كذبة حولتني لسفــاح[بالدارجة]

005

||كذبـة حولتني ل سفــاح||

الساعات كانو كيمشيو و وقت الغروب قرب...كان هو واقف في نفس الدرب لي سرقها فيه متكي  ظهرو مع الحيط و لي كيدوز كيلقي عليه السلام ب وقار . مرة مرة كيجبد شي كارو يكميه باش يحيد القنطة لي شداه ... لولا المشكل لي وقع ليه كان هيكون دابا خوا هاد بلاصة و شد موطورو يديماري لشي بلاصة تريحو و تخوي بالو من وجوه هاد الحومة لي حفظهم . ولكن الشك ربطو و خاف يجيو البوليس يهزوه و مايلقاوهش في دارو و تلصق فيه بلي هربان و يخلع والديه على تهمة ماتديه حتى 6شهور مكمولة ل حبيبيس.

هو ماكانش ثايق بلي رافضة تديكلاري بيه و كان عارف بلي غير الخوف لي رابطها فحالها فحال بزاف د لبنات لي غير كيفوتو الرعدة د سيمانة كيجريو للكومسارياات عليها دابا بزز منو يبقى شاد بلاصة وحدة . خصوصا و هو عارف اذا شد طريق لشي بلاصة هيضرب على شي جوج سيمانات عاد باش يرجع. 
و وسط هاد الأفكار لمح واحد بنادم قاصدو هاد شيى خلاه يفطن و يحل عينيه ... كان مظهرو ماشي مظهر يخلي صدرك يرتاح , وجهو كلو مشرط و محفر بالضرابي لي بقاو نتيجة مدابزات و صراعات الشوارع وحتى يدو مكانوش ارحم من وجهو . تكى على نفس الحيط لي متكي عليه هو ...

-يعقوب مافكرش حتى يضور راسو ليه حدو حرك بؤبؤ عينو ونطق: كنعرفك باش تجي تسند حيط داري؟!

-لآخر براسو رد ليه نفس الحركة و اكتفى باش يشوف فيه بنص عين بلا مايحرك جسدو: جيت ندوي معاك بجوج كلمات ماشي كثر .

-يعقوب هاد مرة حرك راسو و شرك حواجبو بملامح بدات كتميل للغضب و قبل ماينطق كمل لاخور كلامو: قول لخوك يخوي سيكتور ديالنا باش مانخوي ليه الركابي .

-يعقوب بنفس عقدة الحواجب: وشكون نتا باش تخوي ليه ركابي؟!

-لاخور حط يديه في جيب سروالو و بعد ظهرو من الحيط في حين يعقوب كان مراقب جميع تحركاتو ب تدقيق و كيستنى الجواب وحتى لاخور مخلاهش يستنى بزاف: شوف اخويا يعقوب نتا هنا(حط يدو فوق راسو) واخا تكون نتا ناسي الخير لي درتي معايا انا مانسيتوش  .

يعقوب بدا كيتفكر واش كيعرف هذا بنادم ساعة ذاكرتو خانتو و ماتفكروش وحتى لاخور عرف بلي معاقلش عليه عليها ختاصر عليه تفكير : عمري ننسى فاش هزيتي ليا الخوادرية ل السبيطار وهي مريضة و ماهنساش فاش كنتي كتوصل البوطة للواليدة و تجيب ليها سخرة مرة مرة ...وقفتي معايا راجل ملي كنت انا متكي في الحباسات فحال الكلب ولكن هاد شيى في كفة و باش يجي خوك يزاحمني فين كنبيع حرفتي هادي كفة اخرى  .

في جملتو خذا بزاف د اخبار منها اولا انه ولد واحد من الناس لي عزاز على مو وباين حتى هو فاش جا حتى لعندو و داوي معاه نقي بلا تخسار لهضرة راه محتارمو و مراعي حتى هو لديك المحبة لي بين الامهات ديالهم ثاني حاجة هي انه خوه خدام و ماشي اي خدمة مشا ضرب ليهم التلاوي وبدا كيبيع في الحشيش بعيد على عينهم في درب خور لي عارف لا باه لا خوه كيوصلو ليه .

تنهد ونطق: لحسابات صفيهم مع مواليهم انا ماشي كلب باش نحرس سواريه ولكن غير فوت معاه الدمايات و المحاميات .

لاخور حرك راسو بنفي ونطق:الهضور مانفعوش معاه وشحال من واحد من الدرب كيبغي يقصدو وانا كنوقف ليهم في الطريق (ضرب على صدرو)حيث انا ماشي ولد الحرام باش ننسى خيرك اخويا يعقوب ولكن غير سمح ليا خوك راه طغى عليها جيت قاصدك تدوي معاه ولا آخرتو ماهتكونش مزيانة و هتسالي بيه يتدفن وهو كرشو مثقوبة كي الغربال .

يعقوب بقا ساكت لمدة قصيرة حتى نطق: انا هندوي معاه

لاخور ابتاسم ليه : الله يعزك اخويا يعقوب راك فوق الراس و كون ماكانت المعزة ديالك ماكنتش نجي نقصدك و نعلمك بلي كاين غير سمح ليا اذا برزطتك

حرك يعقوب راسو بالإيجاب و نطق: الله يعزك اخويا ... سلم على الواليدة ديالك

لاخور هز فيه راسو : هنبلغ ليها سلامك و متنساش تدوي مع هذاك و تعلمو الرجلة من فعايل الشمايت .
يعقوب بقا كيشوف فيه و مجاوبش و حتى لاخور الحوار ديالو سالا و طلع سروالو و مشا مبعد راجع لدربو و ولاد حومتو باش يعلمهم بلي قريب هذاك المتطفل وسط دربهم هيخوي ليهم البلاصة و هيكملو بيعتهم و شريتهم  .
مكانش ناقصو المشاكل ولكن هاهوما كيتزادو فوق ظهرو معاكسين مع رغبتو ... ياخوفو غير يتشد في الحبس بتهمة السرقة ومايخرج منها حتى يلقاهم كلاو خوه و رماوه في القبر ...حك نيفو و تنهد هاد شيى لي كان ناقصو غير مشاكل خوه و تارجليت ديالو لي هو عارف آخرتها كتتالي بالدمايات و كل أم في اللخر كتشد قلبها محروقة على ولدها لي اما خشاوه في لقبر اما في الحبس و في احسن الحالات هتسالي بواحد بلا عين و واحد بلا يد ...