كذبة حولتني لسفــاح[بالدارجة]

006

||كذبـة حولتني ل سفــاح||

جبد الكارو الثالت ليه هاد العشية و ضيق عينيه فاش شافها دايزة بقا شاك واش هي ولا ماشي هي حتى ضورات وجهها جيهتو ,و بحركة لا ارادية منها زيرات على صاك و رمات ليه ابتسامة متوترة
رما ابتسامة خفيفة حتى هو ليها و بعد ظهرو من الحيط قاصدها وهو ملاحظ تلون وجهها
يعقوب رمى الكارو و زطم عليه و نطق بنبرتو لي عتادتها: مادرتش ليك مشاكل مور ما مشيت؟
ريم بقات كتشوف فيه و معرفاتش شنو خاصو منها ولكن سايراتو بإبتسامة صفرا و حركات راسها بالنفي بلا ماتنطق وصبعانها مغروزين في صاكها
في حين هو هبط عينيه ل ميكة كبيرة كانت هزاها في يدها الثانية
يعقوب مد يدو للميكة:عطيني نهزها عليك
زيرات على الميكة و وجهها مخطوف منو اللون و حركات راسها بالنفي :بلا مانعذبك معايا ا خويا يعقوب  .
يعقوب شد الميكا و جرها من يدها حتى رخفات قبضة يدها بزز منها باش ماتتقطع ليها ميكتها و تصدق هازة سخرتها  في يدها

يعقوب هز ميكا و حس بوزنها الخفيف على عكس حجمها لي كيبان كبير : الميكة خفيفة ماهتعذبنيش

بقاات كتشوف فيه ونطقات : مباغاش نعذبك اخويا والله .

يعقوب رما ابتسامة ود خفيفة على ملامحو : هادي اقل حاجة نديرها باش نرد وجهي حداك .

ريم بدات كتخلف بخطوات بطيئة وحتى هو مجاريها بنفس حجم خطواتها ونطقات بنبرة مرتبكة: قلت ليك مسامحاك و من قلبي لا في دنيا لا في الآخرة .

يعقوب تنهد :انا ممسامحش راسي ...و كنحس بالذنب ثقيل على رقبتي

ريم : والله حتى مسامحاك من قلبي واذا كنتي باغي تعاوني غير باش تكفر على ذنبك راني قلت ليك مسامحاك
يعقوب حرك راسو بنفي: المشكل فيا انا لي هتجبني صعيب نشوفك دايزة ومانتفكرش شنو درت و ابسط حاجة ندير هي نوقف معاك حتى نبدل ليك نظرتك ليا .

ريم ابتاسمات ابتسامة خفيفة بلاصة ديك الضحكة الصفرة لي كانت دايرة في اول ونطقات: علاش نتا مسوق ل نظرتي؟!

يعقوب حك حاجبو بيدو الشمال حيث يدو اليمين هي لي هاز بيها الميكة: تقدري تقولي انا كنبغي نخلي بلاصتي نقية مع بنادم لي نقي .

ريم هزات فيه عينيها باش تشابك التواصل النظري لي اذا معلاتش راسها هيكون صعيب بسباب فارق الطول: وكيفاش عرفتيني انني نقية؟!