوسه مريضه ودير في عمليه عالقلب
معتصم:ربي يشفيها
سادين:نبي نمشي انا ماما مشت عليا
معتصم:مافيش داعي لما تروح امشيلها
سادين:بجدياتك انت رهو صاحبتي ومرت خويا
معتصم:تي اكيد زحمه غادي تمشي يقعدو يكحلو فيك فكينا ترا
سادين:مايهمنيش حد انا بنمشي نوقف جنب صاحبتي وخواتها
معتصم:مافيش مشي سكريه الموضوع
سادين:اسمع اني بالسيف ماما فهمتني اني لازم نطلع باذنك لانه راجلي فامتكرهنيش فيك وتعالا ارفعني
معتصم:شن معناه الدوة هدي
سادين:معناها الصح صح والغلط غلط يا ولد عمي نبي نمشي لصاحبتي
معتصم:اوووف اهو ندوش ونجيك لكن تلبسي عبايه
سادين:به
معتصم:سوده
سادين:بهي فهمنا
معتصم:دقايق ونجي
سادين:سلملي مولى بيتي 😅
معتصم:بري يافرخه
رجعو اجتمعو كل ابطالنا في ممر العياده منتظرين خبر يا يفرحهم او بيحطمهم
فاتت ساعه ورا ساعه لين وصل الوقت 18ساعه لصالحه في العملية
انفتح الباب طلع صقر والدكتور المسؤول علي حالتها
نسيبه:يارب 🤲😢
مفتاح:طمنا
دكتور:الحمد لله عمليتها نجحت الحاجه متمسكة بالحياه وقف القلب مرتين بس انعشناها وتوا وضعها مستقر حاتقعد في العناية اسبوع وطبعا عمليتها مش سهله يعني ليها مضاعفات ان شالله تكون بسيطه تفيق ونقرروا الحمد لله عاسلامتها
نسيبه:الحمد لله
تعالت الضحكات والفرحه ارتسمت عاوجوهم اتاري الكل يحب عمتكم صالحه 😁
قربت منه:نحبك
فهم الكلام الملخبط اللي تحاول توصلهوله وقداش هيا مبسوطة باس ايديها:نموت فيها بنوتي 😍
قطع عليهم اللحظه ياسر:كملنا المبلغ
صقر:تمام تعالا ندفعو ونحجزولها جناح
نور:مشيت شفتهم
عبدو:كلمت امي بكري قالت بلقيس تلعب والخميره راقد
نور:قلت تو يديرلها عياط مارضعتاش
عبدو:ماه مدلعتيه ماتحطيش فيه عالارض لحظه
نور:مزال صغير وليدي تو يكبر ونزله
عبدو:ماشي 🙄مش مهتمه بيا نص اهتمامك بيه
نور:انت تغار منه شن بنديرلك
عبدو:تو نتفاهمو
خشت سادين للعيادة:اووف ماحد يرد عليا
معتصم:مه كان شديتي مكانك وريحتي روحك
سادين:🙄مش حانرد عليك
معتصم:بنسال المريضه صالحه وين نلقو غرفتها
رسيبشن:عملية قلب!
معتصم:ايه
رسيبشن:العنايه الفائقه في الدور الثالث نهاية الممر عاايدك اليمين
سادين:ياروحي على عميمه 😢
معتصم:اركبي بلا دراما
سادين:مابردك
خوله:الحمد لله ربي يزيدها من الشفا
نادين:امين يارب
خوله:برو ارتاحو يابنياتي من امس واقفين غير تعبو في روحكم اهو انا تو نقعد هنا
نورهان:لالا عادي
نور:من امس نحكي يحسابوها باهيه الوقفه هدي ماتوليش عليهم
سادين:نوسه وحضنتها
نسيبه:حبيبتي
سادين:الحمد لله عاسلامتها ربي يخليهالكم
نسيبه:امين من جابك
سادين:معتصم الدراه كيف حالك انتي وجهك اصفر ياحليلي مريضه 😣
نسيبه:لالا تمام
خوله:برو روحو ارتاحو وارجعو
صقر:شني
نسيبه:شي
صقر:نروح بيك
سادين:ايه شوفها مرهقه عالاقل ترقد شويه
نسيبه:لا
صقر:مش بكيفك خودي شنطتك وقدامي نرتاحو ونرجعو
نسيبه:بهي
خوله:هيا خودو نسونكم وروحو اني قعدا هنا
حسان:هيا
نورهان:لو صار شي كلميني عميمه
خوله:ان شالله مايصير الا كل خير بنيتي
طلعو روحو قعدت خوله،نور،كوثر وسادين
معتصم اشرلها ومشا بعيد
سادين:ها
معتصم:روحي حتا انتي علاش قعدا
سادين:والله 😒تبصر صح
معتصم:لا مرت خوك روحت والمرا اطمنتو عليها ماعندك علاش قعدا
سادين:اسمع هدي مش ام نسيبه بس امي حتا اني وتعنيلي هلبااا مش جايه مسايرة ولا تعاطف لا جايه هنا لانه واجبي ولاني نحبها
معتصم:مش وقته حبك ورانا شووق تجهيز
سادين:مش دايره العرس
معتصم:نعم
سادين:ايه مش حانديره وعميمه في العياده اكيد مانيش عديمة احساس
معتصم:بهي انا عديم احساس وبنطلع العرس
سادين:بطلعه بدون عروس 🙄
معتصم شد ايدها بقوة:فرخه ماتختبريش صبري احسن باش مانزعلكش
بعدت عليه:زعلتني وفات قراري مش حانتراجع عليه عرس مش دايره لين نطمنو عليها وتفاهم مع عمك
معتصم:متأكدة
سادين:ايه
معتصم:تمام ماتقعديش تبكي بعدين بس
سادين:سلام ومشت
صقر:تفضلي
نسيبه:اااخ نحس في روحي مرهقه بكل
صقر:من الاعصاب بس
نسيبه:ندوش ونطلع نديرلك تاكل
صقر:ساهل تو ناكلو اي شي
رن الجرس فتح
جنان:كيف الحال
صقر:بخير الحمد لله
جنان:شن صار مع عمتي صالحه
صقر:عمليتها نجحت الحمد لله
جنان:الحمد لله هدا غداكم قلت اكيد تروحو تعبانين
صقر:منورة كيف كنا نفكرو فيه
جنان:ولا يهمك صحتين
صقر:الله يسلمك
جنان:نوسه راقده
صقر:لالا دوش
جنان:به مالا تو نشوفها بعدين
حسان:امي مش وقتها الدوة هدي
امه:قداش ليها يوم بايته برا مخلياتك بروحك ماتلزمكش
حسان:تي امها مريضه تخليها وتروح
امه:دبر راسها هدي عند راجل
نورهان 😢
حسان:استغفر الله احنا تعبانين بنركبو نرتاحو
امه:بناخدلك الثانيه
حسان:هيا حبيبتي ساعدي روحك اركبي
نورهان:وين نسيم
حسان:رفعتها لعمتها بكري
نورهان:اه بهي
حسان:ارتاحي انتي نمشي نجيب غدي ونجي
حدف المزهريه بقوة عالحيط:كل مانقول بناخدها تطلع حاجه تفسد عليا
رامي مقعمز وراه:اصلا وقاحه منك تقول بندير عرسي توا
معتصم:تعبت قداش ليا نستنا فيها
رامي:اصبر تاني وين المشكله مش اسوء من حب سنين تطلع تحب ولد عمك 😏
معتصم:خرف الزح
خشت سعاد:خيرك مكسر الحوش ياولد
معتصم: قتلي بناجل العرس
سعاد:طيح والله سعدك دير عرسك والمرا بين الحيا والموت ياكلب شن ماتحسش بعدين من بيوقف فيه صقر اللي ليل نهار في العياده ولا امها اللي مع صاحبتها و مرت خوها وين فكر بعقلك 😡
معتصم:نبيها بلا عرس انا
سعاد: فاضيه انا نكلم فيك اكلب وجنح عرس مافيش
رامي 😂:
فاتو ايام بدت صالحه تتحسن قعدا في العنايه الكل موجودين جنبها
بعد اياام
خوله:هيا يابنت
سادين من دارها:ياماما بهي ندور في وشاحي
خوله:انا طالعه الحقي
نزلت تجري:جيتك
كيف بيركبو السياره شافوه طالع معاه شنطه
سادين:شن هدا
مشتله وين
معتصم:اهلا بمرتي
سادين:وين ماشي
معتصم:مسافر
سادين:المعنى!
معتصم:مش اجلتي العرس وتصرفتي من راسك انا مسافر لين نرتاح تو نديره لما يخطرلي
سادين:بتسيبني
معتصم:لو كنت بنسيب ره مطلقك توا
سادين:هدا كله عاخاطر يومين شكليات
معتصم:الشكليات هادو ليا سنين نستنا فيهم من انتي قعدا ماتعرفي في الدنيا شي
سادين:انا مانديرش عرسي ونص اهلي ناقصين
معتصم:خلاص براحتك
نزلو دموعها:لو تمشي انا معاش نبيك
معتصم:زيدي اغلطي
سادين:بتتخلا عليا 😢
معتصم:انتي جبرتيني
تلفتت بتمشي:........
معتصم:...........يتبع
احمد طلع من الدكتور
اريام:هاشن التحليل طمني
احمد:.........يتبع
____________________________________
توقعاتكم للحلقه الاخيرة ✨
نسيبة&صقر
نادين&معتز
نور&عبدو
محمد&جنان
رامي&جيهان
اريام&احمد
معتصم&سادين
فؤاد&مرام
كوثر&ياسر
نورهان&حسان
من الثنائي اللي بتكون نهايتهم سعيدة!
ومن اللي بيكون نصيبهم الفراق!
ومن اللي بيختارو البعد وهما قلوبهم متعلقه ببعض!
استنوني في البارت الاخير
